2 Vakorinto 5 - Testamente Leyimpsha Xichangana

¹ Hasvitiva lesvaku, loko ntsonga lowu hinga ka wona, wunga miri wa hina wa la misaveni, wuhahluka, hi ni yindlo leyi Xikwembu xihilungiseleke yona, yinga yindlo leyingayakiwangiki hi mavoko, leyingahahlukiki, ya le matilweni.

² Hakunene, loko hahali ntsongeni lowu, hakonya na hili karhi hinavela ngopfu kuyambala yindlo ya hina ya le tilweni,

³ lesvaku loko hiyambalile yona, hingakumiwi na hingayambalanga nchumu.

⁴ Hikuva loko hahali ntsongeni lowu wa hina, hakonya hi kutikeliwa: Ahilavi kulahlekeliwa hi miri lowu wa khale, kambe hilava kuyambala lowumpsha, lesvaku lesvi svifaka, svimintiwa hi vutomi.

⁵ Kutani Xikwembu hi xoxe xihivumbele svona svosvo, kutani xihinyikile xitiyiso xa Moya.

⁶ Hikolaho hitiya nhlana minkama hinkwayu. Hitiva lesvaku, loko kaya ka hina kahali mirini lowu, hi le kule ni Hosi.

⁷ Hihanya hi kupfumela, kungali hi kusvivona,

⁸ kutani nili, hitiya nhlana, nasvona ahitatsakela kurhurha mirini lowu, lesvaku hitava kaya Hosini.

⁹ Hikolaho, hambi loko kaya ka hina kuli halenu mirini, kumbe hambi loko hirhurha ka wona, kunavela ka hina lokukulu i kutsakisa Hosi.

¹⁰ Hikuva hinkwerhu hitafanela kuyima mahlweni ka Xitshamu xa kuyavanyisa xa Kriste, lesvaku mun'wana ni mun'wana atayamukela hakelo ya lesvi asviyendleke loko ahali mirini, hambi lesvosaseka kumbe lesvobiha.

Ta kuvuyelelana ka vanhu ni Xikwembu

¹¹ Hikolaho, hikholwisaka vanhu hi kuvakhongotela hikuva hasvitiva lesvaku, kuva ni xichavu ka Hosi, svivula yini; kambe Xikwembu xitiva svinene lesvi hinga xisvona, kutani natshemba lesvaku na n'wina mihitiva hi mukhuva wolowo mapfalwini ya n'wina.

¹² Ahititivisi ka vumbirhi ka n'wina, kambe hominyika nkama wa kutidzunisa ha hina, mitativa kuhlamula lava vatidzunisaka hi sva le handle, kungali hi sva le mbilwini.

¹³ Loko hihlanganile nhloko, hiyendlela kutirhela Xikwembu; loko hiku hihanya khwatsi nhlokweni, hiyendlela kutirhela n'wina.

¹⁴ Rirhandzu ra Kriste rahifambisa, hikuva hifikile laha hitivaka svinene lesvaku munhu mun'we afele hinkwavu; loko svilitano, hinkwavu vafile.

¹⁵ Afele vanhu hinkwavu, lesvaku lavahanyaka vangahatihanyeli, kambe vahanyela lweyi afeke atlhela apfuxiwa kufeni hikolaho ka vona.

¹⁶ Hikolaho, kusukela svosvi ahahativi munhu hi kuya hi sva le handle; hambi loko hitivile Kriste hi kuya hi sva le handle, svosvi ahahamutivi hi mukhuva wolowo.

¹⁷ Loko munhu ali ka Kriste, i xivumbiwa leximpsha.

¹⁸ Hinkwasvu lesvi svihuma ka Xikwembu, lexingayendla lesvaku hivuyelelana na xona ha Kriste; kutani xihinyikile ntirho woyendla lesvaku vanhu vavuyelelana na xona.

¹⁹ Ntirho lowu wukomba hilaha Xikwembu xiyendlaka hakona lesvaku misava yivuyelelana na xona ha Kriste. Axihlayeli vanhu svijoho sva vona, kutani xihirhwexile Mahungu lawa ya kuvuyelelana ka xona ni vanhu.

²⁰ Hikolaho, hi varhumiwa va Kriste; Xikwembu hi xoxe xamikhongotela ha hina; hamikhongotela hi matimba hikolaho ka Kriste, hili:

²¹ “Vuyelelanani ni Xikwembu!” Kriste lweyi angativangiki xijoho, Xikwembu ximuyendlile lesvaku ava xijoho hikolaho ka hina, lesvaku hikolaho ka yena, hiyendliwa lavalulameke mahlweni ka Xikwembu.