Luka 14 - Testamente Leyimpsha Xichangana

Ta Yesu loko ahanyisa munhu wa xitsamba

¹ Hi siku ra Savata, Yesu anghena ndlwini ya nkulukumba mun'we wa Vafarisi, kuyaja svakuja kona. Vanhu avamuxiyaxiya svinene.

² Kutani munhu wovabza hi xitsamba, aali kona kolaho.

³ Yesu avutisa vajondzisi va Nawu ni Vafarisi aku: “Xana svapfumeleliwa kuhanyisa munhu hi siku ra Savata, kumbe asvipfumeleliwi ke?”

⁴ Vona vamiyela. Hi loko Yesu ateka muvabzi, amuhanyisa, kutani amutshika afamba.

⁵ Kutani aku ka vona: “Xana i mani ka n'wina lweyi angatakala angahantlisi kuhumesa n'wana wa yena kumbe homu ya yena xihlobzeni xa mati, loko sviwele kona hi siku ra Savata ke?”

⁶ Kutani vatsandzeka kuhlamula marito lawa.

Jondzo ya murhambi ni varhambiwa nkhubzeni

⁷ Loko Yesu avona hilaha lavarhambiweke nkhubzeni vatihlawulelaka hakona svitshamu sva le mahlweni, avajondzisa hi xifaniso lexinge:

⁸ “Loko munhu akurhamba nkhubzeni wa muchado, ungayi uyatshamisa xitshan'wini xa le mahlweni; hikuva svingahumelela lesvaku mun'wana lweyi akutlulaka hi kuchaviseka arhambiwile na yena hi n'winyi wa muchado;

⁹ kutani lweyi angamirhamba hi vumbirhi bza n'wina, atata, aku ka wena: ‘Nyisela lweyi;’ Kutani utayatshama na uli ni tingana xitshan'wini xa le ndzhaku.

¹⁰ Kambe loko urhambiwile, yana uyatshamisa xitshan'wini xa le ndzhaku, lesvaku loko kuta lweyi akurhambeke, ataku ka wena: ‘Nakulorhi, tshinela halenu henhla.’ Hi mukhuva wolowo, utadzunisiwa mahlweni ka hinkwavu lavatshameke svakujeni svin'we na wena.

¹¹ Hakunene mani na mani lweyi atikulisaka, atatsongahatiwa; kambe lweyi atitsongahataka atakulisiwa.”

¹² Kutani aku ka lweyi amurhambeke: “Loko uyendla nkhuvu wa xifihlulo kumbe wa xilalelo, ungarhambi vanghanu va wena, kumbe vamakwenu, kumbe maxaka ya wena, kumbe svipfundzi lesvi ugamakaneke na svona ntsena, hikuva na vona vatakurhamba, kutani svihundzuka xikhenso ka wena.

¹³ Kambe loko uyendla nkhuvu, rhamba svisiwana, ni svilima, ni lava vakhutaka, ni svifamahlo;

¹⁴ utakateka, hikuva ava na sva kukutlhelisela vakukhensa ha svona, kutani hi siku ra kupfuka ka lavolulama utatlheliseliwa svona.”

Ta xifaniso xa nkhuvu lowukulu

¹⁵ Loko mun'we wa lavatshameke svakujeni, atwa timhaka toleto, aku ka Yesu: “Kukatekile lweyi angataja svakuja Mfun'wini wa Xikwembu!”

¹⁶ Kambe Yesu aku ka yena: “Munhu wokarhi atshama ayendla nkhuvu lowukulu wa svakuja, arhamba vanhu lavotala ka wona.

¹⁷ Kutani hi nkarhi wa kuja arhuma mutirhi wa yena kuyativisa lavarhambiweke aku: ‘Tanani, svilo hinkwasvu svilungisiwile.’

¹⁸ Kambe hinkwavu vava nomo wun'we kutitsetsa. Lweyi wosungula aku ka mutirhi: ‘Nixavile nsimu, kutani nifanele kuyayivona; nikombela lesvaku uyavabzela vanirivalela.’

¹⁹ Mun'wana aku: ‘Nixavile khume ra tinkavi, kutani niyakutiringeteni; nikombela lesvaku uyavabzela vanirivalela.’

²⁰ Mun'wana aku: ‘Naha kuteka nsati, hi kolaho anikoti kuta.’

²¹ Mutirhi atlhela ayativisa n'winyi wa yena timhaka toleto. Hi loko n'winyi wa munti akariha, aku ka mutirhi wa yena: ‘Hantlisa ufamba, uya svitaratwini, ni le svindlelanini sva doropa, utisa halenu svisiwana, ni svilima, ni svifamahlo, ni lava vakhutaka.’

²² Kutani mutirhi aku: ‘Hosi, kuyendliwile hilaha uleriseke hakona, kambe ndhawu yahali kona.’

²³ Kutani n'winyi aku ka mutirhi: ‘Yana tindleleni, urhendzeleka ni lomu kubiyiweke hi rithangu, usindzisa vanhu kunghena lesvaku yindlo ya mina yitala.

²⁴ Hikuva nili ka n'wina: Aku na munhu ni mun'we wa lavarhambiweke lweyi angatanampsa svakuja sva nkhuvu wa mina.’”

Ta kutshika hinkwasvu ulandza Yesu

²⁵ Xitshungu lexikulu axifamba na yena, kutani ahundzukula axilanguta, aku:

²⁶ “Loko mun'wana ata ka mina, kambe anga ni rhandzi kutlula tatana wa yena, ni mamana wa yena, ni nsati wa yena, ni vana, ni makwavu, hambi bzili vutomi bza yena, angakala angavi mujondzisiwa wa mina.

²⁷ Kutani lweyi angarhwaliki xihambanu xa yena anilandza, angesvikoti kuva mujondzisiwa wa mina.

²⁸ “Xana i mani xikarhi ka n'wina lweyi angarhangiki hi kutshama hansi loko alava kuyaka xihondzo, akonta lesvi angatahumesa svona, kuvona kumbe male ya yena yitaringana kuheta ntirho ke?

²⁹ Loko angayendlanga svosvo, atayaka masungulu ntsena, kutani sviyamutsandza kuheta; hinkwavu lavangatasvivona vatasungula kumuhleka, vaku:

³⁰ ‘Munhu lweyi asungulile kuyaka, kambe atsandzekile kuheta.’

³¹ “Kumbe hi yihi hosi leyihumaka yiya nyimpini kuyalwa ni hosi yin'wana, na yingarhanganga hi kutshama hansi, yivona lesvaku, xana masochwa ya yona ya khume wa makhulu (10 000) mangayalwa ni hosi leyi yitaka na yili ni masochwa ya makume mambirhi ya makhulu (20 000) ke?

³² Loko masochwa ya yona mangaringani, yitarhuma madoda ya yona kuyakombela matshamela ya kurhula ka nala wa yona na ahalikule.

³³ Kutani-ke mani na mani xikarhi ka n'wina lweyi angatshikiki lesvi anga na svona, angakala angakoti kuva mujondzisiwa wa mina.

Ta munyu lowopshama

³⁴ “Munyu i xilo lexonandziha, kambe loko wupshama, wutalungiwa hi yini ke?

³⁵ Awahapfuni nchumu, hambi kunonisa misava, kumbe kuhundzuka xiturumu; wucukumetiwa handle. Lweyi anga ni tindleve ta kuyingisa, aayingise!”