2 Vakorinto 6 - Testamente Leyimpsha Xichangana

¹ Hina hitirhisanaka ni Xikwembu, ha mikhongotela nakambe, hili: Lesvi miyamukeleke timpsalu ta Xikwembu, mingatitshikeni tiwa!

² Hikuva Xikwembu xite: “Nikuyingisile nkameni lowu pfumelekaka, sikwini ra mina ra kuponisa, nikupfunile.” Vonani, nkama lowunene wa kutsetseleliwa wufikile, namuntlha hi rona siku ra kuponisiwa.

³ Ahiveki xikhunguvanyiso ni xin'we ndleleni ya munhu ni mun'we, lesvaku ntirho wa hina wutakala wungasandziwi.

⁴ Timhakeni hinkwatu hitikombile na hili malandza ya Xikwembu hi kutiyisela ka hina lokukulu kuxanisekeni, ni le vusiwanini, ni le makhombzeni;

⁵ akubiweni, ni le majele, ni le madzolongeni; mintirhweni leyotika, ni le kupfumaleni ka vurhongo, ni le kutitsoneni ka svakuja.

⁶ Hi kutenga, ni vutivi, ni kuleha mbilu, ni timpsalu, hitiyiselile hi matimba ya Moya Lowokwetsima, ni rirhandzu leringaliki na kukanganyisa,

⁷ na hivulavula ntiyiso, na hili ni matimba ya Xikwembu. Matlhari ya hina i kululama, himatamela hi voko ra xinene ni leri ra ximatsi.

⁸ Hi kuxiximiwa ni kusandziwa; halumbetiwa ni kudzunisiwa. Hivoniwa na hili vakangayisi, kasi hi va ntiyiso;

⁹ hivoniwa na hili lavangativiwiki, kasi hativiwa svinene; wonge hafa, kasi hahanya. Hakhatisiwa, hambi svilitano ahidlayiwi;

¹⁰ havavisiwa, hambi svilitano hitsakile masiku hinkwawu; wonge hisvisiwana, kasi hifuwisa lavotala; wonge ahi na nchumu, kasi hi ni svilo hinkwasvu.

¹¹ N'wina Vakorinto, hivulavula na n'wina na hitshunxekile; ni timbilu ta hina tipfulekile svinene;

¹² ahimipfaleli timbilu, hi n'wina mingahipfalela timbilu ta n'wina.

¹³ Nivulavula kufana ni tatana ka vana va yena, nili: Hiyendleleni lesvi hingamiyendlela svona, mihipfulela timbilu ta n'wina.

Tempele ya Xikwembu lexihanyaka

¹⁴ Mingarhwaleni mpingu wun'we ni lava vangaliki vapfumeli; hikuva wun'we bzikwihi xikarhi ka kululama ni kuhomboloka ke? Kumbe kuvonakala ku ni kuhlangana kwihi ni munyama ke?

¹⁵ Xana Kriste na belial, vangatwanana ke? Kumbe mupfumeli angafambelana hi mukhuva wihi ni lweyi angaliki mupfumeli xana?

¹⁶ Tempele ya Xikwembu yi ni vunakulobze bzihi ni svikwembu sva hava ke? Hikuva tempele ya Xikwembu lexihanyaka hi hina, kufana ni lesvi Xikwembu xingate: “Nitayaka xikarhi ka vona, nifambafamba ka vona, nitava Xikwembu xa vona, kutani vona vatava tiko ra mina.”

¹⁷ Hikolaho, Hosi yili: “Humani xikarhi ka vona, mihambana na vona; mingatshukeni mikhumba lesvinyameke, kutani nitamiyamukela.

¹⁸ Nitava tatana wa n'wina, na n'wina miva vana va mina vaxinuna ni vaxisati.” Hosi ya matimba hinkwawu yihlaya svosvo.