2 Vatesalonika 2 - Testamente Leyimpsha Xichangana

Ta munhu lweyi wohomboloka

¹ Loko tili ta kuvuya ka Hosi ya hina Yesu Kriste, ni ta kuhlengeletana ka hina, hiya ka yena, hamikombela hi matimba vamakwerhu:

² Mingatshukeni mikanakanisiwa timbilwini ta n'wina, ni kutshukisiwa, hambi kuli hi moya wun'wana, kumbe hi kuvulavula kun'wana, kumbe hi papela rin'wana leri ringavuliwaka lesvaku rihuma ka hina, kutiyisa lesvaku siku ra Hosi rifikile svosvi.

³ Mingakanganyisiweni hi munhu nikutsongo, hikuva siku rakona aringati, loko kungasita kulahleka lokukulu, ni loko kungasihumeseliwa rivaleni munhu lweyi wohomboloka, n'wana wa kulahleka.

⁴ Munhu lweyi alwa ni hinkwasvu lesvihlayiwaka lesvaku svi ni vukwembu, kumbe lesvigandzeliwaka, kutani atikulisa henhla ka svona, akondza ayatshama Tempeleni ya Xikwembu, na ali karhi atihlaya lesvaku yena hi yena Xikwembu.

⁵ Xana amitsundzuki lesvaku, loko nahali na n'wina, anitala kumibzela timhaka leto ke?

⁶ Kutani mitiva lexi xisivelaka munhu lweyi wohomboloka kuta svosvi, kuyendlela lesvaku ahumeseliwa rivaleni, loko nkama wa yena wutava wufikile.

⁷ Hakunene, kuhomboloka loku kutifihlaka ku le kutirheni ni svosvi; kambe lweyi akusivelaka kutikomba ataya mahlweni akusivela, kukondza asusiwa.

⁸ Kutani hi kona munhu lweyi wohomboloka angatahumeseliwa rivaleni, kutani Hosi Yesu atamudlaya hi moya lowuhumaka non'weni wa yena, amuhelisa hi kukwetsima ka yena, siku leri avuyaka.

⁹ Loko munhu lweyi wohomboloka ahumelela hi matimba ya Sathana, atayendla masingita ya tinxakaxaka, ni svikombiso sva mavunhwa, ni svihlamaliso;

¹⁰ atatirhisa tindlela hinkwatu letobiha ta vukanganyisi henhla ka lavayaka kulahlekeni, vanga lava vangayamukelangiki ntiyiso hikuva avangawurhandzi, vayala ni kuponisiwa.

¹¹ Hikolaho, Xikwembu xivarhumela moya wa kutikanganyisa lokukulu, lesvaku vapfumela lesvi svinga mavunhwa.

¹² Kuhela ka svona hi lesvaku hinkwavu lavakalaka vangayamukelanga ntiyiso, vanga lava vatsakeleke tindlela letobiha, vatayavanyisiwa.

Ta kuhlawuleliwa kuponisiwa

¹³ Svahifanela kukhensa Xikwembu masiku hinkwawu hikolaho ka n'wina vamakwerhu, n'wina lava Hosi yimirhandzaka, hikuva Xikwembu ximihlawulile lesvaku miva lavorhanga kuponisiwa, hi Moya lowumiyendlaka lavabaseke, ni kupfumela ka n'wina ka ntiyiso.

¹⁴ Xikwembu ximivitanele svona hi Evhangeli leyi himitiviseke yona, lesvaku miyaveliwa kukwetsima ka Hosi ya hina Yesu Kriste.

¹⁵ Hikolaho, vamakwerhu, yimani mitiya, minamarhela timhaka leti himijondziseke tona hi nomo, kumbe hi papela.

¹⁶ Svosvi-ke, ingi Hosi ya hina Yesu Kriste hi yoxe, ni Xikwembu Tatana wa hina lweyi angahirhandza, lweyi angahinyika, hi timpsalu ta yena, kuchavelela lokungaheliki ni kulangutela lokunene,

¹⁷ vangatiyisa timbilu ta n'wina, vaminyika matimba ya kuyendla ni kuvulavula hinkwasvu lesvinga svinene.