3 Yohane 1 - Testamente Leyimpsha Xichangana

Kuxeweta

¹ Mina mukulukumba nitsalela wena Gayo murhandziwa, lweyi mina nimurhandzaka hi ntiyiso.

² Murhandziwa, ninavela kuva ukateka timhakeni hinkwatu, nasvona uva ni vutomi, uva lweyi atsakeke svinene mirini; nasvitiva lesvaku moya wa wena wutsakile.

³ Hakunene nitsakile ngopfu loko vamakwerhu lava vateke koseyo vavekile vumboni henhla ka ntiyiso wa wena ni lesvi uhanyisaka xisvona ntiyisweni.

⁴ Loko nitwa lesvaku vana va mina vahanya ntiyisweni, ka mina aku na kutsaka kun'wana loku kutlulaka koloko.

Ta kukhensiwa ka Gayo

⁵ Murhandziwa, ukomba kutshembeka ka wena ka hinkwasvu lesvi usviyendlaka, loko upfuna vamakwenu, ngopfungopfu ni lava ungavativiki.

⁶ Vapfhumba lava hi vona vavuleke vumboni bza rirhandzu ra wena mahlweni ka vanhu va kereke. Utava uyendla svona loko uvalongelela timbuva ta vona, hilaha svifanelaka hakona mahlweni ka Xikwembu.

⁷ Hikuva hi vito ra xona vahumile makaya ya vona, na vangatekanga nchumu ka vamatiko.

⁸ Hikolaho, svahifanela kuyamukela vanhu votanu, lesvaku hitava lava hitirhisanaka na vona ntiyisweni.

Ta Diyotrefa na Demetriyo

⁹ Nitsalela kereke timhaka tin'wana, kambe Diyotrefa, lweyi arhandzisaka kuva worhanga xikarhi ka vona, angahiyamukeli.

¹⁰ Hikolaho, loko nita, nitapaluxa lesvi asviyendlaka, hikuva wahihleva hi timhaka tobiha. Handle ka svona svosvo, ayala ni kuyamukela vamakwerhu, atlhela asivela lava vanavelaka kuvayamukela, avahlongola ni le kerekeni.

¹¹ Murhandziwa, ungatekeleli mikhuva leyi yobiha, kambe tekelela leyi yosaseka. Lweyi ayendlaka lesvinene i wa Xikwembu; kambe lweyi ayendlaka lesvobiha angavonanga Xikwembu.

¹² Vanhu hinkwavu vanyika vumboni lebzinene ha Demetriyo; kunene svosvo i ntiyiso hi xiviri; na hina hiveka vumboni bza svona kutani wasvitiva lesvaku vumboni bza hina i bza ntiyiso.

Marito yohetelela

¹³ Anili ni svinyingi svokutsalela, ntsena anilavi kukutsalela na nitirhisa tinta ni risiva.

¹⁴ Kambe, nitshemba lesvaku nitahantla nikuvona kungali khale, kutani hitavulavula hi milomo, na hi vonana.

¹⁵ Kurhula akuve na wena.Vanakulorhi hinkwavu vakurungula. Rungula vanakulorhi hinkwavu hi mavito ya vona.