2 Vakorinto 9 - Testamente Leyimpsha Xichangana

Ta xipfunu ka vahlawuliwa va Xikwembu

¹ Hi tlhelo ra xipfunu lexihumeseliwaka vahlawuliwa va Xikwembu, kungava kuheta nkama loko nimitsalela hi ta xona.

² Nitiva lesvaku minavela svinene kupfuna; kutani nitidzunisile ka va le Makedoniya hikolaho ka kunavela ka n'wina loku; nivabzelile lesvaku va le Akaya avali karhi vatilungisela kupfuna kusukela n'wexemu. Kutani kutikarhata ka n'wina kunyikile matimba lavotala va vona.

³ Nirhumela vamakwerhu, vatavona ha voxe lesvaku kutidzunisa ka mina hikolaho ka n'wina mhakeni leyi ahi mahungundlela, i ntiyiso. Nilava lesvaku mitshama na mitilungisile, kufana ni lesvi ningahlaya lesvaku milungile.

⁴ Hikuva loko van'wana va le Makedoniya vangatshuka vatile na mina, kutani vakuma lesvaku amitilungisanga, ahi hina ntsena lavangatakhomiwa hi tingana, kambe na n'wina mitava ni tingana, hi mhaka ya kutitshemba kutlula mpimo.

⁵ Hikolaho niyanakanyile lesvaku svafanela kukombela vamakwerhu kuta koseyo, vanirhangela mahlweni, vatalungisa hi nkama nyiko yohuma timbilwini ta n'wina, leyi miyitshembiseke. Nilava lesvaku yitshama yilungisiwile, yili leyihumaka mbilwini, yingali leyihumesiwaka hi kuvilela.

⁶ Yanakanyani lesvi: Lweyi abzalaka svitsongo, atatshovela svitsongo; kambe lweyi abzalaka svinyingi, atatshovela svinyingi.

⁷ Mun'wana ni mun'wana aanyike hilaha ativekiseleke hakona mbilwini ya yena, ahumesa hi kutshunxeka, kungali hi kuvilela, hikuva Xikwembu xirhandza lweyi anyikaka na atsakile.

⁸ Xikwembu xi ni matimba ya kuminyika hinkwasvu lesvi misvipfumalaka, ni kutlula kolaho, mitakota kupfuna ntirhweni wihi ni wihi lowunene, hikuva minkama hinkwayu mikuma lesvi svimiringanaka hi matlhelo hinkwawu,

⁹ hilaha Tsalwa rihlayaka hakona riku: “Ahaxile, anyikile svisiwana, kululama ka yena kungakala kungaheli.”

¹⁰ Lweyi anyikaka mbewu ka mubzali, ni svakuja, atamilavela mbewu atlhela ayimilisa; atamiyandzisela ntshovelo wa kunyika ka n'wina;

¹¹ atamifuwisa hinkwasvu, lesvaku mitativa kunyika hi tindlela hinkwatu, kutani lesvi sviyendla lesvaku van'wana vakhensa Xikwembu hikolaho ka lesvi misviyendlaka.

¹² Hikuva ntirho wolowo hi wutirhaka awupfuni ntsena kunyika vahlawuliwa lesvi vasvipfumalaka, kambe nasvona wuyandzisa ngopfu mikhenso leyi vakhensaka Xikwembu ha yona.

¹³ Ntirho lowu i xikombiso xa kupfumela ka n'wina, kutani vadzunisa Xikwembu hikolaho ka svona: Evhangeli ya Kriste, miyipaluxile, mitlhela miyendla lesvi yihlayaka svona, loko mili karhi miyavelana ni vahlawuliwa hinkwasvu lesvi minga na svona, miyavela ni vanhu van'wana, hi kunyika lokukulu.

¹⁴ Vanhu lava vatavona vunene lebzohlamalisa lebzi Xikwembu ximiyendlelaka bzona, kutani vatamikhongelela, hi kuminavelela lesvosaseka atimbilwini ta vona.

¹⁵ Akukhensiwe Xikwembu hikolaho ka nyiko ya xona, yinga nyiko leyi kupfumalekaka marito ya kuyihlamusela.