Luka 10 - Testamente Leyimpsha Xichangana

Ta kurhumiwa ka vajondzisiwa va ntlhanu wa makume ni makume mambirhi ni vambirhi (72)

¹ Ndzhaku ka svosvo Hosi yitlhela yirhuma van'wana va ntlhanu wa makume ni makume mambirhi ni vambirhi (72) yivarhuma ha vambirhi-mbirhi, lesvaku varhangela mahlweni, madoropeni hinkwayu ni hinkwaku lomu yiyanakanyaka kuhundza hi kona.

² Yiku ka vona: “Kutshovela i kukulu, kambe vatirhi avatalanga; hi kolaho, khongelani n'winyi wa ntshovelo lesvaku arhuma vatirhi kutshoveleni ka yena.”

³ Fambani ke; masvivo na mirhuma, mifana ni svinyempfana xikarhi ka mahlolwa.

⁴ Mingatekeni xinkwamana xa male, kumbe nkwama wa timbuva, kumbe masandhazi; mingaxeweteni munhu ndleleni

⁵ Muntini wihi ni wihi lowu mingatanghena ka wona, rhangani miku: “Kurhula akuve ni njangu lowu!”

⁶ Kutani loko munhu worhula ali kona kolaho, kurhula ka n'wina kutava ka yena; kambe loko svingalitano, kutatlhelela ka n'wina.

⁷ Tshamani muntini wolowo, mija ni kunwa lesvi vaminyikaka svona, hikuva lweyi atirhaka alulameliwe hi hakelo ya yena. Mingafambeni hi munti ni munti.

⁸ “Loko minghena doropeni, kutani vanhu vakona vamiyamukela, janani lesvi vekiwaka mahlweni ka n'wina;”

⁹ hanyisani timbabzi takona, miku ka tona: “Mfumu wa Xikwembu wutshinelile ka n'wina.”

¹⁰ Kambe loko minghena doropeni rin'wana kutani vangami ya mukeli, loko mili karhi mihuma hi svitaratu sva rona, vulani miku:

¹¹ “‘Hambi ntshuri wa doropa ra n'wina lowu wuhinamarheleke milenge, hawugungundza wusala na n'wina; hambi svilitano, tivani lesvaku Mfumu wa Xikwembu wutshinelile ka n'wina.’”

¹² Namibzela lesvaku Sodoma atavevukiseliwa kutlula doropa rolero hi siku ra kuyavanyisa.

Ta kutshinyiwa ka madoropa lawa mangahundzukiki

¹³ “U ni khombo, wena Korazini, na wena Betisayida, hikuva mahlori lawa mayendliweke ka n'wina loko onge mayendliwile le Tiro na Sidoni, ingi madoropa lawaya amatava mahundzukile khale, mayambala sviyambalu svokhwaxa, matshama nkumeni.”

¹⁴ Ni svosvi madoropa ya Tiro na Sidoni matavevukiseliwa kutlula n'wina hi siku ra kuyavanyisa.

¹⁵ Na wena Kapernawume: “‘Xana utatlakusiwa kuyafika tilweni ke? Ahihim, utatsongahatiwa kuyafika Tiheleni.’

¹⁶ “Lweyi ayingisaka n'wina, wa niyingisa mina; ni lweyi amiyalaka, wa niyala. Lweyi aniyalaka, ayala ni Lweyi anirhumeke.”

Ta kuvuya ka vajondzisiwa va ntlhanu wa makume ni makume mambirhi ni vambirhi (72)

¹⁷ Lava va ntlhanu wa makume ni makume mambirhi ni vambirhi (72) vavuya hi kutsaka, vaku: “Hosi, na wona madimoni mahiyingisa, loko hitirhisa vito ra wena.”

¹⁸ Yesu aku ka vona: “Nivonile Sathana, awa hi le tilweni kufana ni rihati.

¹⁹ Vonani, ni minyika matimba ya kukandziyela tinyoka ni tihume, ni ya kuhlula ntamu hinkwawu wa Nala; kutani aku na nchumu lowungatamivavisa.

²⁰ hambi svilitano, mingatsakeni hi lesvi mimoya yimiyingisaka; kambe tsakani hi lesvi mavito ya n'wina matsaliweke tilweni.”

Ta Yesu loko atala hi kutsaka

²¹ Nkarhini wolowo Yesu adzunisa hi matimba ya Moya Lowokwetsima, aku: “Naku khensa Tatana, Hosi ya tilo ni misava, hikuva timhaka leti, utifihlile ka tintlhari ni ka lavajondzeke, kambe utikombisa ka svivanana lesvitsongo. Ina, Tatana, hikuva loku kuvile kurhandza ka wena.

²² “Tatana avekile svilo hinkwasvu mavokweni ya mina; kutani aku na lweyi ativaka lesvaku N'wana i mani, loko angali Tatana; nasvona aku na lweyi ativaka Tatana lesvaku i mani, loko angali N'wana, ni lweyi N'wana alavaka kuhlavutela Tatana ka yena.”

²³ Kutani ahundzukula alanguta vajondzisiwa va yena, aku ka vona hi le tlhelweni: “Makatekile mahlo lawa mavonaka lesvi misvivonaka!

²⁴ Hikuva namibzela lesvaku vaprofeta lavotala ni tihosi letotala, vanavelile kuvona lesvi misvivonaka, kambe avasvivonanga; hambi kuli kutwa lesvi misvitwaka, avasvitwanga.”

Xifaniso xa Musamariya wa musa

²⁵ Kutani mujondzisi mun'we wa Nawu atatamuringa aku: “Mujondzisi, nitayendla yini kukuma vutomi lebzingaheliki?”

²⁶ Yesu aku ka yena: “Kutsaliwile yini Nawini? Ujondza yini kona?”

²⁷ Ahlamula aku: “‘Rhandza Yehovha Xikwembu xa wena, hi mbilu ya wena hinkwayu, ni moya wa wena hinkwawu, ni matimba ya wena hinkwawu, ni kuyanakanya ka wena hinkwaku.’ Nasvona: ‘Rhandza munhu kuloni kukota loko utirhandza.’”

²⁸ Yesu aku ka yena: “Uhlamule svona, yendla svosvo, utahanya.”

²⁹ Kambe yena, hi kunavela kutiyendla lweyi alulameke, aku ka Yesu: “Munhu kuloni i mani xana?”

³⁰ Kutani Yesu ahlamula, aku: “Munhu wokarhi aangirimela hi le Yerusalema, aya Yeriko, kutani awela mavokweni ya svigevenga, svimuhlivila xiyambalu, svimuba, kutani svisuka svifamba, svimusiya na ali kusuhi ni kufa.

³¹ Kutani kotshuka kuhumelela Muprista, angirimela hi ndlela yoleyo; loko amuvona, apapalata.

³² Kutafika Mulevhi kolaho, kutani loko amuvona, na yena apapalata.

³³ Kambe Musamariya mun'we lweyi na yena aali riyendzweni, afika laha munhu lweyi angawa kona; loko amuvona, amutwela vusiwana,

³⁴ ata kusuhi na yena, amuchela mafurha ni vhinyu timbangeni abohelela, amugadisa ka xifuyu lexi aafamba hi xona, amuyisa ndlwini ya vayendzi, kutani amuhlayisa kona.

³⁵ Nimixo ahumesa madenari mambirhi, anyika n'winyi wa yindlo, aku ka yena: ‘Muhlayise; hinkwasvu lesvi ungatasvihumesa kutlula male leyi, nitakutlhelisela svona, loko nivuya.’

³⁶ Hi kuvona ka wena, xana i mani, ka lavanharhu lava, lweyi angava munhukulobze wa munhu lweyi aweleke mavokweni ya svigevenga xana?”

³⁷ Yena aku: “Hilweyi amuyendleleke timpsalu.” Yesu aku ka yena: “Famba, uyayendlisa svosvo na wena.”

Ta Yesu loko ayendzela Marta na Mariya

³⁸ Loko Yesu ali karhi ahundzela mahlweni ni vajondzisiwa, anghena xidoropanini xin'wana, kutani wansati lweyi avaku i Marta, amuyamukela njangwini wa yena.

³⁹ Marta aali ni makwavu, lweyi avaku i Mariya, lweyi angatatshama milengeni ya Hosi, ayingisa marito ya yona.

⁴⁰ Kambe Marta aakhomekile ngopfu hi mintirho yolungisela vapfhumba; hi loko ata ka Yesu, aku: “Hosi, xana ahi nchumu ka wena loko makwerhu anitshika nitirhela vapfumba nilinoxe ke? Mubzele anipfuna.”

⁴¹ Kambe Hosi yimuhlamula, yiku: “Marta, Marta, uvilela ni kutikarhata hi lesvotala;

⁴² kasi xilo lexilavekaka ngopfu i xin'we ntsena, kutani Mariya atihlawulele kuyaveliwa lokunene, loku angatakala angatekeliwi kona.”