Luka 19 - Testamente Leyimpsha Xichangana

Ta Yesu na Zakewu

¹ Kutani Yesu anghena doropeni ra Yeriko, atsemakanya hi le xikarhi ka rona.

² Doropeni lero akuli ni munhu lweyi avaku i Zakewu; aali murhangeli wa varhesisi, aafuwe ngopfu.

³ Aanavela kuvona Yesu lesvaku i munhu wa matshamela muni. Kambe aasiveliwa hi xitshungu, hikuva aagomile.

⁴ Kutani atsutsumela mahlweni, akhwela nsinyeni wa nkuwa, lesvaku atavona Yesu, loko ahundza hi kolaho.

⁵ Loko Yesu afika kona, alanguta henhla amuvona, kutani aku ka yena: “Zakewu, hantlisa uxika, hikuva nifanela kuyatshama muntini wa wena namuntlha.”

⁶ Zakewu ahantla axika, amuyamukela hi kutsaka.

⁷ Kambe loko vanhu vasvivona, vavilela hinkwavu vaku: “Anghenile kaya ka wanuna wa mujohi kuyarhurheliwa kona.”

⁸ Hi loko Zakewu asuka ayima, aku ka Hosi: “Vona Hosi, nitayavanyisa rifuwo ra mina hi le xikarhi, ninyika svisiwana; ni loko nitekile xilo xa munhu hi kumukanganyisa, nitamutlhelisela xona ka mune.”

⁹ Ndzhaku ka svosvo, Yesu aku: “Namuntlha kuponisiwa kunghenile muntini lowu, hi lesvi munhu lweyi na yena anga n'wana Abrahamu,

¹⁰ hikuva N'wana-wa-Munhu atile kutalava ni kutaponisa lavalahlekeke.”

Ta xifaniso xa khume ra timina

¹¹ Kakuloko vaha yingisa timhaka toleto, Yesu atlhela avarungulela xifaniso, hikuva aali kusuhi na Yerusalema, kutani vona avapimisa lesvaku Mfumu wa Xikwembu wutahantla wuhumelela.

¹² Aku: “Nkulukumba mun'wana atilungisele kuya tikweni ra le kule, ayavekiwa kuva hosi, atatlhela avuya.

¹³ Kutani avitana malandza ya yena ya khume, anyika mina yin'we ka mun'wana ni mun'wana, wa vona aku ka vona ‘Bindzulani ha yona nikondza nivuya.’

¹⁴ Kambe valekwavo avamuvenga. Loko afambile, vasala varhuma vakombisi, vayavula lesvi: ‘Munhu lweyi, ahilavi kufumiwa hi yena!’

¹⁵ “Siku leri nkulukumba avuyaka, na avekiwe kuva hosi, alerisa lesvaku malandza lawaya angamanyika timina, mavitaniwa, lesvaku atativa lesvi mun'wana ni mun'wana abindzuleke svona.

¹⁶ Kufika lweyi worhanga aku: ‘Hosi, mina ya wena yibindzulile khume ra timina.’

¹⁷ Hosi yiku ka yena: ‘Hi svona, mutirhi lwenene; lesvi utshembekeke mhakeni leyitsongo ngopfu, utafuma madoropa ya khume.’

¹⁸ Lweyi wa vumbirhi na yena, ata aku: ‘Mina ya wena hosi, yibindzule ntlhanu wa timina.’

¹⁹ Hosi yiku ka yena: ‘Wena ke, fuma madoropa ya ntlhanu.’

²⁰ Mun'wana ata, aku: ‘Hosi, mina ya wena hi leyi, niyiphutsele hi faduku;

²¹ anikuchava, hikuva u munhu wo nonon'hwa, uteka lexi ungaxivekangiki, utshovela lexi ungaxibzalangiki.’

²² Hosi yihlamula yiku: ‘Wena mutirhi lwewobiha, nitakuyavanyisa hi kuvulavula ka wena. Awusvitiva lesvaku ni munhu wo nonon'hwa, ni lesvaku niteka lexi ningaxivekangiki, ni kutshovela lexi ningaxibzalangiki!

²³ Hikolaho ka yini ungavekanga mina ya mina ka vabindzulisi xana? Kuvuyeni ka mina, anitava niyitekile svin'we ni bindzu ra yona.’

²⁴ Kutani aku ka lava avali kona kolaho: ‘Mutekeleni mina, miyinyika lweyi anga ni timina ta khume.’ [

²⁵ Vaku ka yena: ‘Kambe, Hosi, anikhume ra timina!’]

²⁶ Yena aku: ‘Namibzela lesvaku kutanyikiwa mani na mani lweyi anga ni xanchumu; kambe lweyi angaliki na nchumu, atatekeliwa ni lexi anga na xona.

²⁷ Loko vali valala va mina lavangalavangiki lesvaku ni vafuma, vatiseni kola, mivadlaya mahlweni ka mina.’”

Ta Yesu loko anghena Yerusalema

²⁸ Kuteloko avulavulile timhaka toleto, ahundzela mahlweni, atlhantukela Yerusalema.

²⁹ Loko atshinelela Betfaje na Betaniya, kusuhi ni ntshava leyivuliwaka ya Maolivhera, ahlawula vambirhi xikarhi ka vajondzisiwa va yena aku ka vona

³⁰ “Yanani muntini lowuvonakaka lahaya; loko minghena ka wona, mitakuma ximbongolwana lexibohiweke, lexikalaka xingasigadiwa hi munhu; xitshunxeni, mita na xona halenu. Loko munhu amivutisa aku:

³¹ ‘Mixitshunxela yini?’, mitaku: ‘Hosi yaxilava.’”

³² Lava varhumiweke vafamba, vayakuma svili hilaha angavabzela hakona.

³³ Loko vatshunxa ximbongolwana, vinyi va xona vavavutisa, vaku: “Ximbongolwana xoxo mixitshunxela yini ke?”

³⁴ Vona vaku: “Hosi yaxilava.”

³⁵ Kutani vata na xona ka Yesu; vakapeka tinguvu ta vona henhla ka xona, vagadisa Yesu.

³⁶ Loko ali karhi afamba, vayandlala tinguvu ta vona ndleleni.

³⁷ Kutani loko ali kusuhi ni kungirimela Ntshava ya Maolivhera, xitshungu hinkwaxu xa vajondzisiwa xisungula kutsaka, xidzunisa Xikwembu hi rito leritlakukeke, hikolaho ka mahlori hinkwawu lawa ximavoneke, uku:

³⁸ “Akudzunisiwe Mufumi lweyi ata ka hi vito ra Hosi! Kurhula akuve matilweni, ni kukwetsima matilweni ya le henhlahenhla!”

³⁹ Kutani Vafarisi van'wana, lava avali xitshungwini, vaku ka yena: “Mujondzisi, miyeta vajondzisiwa va wena.”

⁴⁰ Avahlamula aku: “Namibzela lesvaku, loko vona vamiyela, maribze matahuwelela.”

⁴¹ Kuteloko afikile kusuhi ni doropa, arivona, ali rilela,

⁴² aku: “Yo! Loko ingi na wena awutivile namuntlha timhaka leti tingatisaka kurhula, kambe uyo fihleliwa tona svosvi.

⁴³ Hakunene nkarhi wata, lowu valala va wena vangatayaka rithangu, vakurhendzela ha rona, vakupfalela matlhelo hinkwawu;

⁴⁴ vatakuhahlula, vahelisa ni lava vayakeke ka wena; kutani valala vangakala vangatshiki ribze henhla ka ribze laha ka wena, hikuva awutivanga nkarhi lowu uyendzeliweke ha wona.”

Ta kubasisiwa ka Tempele

⁴⁵ Kuteloko anghenile Tempeleni, ahlongola hinkwavu lava vaxavisaka kona, aku ka vona:

⁴⁶ “Kutsaliwile lesvaku: ‘Yindlo ya mina yitava yindlo ya xikhongelo’, kasi n'wina miyiyendlile ‘mhakwa wa vayivi’.”

⁴⁷ Yesu aajondzisa Tempeleni masiku hinkwawu. Kambe Vaprista lavakulu ni Vatsali svin'we ni vakulukumba va tiko, avalava kumudlaya.

⁴⁸ Ntsena avangativi lexi vangataxiyendla, hikuva vanhu avamuyingisa, vatsakela ngopfu marito ya yena.