2 Vatesalonika 1 - Testamente Leyimpsha Xichangana

Kuxeweta

¹ Mina Pawulo na Silvhano na Timotewu ka va kereke ya le Thesalonika, lavanga vanhu va Xikwembu Tatana wa hina, ni va Hosi Yesu Kriste, hili:

² Timpsalu ni kurhula asvive na n'wina, svihuma ka Xikwembu Tatana, ni ka Hosi Yesu Kriste!

Ta kuyavanyisiwa, siku leri Kriste angatavuyaka

³ Svahifanela kukhensa Xikwembu masiku hinkwawu hikolaho ka n'wina, vamakwerhu. Hakunene svafanela svosvo, hikuva kupfumela ka n'wina kuya mahlweni kukula ngopfu, ni kurhandzana ka n'wina hinkwenu kuya kuyengeteleka.

⁴ Hikolaho, hina hi hexe, hi tikulisa ha n'wina tikerekeni ta Xikwembu, hi mhaka ya kutiyisela ka n'wina ni kupfumela ka n'wina, xikarhi ka maxangu ni mahlomulu hinkwawu lawa mimavonaka.

⁵ Lesvi i xikombiso xa kululama ka Xikwembu loko xiyavanyisa, hikuva svitayendla lesvaku miva lavalulameliweke hi Mfumu wa xona, lowu mixanisiwaka hikolaho ka wona.

⁶ Xikwembu xitayendla lesvilulameke: Xitaba lava vamixanisaka, xivavangela kuxaniseka,

⁷ kutani xitaminyika kuhumula svin'we na hina, n'wina mixanisiwaka; xitayendla svosvo siku leri Hosi Yesu ahumelelaka hi le tilweni, svin'we ni tintsumi ta yena ta matimba

⁸ malangavini ya ndzilo. Xitaba lava vangaxitiviki, vanga lava vangayingisiki Evhangeli ya Hosi ya hina Yesu.

⁹ Vanhu lava vatayavanyisiwa hi kuyisiwa kuwonhekeni lokungaheliki, ni nghohe ya Hosi avangayivoni, hambi mali matimba ya yona layokwetsima.

¹⁰ Hi siku rakona, loko Hosi yitela kutadzunisiwa xikarhi ka vahlawuliwa va yona, ni kuvoniwa hi vapfumeli hinkwavu, na n'wina mitava kona, hikuva vumboni lebzi mibzikumeke ka hina, mibzitwisisile.

¹¹ Hikolaho, ha mikhongelela nkama hinkwavu; hikombela lesvaku Xikwembu xa hina ximiyendla lavafaneliwaka hi vutomi lebzi xingamivitanela bzona, xihetisa, hi matimba ya xona, makungu hinkwawu ya n'wina lamanene, ni mintirho hinkwayu ya kupfumela ka n'wina.

¹² Hi ndlela leyi, vito ra Hosi ya hina Yesu ritadzunisiwa ka n'wina, na n'wina ka yena, hi timpsalu ta Xikwembu xa hina, ni ta Hosi Yesu Kriste.