Luka 17 - Testamente Leyimpsha Xichangana

Ta svikhunguvanyiso ni kurivalela

¹ Yesu aku ka vajondzisiwa va yena: “Loko svili svikhunguvanyiso asvingapfumaleki, kambe yowee ka lweyi svikhunguvanyiso svihumelelaka hikolaho ka yena.

² Svingava svinene loko ribze ra kusila ringaboheleliwa nhan'wini ya yena ahoxiwa lwandle, handle ka kuva akhunguvanyisa mun'we wa lavatsongo.

³ Tivoneleni ke! “Loko makwenu ajohile, mutshinye; loko atisola, murivalele.

⁴ Ni loko akujohela ka ntlhanu ni kambirhi hi siku rin'we, kutani ata ka wena ka ntlhanu ni kambirhi, aku: ‘Natisola’, murivalele.”

Ta kupfumela

⁵ Vapostola vaku ka Hosi: “Hiyengetele kupfumela.”

⁶ Hosi yiku: “Loko mili ni kupfumela loku kuringanaka ni ndzoho ya sinapi, amitaku ka nsinya wa svintimana: mora lowu: ‘Tisimule, uyatisimeka lwandle!’ Kutani awutamiyingisa.

Ta timfanelo ta mutirhi

⁷ “Mun'we wa n'wina angava ni mutirhi lweyi amurimelaka masimu, kumbe lweyi amuriselaka svifuyu. Loko mutirhi lweyi avuya hi le masin'wini, xana n'winyi wa yena ataku ka yena: ‘Hantlisa uta halenu, utatshama kujeni,’ xana?

⁸ Nikutsongo! Kambe ataku ka yena: ‘Nilungisele svakuja, kutani utikhama, unitirhela loko nija, ni nwa; ndzhaku ka svona, na wena utaja, unwa!’

⁹ Xana mutirhi lweyi, atakhensiwa loko ayendlile lesvi angalerisiwa svona ke? Ahihim!

¹⁰ Hi mukhuva wolowo, na n'wina, loko mihetile hinkwasvu lesvi milerisiweke svona, vulani miku: ‘Hi malandza lamangafaneliwiki hi kukhensiwa, hiyendlile ntsena lesvi ahifanela kusviyendla.’”

Ta Yesu loko ahanyisa va nhlokonho va khume

¹¹ Loko Yesu ali karhi akongoma Yerusalema, alulama ni ndzelekano wa matiko ya Samariya na Galileya.

¹² Aalikarhi anghena xidoropanini xin'we loko va nhlokonho va khume vahlangana na yena. Avanyimile kulenyana,

¹³ kutani vahuwelela, vaku: “Yesu, Mujondzisi, hitwele vusiwana!”

¹⁴ Loko Yesu avavona, aku ka vona: “Fambani, miyatikomba ka vaprista.” Kakuloko vahaya kona, vabasisiwa.

¹⁵ Mun'we wa vona, loko avona lesvaku ahanyisiwile, atlhelela ndzhaku na ali karhi adzunisa Xikwembu hi rito leritlakukeke.

¹⁶ Kutani atiwisa hi mombo milengeni ya Yesu, amutlangela. Munhu yelweyo aali Musamariya.

¹⁷ Hi loko Yesu avutisa aku: “Xana avabasisiwanga na vali khume ke?

¹⁸ Lava va ntlhanu ni mune vakwihi xana? Xana akukumekanga van'wana lavangatlhelela ndzhaku kutadzunisa Xikwembu, handle ka munhu lweyi wa rixaka rin'wana ke?”

¹⁹ Kutani aku ka yena: “Pfuka, uyima, utifambela, kupfumela ka wena kukuhanyisile.”

Ta kuta ka Mfumu wa Xikwembu

²⁰ Vafarisi vavutisa Yesu, vaku: “Xana Mfumu wa Xikwembu wutata rini ke?” Kutani avahlamula aku: “Mfumu wa Xikwembu awuhumeleli wulikarhi wuvoniwa hi mahlo;

²¹ akungavuliwi lesvaku: ‘Vonani, hi wolowo!’ Kumbe: ‘Hi lowuya!’ Hikuva Mfumu wa Xikwembu wu kona xikarhi ka n'wina.”

²² Atlhela aku ka vajondzisiwa: “Kutata masiku lawa mingatanavela kuvona rin'we ntsena ra masiku ya N'wana-wa-Munhu, kambe amingarivoni.

²³ Vataku ka n'wina: ‘Langutani lahaya!’ Kumbe: ‘Langutani halenu!’ Kambe mingatshukeni miya kona, mingatsutsumeleni kona.

²⁴ Hikuva kukotisa rihati loko rihatima, rivoninga kusukela tlhelweni rin'we ra tilo kuyafika ka lerin'wana, N'wana-wa-Munhu atayendlisa svosvo hi siku ra yena.

²⁵ Kambe kusunguleni afanele kutwisiwa kuvaviseka lokukulu, anyenyiwa hi va nguva leyi.

²⁶ “Hilaha svilo svihumeleleke hakona masikwini ya Nowa, svitahumelelisa xisvosvo masikwini ya N'wana-wa-Munhu.

²⁷ Avaja, vanwa, vachada ni kuchadisiwa, kukondza kufika siku leri Nowa angheneke ngalaweni ha rona, kutani ndhambhi yifika, yivalovisa hinkwavu.

²⁸ Nasvona svihumelelise xisvosvo masikwini ya Loti; avaja, vanwa, vaxava ni kuxavisa, vabzala, vayaka tiyindlo;

²⁹ kambe siku leri Loti ahumeke Sodoma ha rona, ndzilo ni xivavula sviwa hi le tilweni, svivalovisa hinkwavu.

³⁰ Svitava tano hi siku leri N'wana-wa-Munhu angatahumelela ha rona.

³¹ “Hi siku lero, lweyi angahenhla ka yindlo, na nhundzu ya yena yili ndlwini, angatshuki axika, ayayiteka; ni lweyi anga masin'wini angatshuki avuyela kaya.

³² Tsundzukani ta nsati wa Loti.

³³ Mani na mani lweyi angatalava kutihlayisela vutomi bza yena, atalahlekeliwa hi bzona; kambe mani na mani lweyi alahlekeliwaka hi vutomi bza yena, atabziponisa.

³⁴ Namibzela, nili: Hi vusiku bzakona, ka vanhu vambirhi lavangatava vayetlelile ndhawini yin'we, kutatekiwa mun'we, mun'wana asiyiwa.

³⁵ Ka vavasati vambirhi lavangatava na vasila svin'we, kutatekiwa mun'we, mun'wana asiyiwa. [

³⁶ Ka vanhu vambirhi lavangatava masin'wini, kutatekiwa mun'we, mun'wana asiyiwa.]”

³⁷ Kutani va muvutisa vaku: “Hosi, svitava kwihi ke?” Akuka vona: “Laha ntsumbu wunga kona, hilaha makoti mangatahlengeletana kona.”