2 Vakorinto 8 - Testamente Leyimpsha Xichangana

Kunyika ka Vakriste

¹ Vamakwerhu, hilava lesvaku mitiva lesvi timpsalu ta Xikwembu tisviyendleke tikerekeni ta Makedoniya.

² Varingiwile ngopfu hi maxangu, kambe xikarhi ka svona hinkwasvu, kutsaka ka vona kuyile kuyengeteleka. Kutani hambilesvi avali avusiwaneni lebzikulu, vanyikelile rifuwo ra vona hi kunyika loku kutlulisaka mpimo.

³ Ningamibzela lesvaku vahlengile hi kuya hi lesvi avali na svona, ni kuhundzisa kolaho; hi kurhandza ka vona,

⁴ vakombelile hi matimba lesvaku hivakatekisa hi kuvapfumelela kuveka xiyandla xa vona ntirhweni lowu wa kupfuna vahlawuliwa va Xikwembu.

⁵ I mhaka leyi hina ahingayilangutelanga, hikuva varhangile hi kutinyiketa ka Hosi, kutani hi kurhandza ka Xikwembu vatlhele vatinyiketa ka hina.

⁶ Hikolaho hikhongotelile Tito, lweyi asunguleke ntirho wolowo, kuya mahlweni na wona, amipfuna kuhetisa nyiko leyi ya timpsalu.

⁷ Mi vafuwi ka hinkwasvu lesvi minga na svona, kupfumeleni, kuvulavuleni, vutivini, ni le kuhisekeni hinkwaku, ni le rirhandzwini leri hiripfuxeke ka n'wina; hi ndlela yoleyo, kombani lesvaku mi vafuwi kuhumeseni ka nyiko yoleyo ya timpsalu.

⁸ Animirhumi, kambe nimibzela ntsena hilaha van'wana vahisekelaka kupfuna hakona, nitativa kutiya ka rirhandzu ra n'wina.

⁹ Matitiva timpsalu ta Hosi ya hina Yesu Kriste: Aafuwile, hambi svilitano ahundzukile xisiwana hikolaho ka n'wina, lesvaku miyendliwa vafuwi hi vusiwana bza yena.

¹⁰ Hikolaho, mhakeni leyi, nitamikomba miyehleketo ya mina: Lembe lerihundzeke hi n'wina amili lavorhanga lavangatiyimisela kupfuna, ni kusviyendla misviyendlile;

¹¹ svosvi amitafanela kuhetisa ntirho lowu miwusunguleke. Aminavela svinene kupfuna, mitivekisela svona; hi ndlela yoleyo, svosvi hetisani ntirho wakona hi kuya hi lesvi minga na svona.

¹² Hikuva loko munhu anavela kunyika hi mbilu, svapfumeleleka mayelanu ni lesvi anganasvona, kugali lesvi asvipfumalaka.

¹³ Lesvi asvihlayi lesvaku van'wana vafanele kuvevukeliwa, kutani n'wina mitikeliwa, ihim! Kambe asviyendliwe hi kuringana.

¹⁴ Kutani lesvi misvipfuneke svosvi, svifanela kuva xipfunu vusiwaneni bza vona; siku rin'wana kupfuna ka vona kutava xipfunu vusiwaneni bza n'wina. Kutani svosvo svitayendla lesvaku kuva ni kuringana ka n'wina na vona,

¹⁵ kukotisa lesvi Tsalwa rivulaka svona, leringe: “Lweyi aahlengeletile ngopfu angavanga ni lesvotala, ni lweyi aahlengeletile svitsongo angapfumalanga nchumu.”

¹⁶ Akukhensiwe Xikwembu lexiyendlaka lesvaku Tito ahiseka kufana na hina kumipfuna.

¹⁷ Himukombelile kuta koseyo ka n'wina, kutani akhensile, kambe aatiyimisele kuta koseyo ka n'wina, hi kurhandza ka yena.

¹⁸ Himurhuma ata ni makwerhu mun'we lweyi adzunisiwaka tikerekeni hinkwatu hi mhaka ya ntirho wa yena wofambisa Evhangeli.

¹⁹ Ahilesvi ntsena, kambe nasvona ahlawuliwile hi tikereke kufamba na hina ntirhweni lowu wa timpsalu; nyiko yakona hiyitamela kudzuniseni ka Hosi hi xiviri xa yona, ni kuva xikombiso xa lesvaku hinavela svinene kupfuna.

²⁰ Hiringeta kuyendla lesvaku hingasoliwi hi munhu ni mun'we mhakeni ya nyiko leyi hiyitamelaka, leyihumesiweke hi mbilu ya kutshunxeka.

²¹ Hinavela kuyendla lesvisasekeke kungali mahlweni ka Hosi ntsena, kambe ni le mahlweni ka vanhu.

²² Hi varhumela vata kun'we ni makwerhu mun'wana lweyi hingamuxiyaxiya minkama leyotala, hikuma na ali lweyi ahisekaka ka lesvotala, lweyi ni svosvi kuhiseka ka yena kungaya kuyengeteleka, hi mhaka ya lesvi amitshembaka ngopfu.

²³ Loko ali Tito, i nakulorhi lweyi nitirhisanaka na yena kumipfuna; loko vali vamakwerhu lavan'wana, i varhumiwa va tikereke, lava Kriste achavisekaka hi mhaka ya vona.

²⁴ Loko svilitano, vakombeni rivaleni, mahlweni ka tikereke, lesvaku mavarhandza, ni lesvaku ahihoxi loko hitidzunisa ha n'wina.