Luka 16 - Testamente Leyimpsha Xichangana

Ta xifaniso xa mulanguteli lweyi angatshembekangiki

¹ Yesu aku ka vajondzisiwa va yena: “Akuli ni xipfundzi lexi axili ni mulanguteli. Kutani mulanguteli lweyi, vanhu avahamba vamuhleva ka n'winyi wa yena, vaku: ‘Ahangalasa rifuwo ra wena.’

² Xipfundzi ximuvitana xiku ka yena: ‘Timhaka ta wena leti nititwaka hitihi ke? Nyika marungula ya vulanguteli bza wena, hikuva awungahapfumeleliwi kuva mulanguteli.’

³ Yena ayanakanya mbilwini ya yena, aku: ‘Nitayendla yini, lesvi n'winyi wa mina anitekelaka vulanguteli bza mina? Kurima, aninantamu. Kukombela, svikhomisa tingana.

⁴ Haa! Nasvitiva lesvi ningatayendla svona, lesvaku vanhu vaniyamukela makaya ka vona, loko nitava nitekeliwile vulanguteli bza mina.’

⁵ Kutani avitana, ha mun'we mun'we, ka lava avali ni milandzu ka n'winyi wa yena; ka lweyi worhanga aku: ‘Nandzu lowu unga na wona ka n'winyi wa mina i wa mpimo muni xana?’

⁶ Yelweyo aku: ‘I dzana ra mimpimo ya mafurha.’ Mulanguteli aku ka yena: ‘Teka papela ra wena ra nandzu, utshama hansi, uhantla utsala ntlhanu wa makume.’

⁷ Ka mun'wana aku: ‘Wena ke, nandzu wa wena i wa mpimo muni ke?’ Yena aku: ‘I dzana ra mimpimo ya mavele.’ Kutani aku ka yena ‘Teka papela ra wena, utsala ntlhanu wa makume ni makume manharhu (80).’

⁸ Kutani n'winyi adzunisa mulanguteli wokala angatshembekanga, hikuva aayendlile hi vutlhari.” Yesu atlhela aku: “Vanhu va misava leyi vatlharihile kutirhisaneni ni va ka vona kutlula vanhu vakuvonakala.

⁹ “Hikolaho-ke nili ka n'wina: Tiyendleleni maxaka hi rifuwo ra misava leyi, lesvaku loko mitshuka mipfumalile, vamiyamukela minchancheni leyi yingaliki na kuhela.

¹⁰ Lweyi atshembekeke ka lesvitsongo, ni ka lesvikulu atatshembeka; lweyi angatshembekangiki ka lesvitsongo, ni ka lesvikulu angakala angatshembeki.

¹¹ Kutani loko mingatshembekanga ka rifuwo ra laha misaveni leyi, i mani lweyi angatamitshemba ka rifuwo ra ntiyiso xana?

¹² Nasvona loko mingavanga lavotshembeka ka svilo sva van'wana, i mani lweyi angataminyika lesvinga sva n'wina xana?

¹³ “Aku na mutirhi lweyi angakotaka kutirhela tihosi timbirhi, hikuva atavenga yin'we, arhandza leyin'wana; kumbe atanamarhela yin'we afularhela leyin'wana. Mingekoti kutirhela Xikwembu na Mamona.”

Ta Nawu ni ta Mfumu wa Xikwembu

¹⁴ Vafarisi, vanga vanhu va makwanga ni male, avatwa timhaka toleto hinkwatu, kutani vamusola.

¹⁵ Yena aku ka vona: “Loko mili n'wina, mitiyendla lavalulameke mahlweni ka vanhu; kambe Xikwembu xitiva timbilu ta n'wina; hikuva lesvi vanhu vasvitekaka svili sva le henhla, mahlweni ka Xikwembu ahi nchumu.

¹⁶ “Nawu ni Vaprofeta hi svona lesvi asvitirha kufika loko Yohani Mukhuvuli ahumelela; kusukela nkarhini wolowo, Evhangeli ya Mfumu wa Xikwembu yikarhi yivuliwa, kutani mun'wana ni mun'wana anghena ka wona hi kutirhisa matimba.

¹⁷ “Tilo ni misava svinganyamalala hi kuvevuka, kutlula kususa xindzhatana xin'we ntsena Nawini.

¹⁸ “Mani na mani lweyi atshikaka nsati wa yena, atlhela ateka mun'wana, wawosva; nasvona lweyi atekaka lweyi atshikiweke hi nuna wa yena, wawosva.

Ta mufuwi na Lazaru

¹⁹ “Akuli ni mufuwi lweyi aayambala xiyambalu xophatima xa xivunguvungu ni xa ntsembzana, atshama kutsakeni atiphina hi masiku hinkwawu.

²⁰ Nasvona, akuli ni xisiwana xa xikombeli lexi avaku i Lazaru; axiyambala kutani xitatavekiwa nyangweni wa xipfundzi. Axitele hi svilondza.

²¹ Axinavela kuxurha hi matlhantlha lawa mawaka hi le mezeni wa xipfundzi; timbzana na tona atita, titaxinampsela svilondza.

²² Siku rin'wana xikombeli lexiya xifa, kutani tintsumi tixirhwala tixiyisa xifuveni xa Abrahamu. Mufuwi na yena afa, alahliwa sirheni.

²³ “Loko ali hadesi, ali karhi axaniseka, atlakusa mahlo, avona Abrahamu hi le kule, na Lazaru xifuveni xa yena.

²⁴ Kutani ahuwelela aku: ‘Tatana Abrahamu, nitwele vusiwana, rhuma Lazaru lesvaku apeta xintihwana xa yena matini, atitimeta ririmi ra mina, hikuva nivaviseka ngopfu malangavini lawa!’

²⁵ Kambe Abrahamu aku: ‘N'wananga, tsundzuka lesvaku ukumile rifuwo vuton'wini bza wena, kasi Lazaru yena aavaviseka nkarhini wolowo; kambe svosvi wa chaveleliwa halenu, kasi wena utwisiwa kuvaviseka.

²⁶ Handle ka lesvi hinkwasvu, ku ni khele lerikulu rokala makumu, leriyahlameke xikarhi ka hina na n'wina, lesvaku lavanavelaka kusuka halenu, vata koseyo ka n'wina vangasvikoti; na vona lavanga koseyo ka n'wina loko vanavela kuta halenu, vatsandzeka.’

²⁷ “Kutani aku: ‘Tatana, nakukhongela lesvaku urhuma Lazaru aya muntini wa tatana,

²⁸ hikuva ni ni vamakwerhu va ntlhanu. Ataya valaya, lesvaku vangatshuki vata na vona ndhawini leyi ya kuxaniseka.’

²⁹ Abrahamu aku ka yena: ‘Vana Moxe ni Vaprofeta, avayingise vona!’

³⁰ Mufuwi aku: ‘Ahihim, tatana Abrahamu, kambe loko mun'we wa lavafeke atlhelela ka vona, avatahundzuka.’

³¹ Abrahamu aku ka yena: ‘Loko vangayingisi Moxe ni Vaprofeta, vangakala vangakholwi, hambi loko mun'we wa vafi apfuka.’”