2 Vatesalonika 3 - Testamente Leyimpsha Xichangana

Hikhongeleleni!

¹ Kuheteleleni vamakwerhu, hikhongeleleni, lesvaku Rito ra Hosi rihangalaka hi kuhantlisa, ritsakeliwa, kukotisa lesvi riyendliseke svona le ka n'wina;

² lesvaku hilamuleliwa ka vanhu lavobiha, lavokala vangalulamanga; hikuva ahi hinkwavu lavanga ni kupfumela.

³ Kambe Hosi yatshembeka: Yitamitiyisa ni kumisirhelela ka lweyi wobiha.

⁴ Kutani Hosi yihinyika kutshemba hi tlhelo ra n'wina, lesvaku svilo lesvi himibzeleke svona, mikarhi misviyendla, ni lesvaku mahatasviyendla.

⁵ Ingi Hosi yingasusumeta timbilu ta n'wina, lesvaku mixirhandza, ni lesvaku michivirikela Kriste.

Chavani vulolo!

⁶ Hamileleta vamakwerhu, hi vito ra Hosi Yesu Kriste, lesvaku mihambana ni makwenu wihi ni wihi lweyi angalaviki kutirha, lweyi angafambiki hi tijondzo leti himinyikeke tona.

⁷ Hikuva n'wina hi n'wexe masvitiva svinene lesvaku mifanele kutekelela mahanyela ya hina; ahitshamanga hi mavoko, loko hili xikarhi ka n'wina;

⁸ na svona, ahijanga svakuja sva munhu mahala, kambe hitirhile vusiku ni nhlekanhi, hibalha nyuku ni kutikarhata, lesvaku hingatikiseli munhu ni mun'we xikarhi ka n'wina.

⁹ Asvihlayi lesvaku ahipfumala matimba ya kumikombela kuhipfuna, kambe akuli kumikomba ndlela leyi mifaneleke kufamba hi yona.

¹⁰ Hikuva loko hahali na n'wina, himinyikile xileriso lexinge: “Mun'wana ni mun'wana lweyi angalaviki kutirha, ni kuja angaji!”

¹¹ Hihlaya lesvi hikuva hitwile lesvaku ku ni van'wana xikarhi ka n'wina lavahanyaka hi vulolo, vangalaviki kutirha, kambe vanghenelela timhaka ta van'wana.

¹² Kutani vanhu va kufana ni lavo havarhuma ni kuvatsundzuxa hi vito ra Hosi Yesu Kriste, lesvaku vatirha ntirho wa vona hi kurhula, vatakota kuja svakuja lesvinga sva vona.

¹³ Kambe n'wina vamakwerhu, loko mili karhi miyendla lesvinene, mingakarhaleni.

¹⁴ Loko kuli ni mun'we lweyi ayalaka kuyingisa marito lawa hi mirhumelaka wona hi papela leri, mulangutiseni, kutani mingaveneni ni mhaka na yena, lesvaku atakhomiwa hi tingana.

¹⁵ Hambi svilitano, mingamulanguteni tani hi nala, kambe mulayeni tani hi makwenu.

Ta marito yohetelela

¹⁶ Svosvi-ke, Hosi ya kurhula, hi yoxe, ayiminyike kurhula minkama hinkwayu ni le matlhelweni hinkwawu. Hosi ayive na n'wina hinkwenu!

¹⁷ Hi xiyandla xa mina nitsala lesvi nili: “Namirungula. Hi mina Pawulo.” Hi wona mfungu wa mina apapeleni rin'wana ni rin'wana ra mina; hi svona lesvi nitsalisaka svona.

¹⁸ Timpsalu ta Hosi ya hina Yesu Kriste, ative na n'wina hinkwenu!