Luka 18 - Testamente Leyimpsha Xichangana

Ta xifaniso xa mufelakazi ni muyavanyisi

¹ Yesu abzela vajondzisiwa xifaniso, kukomba lesvaku vanhu vafanele kukhongela minkarhi hinkwayu, vangakarhali,

² aku: “Doropeni rokarhi akuli ni muyavanyisi lweyi aangachavi Xikwembu hambi vanhu, aangavaxiximi.

³ Doropeni rolero, akuli ni mufelakazi lweyi angaya ka yena, aku: ‘Tsema mhaka xikarhi ka mina ni nala wa mina.’

⁴ Svitekile nkarhi lowoleha na yena ahayala. Kambe ndzhaku atiyanakanya, aku: ‘Hambi loko ningachavi Xikwembu, ningaxiximi vanhu,

⁵ lesvi mufelakazi lweyi anikarhataka, nitamutsemela mhaka ya yena, lesvaku angatshameli kunipandzisa nhloko.’”

⁶ Kutani Hosi yiku: “Yingisani lesvivuliwaka hi muyavanyisi lweyi wokala angatshembekanga.

⁷ Ina-ka, xana Xikwembu axingayendli vuyavanyisi lebzinene ka vahlawuliwa va xona, ni kuvalehisela mbilu, vona lavahuwelelaka ka xona vusiku ni nhlekanhi, hambi xihlwela ke?

⁸ Nili ka n'wina: Xitahantlisa kuvatsemela mhaka ya vona. Kambe loko N'wana-wa-Munhu ata, xana atakuma kupfumela kuli kona misaveni ke?”

Ta xifaniso xa Mufarisi ni murhesisi

⁹ Yesu atlhela avulavula ni van'we lavatitshembaka lesvaku valulamile kasi vasandza van'wana, avabzela xifaniso lexi:

¹⁰ “Vanhu vambirhi avatlhantukelile Tempeleni kuyakhongela; mun'we aali Mufarisi, mun'wana aali muhakelisi wa rhesa.

¹¹ Mufarisi ayima, akhongelisa lesvi mbilwini ya yena: ‘Xikwembu, nakukhensa lesvi ningafaniki ni vanhu van'wana, lavanga ni makwanga, lavangatshembekangiki, lavawosvaka, ni lesvi ningafaniki ni murhesisi lweyi.

¹² Nititsona svakuja kambirhi hi vhiki, nihumesa vukhume bza hinkwasvu lesvi ni svikumaka.’

¹³ Muhakelisi wa rhesa yena aanyime hi le kule, achava ni kutlakusa mahlo alanguta tilweni, kambe aakomba kuvaviseka, aku: ‘Xikwembu, nitwele vusiwana, mina ninga mujohi.’

¹⁴ “Nili ka n'wina: Murhesisi lweyi atlhelele kaya ka yena na ahlayiwile lweyi alulameke kutlula Mufarisi; hikuva mani na mani lweyi atikulisaka, atatsongahatiwa, ni lweyi atitsongahataka atakulisiwa.”

Ta Yesu loko akatekisa vatsongwana

¹⁵ Kutani vanhu van'wana vatisa vana lavatsongo ka Yesu lesvaku avakhumba; loko vajondzisiwa vasvivona, vasola vanhu lava.

¹⁶ Kambe Yesu avitana vatsongwana, kutani aku ka vajondzisiwa: “Tshikani vatsongwana vata ka mina, mingatshukeni miva sivela, hikuva Mfumu wa Xikwembu i wa lavafanaka na vona.

¹⁷ Nitiyisile nili ka n'wina: Lweyi angayamukeliki Mfumu wa Xikwembu tani hi ntsongwana, angakala angangheni ka wona.”

Ta jaha ra mufuwi

¹⁸ Kutani yin'wana ya tindhuna yimuvutisa, yiku: “Mujondzisi lwenene, xana ningayendla yini kukuma vutomi lebzingaheliki ke?”

¹⁹ Yesu aku ka yena: “Univulela yini lwenene xana? Aku na lwenene, loko xingali Xikwembu ntsena.

²⁰ Wena utiva Milawu leyi yinge: ‘Ungatshuki uwosva; ungatshuki udlaya; ungatshuki uyiva; ungatshuki uveka vumboni bzohemba; uva ni xichavu ka tatana wa wena ni ka mamana wa wena.’”

²¹ Yena aku: “Nihlayisile hinkwasvu lesvi kusukela vumpsheni bza mina.”

²² Loko Yesu atwa svosvo, aku ka yena: “Wahapfumala xilo xin'we: Xavisa hinkwasvu lesvi unga na svona, uyavela svisiwana, hi kona ungatava ni rifuwo matilweni; kutani uta, unilandza.”

²³ Loko munhu lwiya atwa svosvo, atlhaveka ngopfu, hikuva aali munhu wa rifuwo lerikulu.

²⁴ Kutani Yesu amulanguta, aku: “Svanonon'hwa ngopfu ka lavanga ni rifuwo kunghena Mfun'wini wa Xikwembu.

²⁵ Hikuva svingawolovela kamela kunghena hi mbhovo ya nayethi kutlula kuva mufuwi anghena Mfun'wini wa Xikwembu.”

²⁶ Lava vatwaka marito lawa, vaku: “Loko svilitano kungapona mani ke?”

²⁷ Yesu aku: “Lesvi tsandzaka vanhu asvitsandzi Xikwembu.”

²⁸ Hi loko Petrosi aku: “Wasvivo, hitshikile svilo sva hina, hikulandza.”

²⁹ Yena aku ka vona: “Nitiyisile nili ka n'wina: Mani na mani lweyi atshikeke munti wa yena, kumbe nsati, kumbe vamakwavu, kumbe vapsali, kumbe vana, hikolaho ka Mfumu wa Xikwembu,

³⁰ atakuma lesvotala kutlula svosvo minkarhini ya svosvi, kutani minkarhini leyitaka, atakuma vutomi lebzingaheliki.”

Ta Yesu loko ativisa ka vunharhu ta rifu ra yena

³¹ Yesu avitana lava va khume ni vambirhi hi tlhelo, kutani avabzela lesvi: “Vonani, hitlhantukela Yerusalema kutani hinkwasvu lesvitsaliweke hi vaprofeta henhla ka N'wana-wa-Munhu svitahetiseka.

³² Hikuva atanyiketiwa ka vamatiko; vatatlanga hi yena, arhuketeliwa, apshiteliwa marhi;

³³ kutani loko vamubile hi tinhonga, vatamudlaya; kambe atapfuka kufeni hi siku ra vunharhu.”

³⁴ Kambe vona avatwisisanga nchumu timhakeni toleto; rito leri arivatumbelelile, kutani avasvitwisisanga lesvi Yesu aavula svona.

Ta kuhanyisiwa ka xifamahlo kusuhi na Yeriko

³⁵ Loko Yesu afikile kusuhi na Yeriko, ndhawini yoleyo, akuli ni munhu wa xifamahlo, atshamile kusuhi ni ndlela. Aali karhi akombela.

³⁶ Loko atwa xitshungu lexi xihundzaka, avutisa, aku: “Kuhumelela yini xana?”

³⁷ Vamubzela vaku: “I Yesu wa Nazareta lweyi ahundzaka.”

³⁸ Kutani ahuwelela aku: “Yesu, n'wana Davhida, nitwele vusiwana!”

³⁹ Kutani lavarhangeke mahlweni vamutshinya, akuva amiyela; kambe yena atlhela ahuwelela hi matimba, aku: “N'wana Davhida, nitwele vusiwana!”

⁴⁰ Hi loko Yesu ayima, alerisa lesvaku lweyi wa xifamahlo atisiwa ka yena; loko afikile kusuhi, Yesu amuvutisa aku:

⁴¹ “Xana ulava lesvaku ni kuyendlela yini ke?” Yena aku: “Hosi, ninavela kutlhela nivona!”

⁴² Yesu aku ka yena: “Tlhela uvona! Kupfumela ka wena kukuhanyisile.”

⁴³ Hi nomo-lo, atlhela avona, kutani alandza Yesu na ali karhi adzunisa Xikwembu. Narona tiko hinkwaru, loko risvivonile, ritlangela Xikwembu.