Luka 12 - Testamente Leyimpsha Xichangana

Ta kutivonela ka vukanganyisi

¹ Hi nkarhi wolowo, loko vanhu vamadzanadzana vahlengeletana vakondza vakandziyelana, Yesu asungula kubzela vajondzisiwa va yena aku: “Tivoneleni ka comela ra Vafarisi, anga vukanganyisi;

² hikuva aku na xilo lexifunengetiweke, lexingatakala xingafununguliwi, ni xilo xa xihundla, lexingatakala xingativiwi.

³ Hikolaho hinkwasvu lesvi misvivuleke munyameni, svitahumela kuvonakaleni; ni lesvi mingasvivulavula tindlwini hikuhlevetela, svitahuweleliwa svihlungweni sva tona.

Ta lweyi afanelaka kuchaviwa

⁴ “Namibzela n'wina minga vanghanu va mina nili: Mingatshukeni michava lavadlayaka miri, na valihava lesvi vangayengetaka vasviyendla kutlula svosvo.

⁵ Nitamikomba lweyi mifanelaka kuchava yena; chavani lweyi anga ni matimba yaku, ndzhaku ka kudlaya, anga ni matimba yolovisa munhu, amuhoxa Tiheleni. Ina, nili ka n'wina: Yena yelweyo, muchaveni!

⁶ “Xana svindzingiri sva ntlhanu asvixaviwi hi tisente timbirhi ke? Kasi aku na xin'we xa svona lexirivaliweke mahlweni ka Xikwembu.

⁷ Hambi yili misisi ya tinhloko ta n'wina yihlayiwile hinkwayu. Mingachaveni, mitlula svindzingiri lesvotala hi risima.

Ta kuvula Yesu mahlweni ka vanhu

⁸ “Namibzela lesvaku mani na mani lweyi anivulaka mahlweni ka vanhu, N'wana-wa-Munhu na yena atamuvula mahlweni ka tintsumi ta Xikwembu.

⁹ Kambe lweyi aniyalaka mahlweni ka vanhu, atayaliwa mahlweni ka tintsumi ta Xikwembu.

¹⁰ “Mani na mani lweyi angatajohela N'wana-wa-Munhu hi kuvulavula rito rokarhi ntsena, atarivaleliwa, kambe lweyi asandzaka Moya Lowokwetsima angakala angarivaleliwi.

¹¹ “Loko vamiyisa masinagogeni, ni ka tindhuna, ni ka tihosi, mingatshukeni mivilela miku: ‘Xana hitatihlamulela hi mukhuva wihi?’, kumbe: ‘hitavula yini ke?’

¹² Hikuva Moya Lowokwetsima wutamijondzisa hi nkarhi wolowo lesvi mifanelaka kusvivula.”

Ta xifaniso xa xipfundzi xo hunguka

¹³ Mun'we xikarhi ka xitshungu aku ka Yesu: “Mujondzisi, bzela makwerhu lesvaku hiyavelana rifuwo.”

¹⁴ Kambe Yesu aku ka yena: “Wanuna ndziwena! Xana i mani lweyi anganiveka muyavanyisi kumbe muyaveli henhla ka n'wina ke?”

¹⁵ Kutani aku ka vona: “Tlharihani mitivonela ka makwanga wahi ni wahi, hikuva vutomi bza munhu abzihumi ka svilo lesvi asvifuweke hambi loko svimutalele ngopfu.”

¹⁶ Kutani avabzela xifaniso aku: “Masimu ya munhu wa xipfundzi amapfunile svinene;

¹⁷ kutani ayanakanya mbilwini ya yena aku: ‘Nitayendla yini xana, hikuva a ni na ndhawu laha ningahlengeletaka kona antshovelo wa mina?’

¹⁸ Kutani aku: ‘Nitayendla lesvi: Nitahahlula matshala ya mina, ni makulisa, kutani nitahlengeleta ntshovelo wa mina ni rifuwo ra mina hinkwaru kona;

¹⁹ kutani nitabzela hika ra mina niku: Hika ra mina kateka, u ni svilo lesvotala, lesvihlengeleteliweke hi malembe layotala; wisa, uja, unwa, utsaka.’

²⁰ Kambe Xikwembu xiku ka yena: ‘We xihunguki! Vusiku bzobzi, utatekeliwa moya wa wena; kutani lesvi usvilungiseke svitava sva mani xana?’”

²¹ Yesu aheta hi kuvula lesvi: “Svitano ni ka lweyi atihlengeletelaka xuma, kambe angafuwanga ka Xikwembu.”

Ta kuvilela ni kukanakana

²² Kutani Yesu aku ka vajondzisiwa: “Hikolaho ninge ka n'wina: Mingatshukeni mivilela hi sva vutomi bza n'wina lesvaku mitaja yini, hambi kuli kuvilela hi sva miri lesvaku mitayambala yini.

²³ Vutomi bzitlula svakuja, ni miri wutlula sviyambalu.

²⁴ Yanakanyani amaqhugwana: Amabzali, amatshoveli, ama na tshala kumbe xihlangala, hikuva Xikwembu xamaphamela. Kutani n'wina, mi ni risima rotlula ngopfu tinyanyana!

²⁵ Xana i mani ka n'wina lweyi angayengetelelaka xisungunhu xin'we ka xiyimu xa yena hi kuvilela ka yena ke?

²⁶ Lesvi ke, mitsandzeka kuyendla svilonyana sva svitsanana, mivilelela yini lesvi svin'wana?

²⁷ Langutani hilaha sviluva svimilaka hakona: Asvitirhi, asviluki; kambe namibzela lesvaku hambi ali Solomoni vukosini bza yena hinkwabzu, angayambalanga tani hi xin'we xa svona.

²⁸ Kutani lesvi Xikwembu xiyambexaka hi ndlela leyi bzanyi lebzi bzingakona namuntlha nhoveni, kasi mundzuku bzitahoxiwa ndzilweni, xana axingemiyambexi kutlulisa svosvo, n'wina vanhu va kupfumela lokutsongo ke?

²⁹ Hikolaho mingavileleni hi lesvi mingataja svona, ni lesvi mingatanwa svona, na svona, mingakanakaneni;

³⁰ hikuva svilo svosvo hinkwasvu svilaviwa hi vamatiko; Tatana wa n'wina wa svitiva lesvaku masvipfumala.

³¹ Kambe lavani ngopfungopfu Mfumu wa yena, kutani svilo lesvi mitayengeteleliwa svona.

Ta rifuwo ra le matilweni

³² “Ungachavi wena ntlhambinyana, hikuva Tatana wa n'wina atsakele kuminyika Mfumu.

³³ Xavisani lesvi misvifuweke, minyika svisiwana; tiyendleleni minkwama leyingahlakaliki ni rifuwo leringaheliki matilweni, laha muyivi angatshineliki kusuhi nakona, ni laha tinsumba tingawonhiki kona;

³⁴ hikuva laha rifuwo ra n'wina ringa kona, hilaha timbilu ta n'wina tingatava kona na tona.

Ta malandza lawa mahitekaka

³⁵ “Tshamani na mitikhamile svivunu ni tivoni ta n'wina na tilumekiwile,

³⁶ mifana ni vanhu lavalangutelaka n'winyi wa vona, siku leri avuyaka nkhubzeni wa vukati, lesvaku loko afika ni loko agongondza, vatahantlisa vamupfulela.

³⁷ Kukatekile malandza lawa n'winyi wa wona angatamakuma na marindzile, siku leri avuyaka! Nitiyisile nili ka n'wina: Atatikhama, amatshamisisa kujeni, amaphamela.

³⁸ Ni loko afika nivusiku ka murindzo wa vumbirhi kumbe wa vunharhu, kutani amakuma na mahitekise xisvosvo, malandza wolawo matava makatekile.

³⁹ Kambe tivani lesvaku: Loko n'winyi wa munti onge aativile nkarhi lowu muyivi angatata ha wona, ina angatshikanga yindlo ya yena yitlhanyiwa.

⁴⁰ Na n'wina, tshamani na mitilungisile, hikuva N'wana-wa-Munhu atata hi nkarhi lowu mingawu yehleketiki.”

Ta malandza lawa matshembekaka ni lawa mangatshembekiki

⁴¹ Kolaho Petrosi aku ka yena: “Hosi, xana ukongoma hina hi xifaniso lexi, kumbe xana ukongoma vanhu hinkwavu ke?”

⁴² Yesu ahlamula aku: “Xana i mani mulanguteli lweyi atshembekeke ni kululama, lweyi Hosi yimuvekeke lesvaku anyika svakuja svoringana ka vatirhi va yona?”

⁴³ Akatekile mutirhi lweyi angatakumiwa hi Hosi na ali karhi ayendla tano.

⁴⁴ Nitiyisile nili ka n'wina: Atavekiwa kuva mulanguteli wa svilo hinkwasvu sva n'winyi wa yena.

⁴⁵ Kambe loko mutirhi yelweyo ayehleketa mbilwini ya yena, aku: “N'winyi wa mina wahlwela kufika”, kutani asungula kuba vatirhikulobze vaxinuna ni vaxisati, aja, anwa, adakwa,

⁴⁶ n'winyi wa yena atavuya, hi siku leri mutirhi angamurindziki ha rona, nasvona hi nkarhi lowu angawutiviki. Kutani n'winyi wa mutirhi lweyi atamuba svinene, amucukumeta svin'we ni lavangatshembekangiki.

⁴⁷ Mutirhi lweyi ativaka kurhandza ka n'winyi wa yena, kutani angalungisi nchumu, angayendli kurhandza ka n'winyi wa yena, atabiwa ngopfu;

⁴⁸ kambe lweyi angativiki kurhandza ka n'winyi wa yena, kutani atshuka ayendlile lesvifaneliwaka hi xikhatiso, atabiwa kutsongo. Mani na mani lweyi anyikiweke lesvotala, kutalaviwa lesvotala ka yena; ni lweyi atshembiweke ka lesvotala, kutalaveka lesvotala ngopfu ka yena.

Ta kuyavana loku kupfuxiwaka hi Yesu

⁴⁹ “Nitile kutahoxa ndzilo laha misaveni, kutani anitarhandza ngopfu lesvaku wupfurha ni svosvi!”

⁵⁰ Kambe ni ni nkhuvulo lowu nifanelaka kukhuvuliwa ha wona, kutani ni le kukarhatekeni lokukulu, kukondza nkhuvulo lowu wuhetiseka.

⁵¹ Xana miyehleketa lesvaku nitisa kurhula la misaveni ke? Ahihim! Nili: Kungali kurhula kambe kuyavana.

⁵² Hikuva kusukela svosvi vanhu va ntlhanu va njangu wun'we vatayavana, vanharhu vatalwa ni lavambirhi, lavambirhi valwa ni lavanharhu.

⁵³ “Tatana atayavana ni n'wana wa yena wa xinuna, n'wana waxinuna ayavana ni tatana wa yena; mamana atayavana ni n'wana wa yena wa xisati, ni n'wana waxisati ayavana ni mamana wa yena; mamana wa nuna atayavana ni n'wingi wa yena, n'wingi ayavana ni mamana wa nuna.”

Ta kuxiya minkarhi

⁵⁴ Kutani aku ka xitshungu: “Loko mivona refu rihuma mpelajambu, mihantla miku: ‘Mpfula yitana!’ Kutani sviva tano.

⁵⁵ Ni loko moya wuhunga wuta hi le dzongeni, mili: ‘Kutahisa!’ Kutani sviva tano.

⁵⁶ Vakanganyisi ndzin'wina! Mitiva kuxiya matshamela ya tilo ni ya misava; xana hikolaho ka yini mingakoti kutwisisa nkarhi lowu minga ka wona ke?

Ta kuvuyelela ni nala wa wena

⁵⁷ “Hikolaho ka yini mingayanakanyi lesvilulameke hi n'wexe xana ke?

⁵⁸ Loko uya hosini ni nala wa wena, ringeta hi matimba hinkwawu kuheta mhaka na yena na mahali ndleleni; loko svingalitano, atakuyisa ka muyavanyisi, muyavanyisi yena akunyiketa ka phoyisa, kutani phoyisa rikunghenisa jele.

⁵⁹ Nili ka wena: Ungakala ungahumi kona, loko ungasihakela male hinkwayu.”