Luka 13 - Testamente Leyimpsha Xichangana

Ta kuhundzuka kumbe kulova

¹ Loko valikolaho, vanhu van'wana varungulela Yesu ta Vagalileya lava Pilato angapfanganyisa ngati ya vona ni timhamba ta vona.

² Kutani Yesu avahlamula aku: “Xana miyehleketa lesvaku Vagalileya volavo avali vajohi kutlula Vagalileya van'wana hinkwavu, lesvi vangatwisiwa kuvaviseka lokotano ke?

³ Ahihim, kambe nili ka n'wina: Loko mingahundzuki, mitalovisa xisvosvo hinkwenu.

⁴ Ni vanhu va khume ni ntlhanu ni vanharhu lava xihondzo xa Silowama xingavawela henhla, xivadlaya, xana miyehleketa lesvaku avali ni nandzu kutlula vayaki hinkwavu va Yerusalema ke?

⁵ Ahihim, kambe nili ka n'wina: Loko mingahundzuki mitalovisa xisvosvo hinkwenu.”

Ta xifaniso xa nkuwa wokala mihandzu

⁶ Atlhela avabzela xifaniso lexi aku: “Munhu wokarhi aali ni nkuwa lowusimekiweke nsin'wini ya yena ya mvhinya; ayalava mihandzu ka wona, kutani angayikumi.

⁷ Hi loko aku ka murimi: ‘Vona, sviyendla malembe manharhu na nili karhi nitatalava mihandzu nkuweni lowu, kutani ningayikumi. Wutseme! Wuwonhela yini misava xana?’

⁸ Kambe murimi amuhlamula aku: ‘Hosi, wutshike nan'waka ntsena, lesvaku nikuma nkarhi wa kuwurimela, ni wuchela ni vulongo;

⁹ kumbexana lembe leritaka wutaveka mihandzu; loko svingalitano, utani rhuma niwutsema.’”

Ta kuhanyisiwa ka xilema hi siku ra Savata

¹⁰ Yesu aajondzisa sinagogeni hi siku ra Savata.

¹¹ Akuli ni wansati kolaho lweyi aheteke malembe ya khume na ntlhanu na manharhu na akarhatiwa hi moya lowungamulimata miri; aakorhama kunene loko afamba, atsandzeka hambi kuli kuwololokanyana.

¹² Kutani loko Yesu amuvona, amuvitana aku: “Mamana, utshunxiwile kulimaleni ka wena.”

¹³ Hi loko atlhanteka mavoko ka yena, kutani hi nomo-lo awololoka, adzunisa Xikwembu.

¹⁴ Kambe murhangeli wa sinagoga ahlundzuka hi lesvi Yesu ahanyiseke munhu hi siku ra Savata, kutani atlakusa rito, aku ka xitshungu: “Ku ni masiku ya ntlhanu ni rin'we lawa mintirho yifanelaka kutirhiwa ha wona; tanani hi masiku wolawo kutahanyisiwa, kungali hi siku ra Savata.”

¹⁵ Kambe Hosi yimuhlamula yiku: “N'wina vakanganyisi, hi siku ra Savata, n'wina hinkwenu amichavi kutlhantla homu ya n'wina kumbe mbongolo ya n'wina, miya na yona matini.

¹⁶ Kutani wansati lweyi, wa rixaka ra Abrahamu, lweyi abohiweke hi Sathana hi malembe ya khume ni ntlhanu ni manharhu, xana aangafanelanga kutshunxiwa kubohiweni loku hi siku ra Savata ke?”

¹⁷ Marito lawa ya Yesu makhomise tingana ka valala va yena hinkwavu, kutani xitshungu hinkwaxu axitsakela mintirho hinkwayu leyosaseka leyi aayiyendla.

Ta xifaniso xa mbewu ya nsinapi ni ya comela

¹⁸ Yesu atlhela aku: “Xana Mfumu wa Xikwembu wufana ni yini? Nitawufanisa ni yini ke?

¹⁹ Wufana ni mbewu ya sinapi leyi munhu angayiteka, ayayibzala nsin'wini ya yena; kutani yimila, yihundzuka nsinya, kutani tinyanyana tita, titayaka marhavini ya wona.”

²⁰ Atlhela aku: “Xana Mfumu wa Xikwembu nitawufanisa ni yini?

²¹ Wufana ni comela leri wansati angariteka, aripfuva ni mimpimo yinharhu ya mapa, svikondza svikukumuka hinkwasvu.”

Ta nyangwa lowokhuma

²² Yesu aafamba hi madoropa ni svidoropana, ajondzisa, na akhome ndlela leyi yiyaka Yerusalema.

²³ Kutani mun'we aku ka yena: “Hosi, xana lavangataponisiwa, vatava vangatalanga ke?” Ahlamula aku ka vona:

²⁴ “Ringetani hi matimba kunghena hi nyangwa leyokhuma, hikuva namibzela lesvaku lavotala vatanavela kunghena, kambe vatatsandzeka.

²⁵ Loko n'winyi wa munti apfuka, ayapfala nyangwa, n'wina mingayima le handle, mitasungula kugongondza, miku: ‘Hosi, hipfulele!’ Kambe atamihlamula aku: ‘Anitivi lesvaku mihuma kwihi.’

²⁶ Kutani n'wina mitaku: ‘Ahitshama hija ni kunwa, na wena; ujondzisile mintsendzeleni ya svitaratu sva hina.’

²⁷ Yena atayengeta amihlamula aku: ‘Anitivi lesvaku mihuma kwihi; sukani ka mina, n'wina hinkwenu lavayendlaka lesvingalulamangiki.’

²⁸ Laho kutava ni minkosi ni kuketsela ka matinyo, loko mivona Abrahamu, na Izaki, na Yakobe na vatshamile Mfun'wini wa Xikwembu na vali ni vaprofeta hinkwavu, kasi n'wina micukumetiwile handle.

²⁹ Vatahuma vuxeni ni levupelajambu, n'walungwini ni ledzongeni, kutani vatatshama kujeni Mfun'wini wa Xikwembu.

³⁰ Nakona, van'wana lava vanga va le ndzhaku, vatava va le mahlweni, ni van'wana va le mahlweni, vatava va le ndzhaku.”

Ta Yesu loko arilela Yerusalema

³¹ Nkarhini wolowo kuta Vafarisi van'wana ka Yesu vaku: “Suka ufamba uya kun'wana, hikuva Heroda alava kukudlaya.”

³² Yesu ahlamula aku ka vona: “Fambani, miyabzela khanga leriya miku: ‘Svitive lesvaku, nihlongola madimoni ni kuhanyisa vanhu namuntlha ni mundzuku, kutani hi siku ra vunharhu nitaheta ntirho wa mina.’

³³ Kambe nifanele kufamba namuntlha, ni mundzuku, ni mundlwana, hikuva asviyendleki lesvaku muprofeta adlawela handle ka doropa ra Yerusalema.

³⁴ “Yerusalema, Yerusalema, wena lweyi udlayaka vaprofeta, lweyi ukhandlaka hi maribze lavarhumiweke ka wena; i kangani na navelile kuhlengeleta vana va wena, kukotisa huku loko yihlengeleta sviciwana sva yona hansi ka timpapa ta yona, kambe awusvilavanga.

³⁵ Vonani, munti wa n'wina wutasala na wungali na nchumu; nasvona namibzela lesvaku amingahanivoni, kukondza kufika siku leri mingataku: ‘Akudzunisiwe lweyi ata ka hi vito ra Hosi.’”