Filemoni 1 - Testamente Leyimpsha Xichangana

Kuxeweta

¹ Pawulo mubohiwa hikolaho ka Kriste Yesu, ni makwerhu Timotewu, ka Filimoni lweyi arhandzekaka ni mupfuni wa hina,

² na yena makwerhu Afiya na Arkipo, mutirhikulorhi kulweni, ni ka Kereke leyi yinga muntini wa wena,

³ timpsalu ni kurhula asvive ka n'wina hinkwenu hi tlhelo ra Xikwembu, Tatana wa hina ni ra Hosi Yesu Kriste.

Ta vumboni bza Pawulo

⁴ Nikhensa ka Xikwembu xa mina, na nili karhi nikuyanakanya nkarhi hinkwawu mikhongelweni ya mina,

⁵ na nili karhi nitiyile hi ta rirhandzu ni kupfumela loku unga nakona ka Hosi Yesu ni ka vakwetsimi hinkwavu,

⁶ lesvaku kupfumela ni vuhlengeli bza wena na hina bziva lebzi bzihetisekeke kutiveni ka hinkwasvu lesvi svinga svinene ka hina mayelanu na Kriste.

⁷ Hikuva makwerhu, nivile ni kutsaka svinene ni kukufumela hikolaho ka rirhandzu ra wena, hikuva atimbilu ta vakwetsimi tipfuxiwile hikolaho ka wena.

Ta Pawulo loko akombelela Onezimo

⁸ Hikolaho, hambi loko mina nititwa na nitshunxekile hikolaho ka Kriste akuva nikurhuma lesvi svifanelaka,

⁹ svayampsa akuva nikukombela hikolaho ka rirhandzu, ni lesvi ninga xikoxa, nasvona ninga mubohiwa ka Yesu Kriste.

¹⁰ Ina, nikukombela hi vito ra n'wana wa mina Onezimo lweyi ningahundzuka tatana wa yena, svosvi ninga jele,

¹¹ yena lweyi le ndzhaku aangapfuni nchumu; kambe svosvi anga xipfunu ka mina na wena.

¹² Mina nimutlhelisela ka wena, tani hi mbilu ya mina hinkwayu.

¹³ Mina anilava kutshama na yena lesvaku anitirhela laha jele ninga kona, asiva wena na nili karhi nibohiwile hikolaho ka Evhangeli.

¹⁴ Hambi svilitano kuhava lexi ningaxiyendlaka na ningatwanananga na wena lesvaku akurhandza ka wena kungahundzuki ingi hi loko wosindzisiwa, kambe kuva hi kurhandza ka wena.

¹⁵ Hikuva nikholwa lesvaku yena asukile ka wena hi nkarhinyana, lesvaku utamuyamukela hilaha kungaheliki,

¹⁶ Kungali kufana ni xikarawa; kambe kutlula xikarawa, muyamukele kufana ni makwerhu lweyi arhandzekaka, ngopfungopfu ka mina hi ntiyiso, ni ka wena, angava hi vumunhu, angava Hosini.

¹⁷ Loko unixixima kufana ni mutirhikuloni muyamukele, kufana ni loko uyamukela mina ha noxe.

¹⁸ Loko akuyivelile svokarhi, kumbe loko a ni xikweneti xokarhi svitsale, hinkwasvu ka nandzu wa mina.

¹⁹ Mina Pawulo, hi xiyandla xa mina ha noxe nakutsalela, nili: “Nitakuhakela!” Akuva ningakulumbeti lesvaku wena hi wexe, u ni xikweneti na mina.

²⁰ Ina makwerhu, aniyamukele ntsakiso ka wena ni ka Hosi. Nyika kutsaka ka mbilu ya mina ha Kriste.

²¹ Hikuva natshemba lesvaku wayingisa, mina nakutsalela, na nili karhi nisvitiva lesvaku utayendla hi kuhundzisa ka lesvi nikukombelaka svona.

²² Nasvona, nilungisele yindlo yotshama ka yona, hikuva ni ni kulangutela ka lesvaku hikolaho ka mikhongelo ya n'wina nitatshunxiwa nivuyela ka n'wina.

Marito yohetelela

²³ Wakurungula Epafrasi, mubohiwa svin'we na mina ka Yesu Kriste;

²⁴ svitano na Marka, Arixtarko, na Demasi, na Luka, vatirhikulorhi: Na vona vakurungula.

²⁵ Atimpsalu ta Hosi Yesu Kriste ative ni mimoya ya n'wina.