2 Vakorinto 7 - Testamente Leyimpsha Xichangana

¹ Varhandziwa, svitshembiso lesvi svinyikiwile hina. Hikolaho, hifanele kutibasisa, hisusa chaka hinkwaru ra miri ni ra moya, hihetiseka vutowini lebzohlawuleka, na hili karhi hichava Xikwembu.

Kutsaka ka Pawulo

² Hiyamukeleni timbilwini ta n'wina. Ahiyendlelanga munhu ni mun'we lesvobiha; ahinghenisanga munhu ni mun'we khombzeni; ahikangayisanga munhu ni mun'we.

³ Anihlayi lesvo hi kulava kumiyavanyisa, hikuva nihlayile ni le kusunguleni lesvaku mi le timbilwini ta hina; akuva hiva svin'we kufeni ni le kuhanyeni.

⁴ Nivulavula na n'wina, na nili karhi nimitshemba ngopfu; nitikulisa ngopfu hi n'wina; nitala hi kuchaveleliwa; kuxanisekeni hinkwaku ka hina, natsaka nitsakisisa.

⁵ Svitiyile lesvaku, loko nifikile Makedoniya, anikumanga kuwisa nikutsongo; anili kuxanisekeni matlhelo hinkwawu: Anirhendzeliwe hi kuxaniseka matlhelo hinkwawu, kutani anili ni kuchava mbilwini.

⁶ Kambe Xikwembu lexichavelelaka lavaheleke matimba, xinichavelelile hi kufika ka Tito;

⁷ kungali ntsena hi kufika ka yena, kambe nakona hi kuchavelela loku mimukombeke kona. Anibzelile hilaha minavelaka ngopfu hakona kunivona, ni hilaha mitweke kuvava hakona, ni hilaha michivirikaka hakona kuniseketela; lesvi sviyengetelile kutsaka ka mina.

⁸ Hambi loko nimivavisile hi papela ra mina, anitilayi hikolaho ka rona (nasvivona lesvaku papela rakona rimivavisile, kambe svivile sva nkamanyana ntsena). Kambe, hambi ningava nitilayile,

⁹ svosvi nitsakile, kungali hi lesvi mivavisiweke, kambe hi lesvi kuvavisiwa ka n'wina kungamiyisa kuhundzukeni; mirhwele kuvaviseka ka n'wina hi mukhuva lowutsakeliwaka hi Xikwembu, kutani svosvi sviyendlile lesvaku hingamivangeli kulahlekeliwa.

¹⁰ Loko kuvaviseka kurhwaliwa hi ndlela leyitsakeliwaka hi Xikwembu, kutisa kuhundzuka, kutani kuhundzuka loku kuyisa kuponisiweni, akukhomisi tingana; kasi kuvaviseka hi mhaka ya sva misava, kuvanga rifu.

¹¹ Vonani hinkwasvu lesvi kuvaviseka ka n'wina hi mukhuva lowutsakeliwaka hi Xikwembu kungatisa svona xikarhi ka n'wina: Mingavona kuhiseka ka n'wina, ni kunavela ka n'wina ka kutihlamulela, ni kukarhateka ka n'wina moyeni, ni kuchava ka n'wina, ni kutitwa ka n'wina, ni kuchivirika ka n'wina, ni kunavela ka n'wina ka kutshinya xijoho! Hi matlhelo hinkwawu mitikombile na mili lavangaliki na nandzu mhakeni leyi.

¹² Hikolaho, hambi loko nimitsalelile, anisviyendlanga hikolaho ka lweyi ajoheke, kumbe hikolaho ka lweyi ajoheliweke; nisviyendlile lesvaku nimikomba, mahlweni ka Xikwembu, hilaha mihisekelaka kuhipfuna hakona.

¹³ Hi svona lesvi svihitiyisaka. Kambe, kuyengetela kutiyisiwa ka hina, hitsakisiwile ngopfungopfu hi kutsaka ka Tito, hikuva akumile matimba lamampsha moyeni hikolaho ka n'wina hinkwenu.

¹⁴ Hambi loko nitidzunisile mahlweni ka yena hi mhaka ya n'wina, aminikhomisanga tingana. Ahimibzelanga nchumu wun'wana, loko wungali ntiyiso ntsena. Hi mukhuva wolowo kutidzunisa ka hina mahlweni ka Tito, kukumekile na kuli ntiyiso.

¹⁵ Hikolaho, rirhandzu ra yena ka n'wina riyile rikula loko ayanakanya hilaha miyingiseke hakona, n'wina hinkwenu, ni hilaha mimuyamukeleke hakona, hi xichavu ni kurhurhumela.

¹⁶ Natsaka, hikuva nasvikota kumitshemba matlhelo hinkwawu.