Luka 15 - Testamente Leyimpsha Xichangana

Ta xifaniso xa nyempfu leyilahlekeke

¹ Kutani varhesisi ni vajohi hinkwavu vamutshinelela kutamuyingisa.

² Kambe Vafarisi ni Vatsali van'unun'uta vaku: “Munhu lweyi ayamukela vajohi, aja na vona.”

³ Hi loko avabzela xifaniso lexi:

⁴ “Loko mun'we wa n'wina ali ni dzana (100) ra tinyempfu, kutani alahlekeliwa hi yin'we ya tona, xana angakala angasiyi leti ta ntlhanu ni mune wa makume ni ntlhanu ni mune (99) nhoveni, ayalava leyilahlekeke, akondza ayikuma ke?

⁵ Kutaku loko ayikumile, ayitlakula, ayipakatsa na atsakile.

⁶ Loko afika kaya, arhamba vanghanu ni vayakelani, aku ka vona ‘Ahitsakeni svin'we, hikuva nikumile nyempfu ya mina leyi ayilahlekile.’

⁷ Namibzela lesvaku hi mukhuva wolowo, kutava ni kutsaka tilweni hikolaho ka mujohi alimun'we lweyi ahundzukaka, kutlula kutsaka lokungatava kona hikolaho ka lavalulameke va ntlhanu ni mune wa makume ni ntlhanu ni mune (99) lavangavileliki kuhundzuka.

Ta Xifaniso xa male yolahleka

⁸ “Loko wansati ali ni khume ra tidrakma, kutani alahlekeliwa hi yin'we ntsena, xana angakala angalumeki rivoni, asviyela yindlo, alavisisa svinene akondza ayikuma ke?

⁹ Kutaku loko ayikumile, arhamba vanghanu ni vayakelani va yena, aku ka vona: ‘Ahitsakeni svin'we, hikuva nikumile cheleni ra mina, leri arilahlekile.’

¹⁰ Namibzela lesvaku, hi mukhuva wolowo, tintsumi ta Xikwembu tatsaka svinene loko mujohi hambi alimun'we ahundzuka.”

Ta xifaniso xa n'wana lweyi asukeke kaya

¹¹ Yesu atlhela aku: “Akuli ni munhu mun'we lweyi aali ni vana vambirhi vaxinuna;

¹² lweyi wantsongo aku ka tatana wa yena: ‘Tatana, ninyike xiyenge xa rifuwo leringa ra mina.’ Kutani tatana wa vona avayavela rifuwo ra yena.

¹³ Kuteloko kuhundzile masiku mangali mangani, n'wana lweyi wantsongo ahlengeleta hinkwasvu, afamba aya tikweni ra le kule, ayahangalasa rifuwo ra yena hinkwaru.

¹⁴ Loko ajile hinkwasvu, kuva ni ndlala leyikulu tikweni lero, kutani asungula kupfumala.

¹⁵ Kutani afamba ayanamarhela munhu wa tiko rolero; munhu yelweyo amurhuma masin'wini ya yena kuyarisa makhumba.

¹⁶ Kutani aanavela kuxurha hi matluka lawa majiwaka hi makhumba, hikuva akungali na munhu lweyi amunyikaka nchumu.

¹⁷ “Hi loko atiyehleketa, aku: ‘Svitirhi lesvotala ngopfu sviko na ka tatana, lesvijaka svixurha; kasi mina halenu nafa hi ndlala.

¹⁸ Nitapfuka, ni ya ka tatana, nitafika niku ka yena: Tatana, nijohele Tilo na wena,

¹⁹ asvahanifaneli kuvuliwa n'wana wa wena; niyendle tani hi mun'we wa svitirhi sva wena.’

²⁰ Kutani apfuka, aya ka tatana wa yena. “Loko ahali kule, tatana wa yena amuvona, amutwela vusiwana; kutani atsutsuma, ayamuvukarha, amun'qunta.

²¹ Kutani n'wana aku ka yena: ‘Tatana, ni johele Tilo na wena, asvahanifaneli kuvuliwa n'wana wa wena.’

²² Kambe tatana wa yena aku ka vatirhi va yena: ‘Hantlisani mitisa xiyambalu lexinene ka hinkwasvu, mimuyambexa ringi ritihweni ra yena ni masandhazi mikondzweni ya yena.

²³ Nasvona tisani rhole lerinoneke, miritlhava, hija, hitsaka;

²⁴ hikuva n'wana lweyi wa mina aafile, kambe svosvi wahanya; aalahlekile, kambe svosvi akumiwile.’ Kutani vasungula kutsaka.

²⁵ “Kambe n'wana wa yena lwenkulu aali masin'wini; loko avuya afika kusuhi ni munti, atwa kuyimbelela ni kucina.

²⁶ Avitana mun'we wa malandza, amuvutisa aku: ‘Kuyendleka yini xana?’

²⁷ Yelweyo amuhlamula aku: ‘Makwenu avuyile, kutani tatana wa wena atlhavile rhole lerinoneke, hikuva amukumile na ahahanya.’

²⁸ Kambe n'wana lwenkulu akariha, ayala kunghena. “Tatana wa yena ahuma, ayamukhongotela.

²⁹ Yena ahlamula aku ka tatana wa yena: ‘Vona, nikutirhelile malembe layotala ngopfu, ningatluli ni xin'we xa svileriso sva wena, kambe kuhava siku ni rin'we leri utshamaka uninyika ximbutana lesvaku nitsaka ni vanghanu va mina.

³⁰ Kasi n'wana wa wena lweyi, ajile rifuwo ra wena hinkwaru ni tinghwavana, kutani loko avuya, umutlhavela rhole ra kunona!’

³¹ Kambe tatana wa yena aku ka yena: ‘N'wananga, utshama na mina masiku hinkwawu; hinkwasvu lesvinga sva mina, i sva wena;

³² kambe hifanela kutsaka, hiba minkulungwana, hikuva makwenu lweyi aafile, svosvi wahanya; aalahlekile, svosvi akumiwile.’”