2 Vakorinto 4 - Testamente Leyimpsha Xichangana

Ta xuma atimbiteni ta vumba

¹ Hikolaho lesvi Xikwembu, hi timpsalu ta xona, xingahirhuma kutirha ntirho wolowo, ahiheli mbilu.

² Hitshikile mintirho hinkwayu ya munyama ni ya tingana; ahihanyi hi kukanganyisa vanhu; ahihambukisi Rito ra Xikwembu; kambe hihumelelisa ntiyiso rivaleni, kutani hitikomba na hili lavakhensekaka aripfalwini ra mun'wana ni mun'wana, ni le mahlweni ka Xikwembu.

³ Hikuva loko Evhangeli ya hina yifihlekile, yifihlekile ntsena ka lava vayaka kuloveni;

⁴ Xikwembu xa misava leyi xipfalile miyehleketo ya vanhu lava vangapfumeliki; xivasive mahlo lesvaku vangavoni kuvonakala ka Evhangeli leyi yitwalisaka kukwetsima ka Kriste, yena lweyi anga xifaniso xa Xikwembu.

⁵ Hina ahititwalisi, kambe hitwalisa Yesu Kriste, hiku: I Hosi! Kutani hina hitihlaya malandza ya n'wina hikolaho ka Yesu.

⁶ Hikuva hi xona Xikwembu lexi nga te: “Kuvonakala akuvoninge munyameni!” Hi xona lexingavonakalisa kuvonakala atimbilwini ta hina, hitativa kukwetsima ka xona loku kuvonakalaka nghoheni ya Kriste.

⁷ Kambe hina lava hinyikiweke kurhwala xuma lexi, hifana ni timbita ta vumba; svikomba lesvaku matimba lamakulu lawa, lawa matlulaka hinkwasvu, mahuma ka Xikwembu, amahumi ka hina.

⁸ Hi kamanyetiwa hi matlhelo hinkwawu, kambe ahimanyiwanga; hi le kukanakaneni, kambe ahiheli mbilu;

⁹ hahlotiwa, kambe ahitshikiwanga khombzeni; hatlumbiwa, kambe ahihelisiwi;

¹⁰ minkama hinkwayu hirhwala rifu ra Yesu mirini wa hina, lesvaku vutomi bza Yesu na bzona bzivonaka mirini wa hina.

¹¹ Hikuva hina, hambilesvi hinga lavahanyaka, hinyiketiwa kudlayiweni minkama hinkwayu hikolaho ka Yesu, lesvaku vutomi bza Yesu bzivonaka ntumbulukwini wa hina lowufaka.

¹² Kutani-ke, rifu ratirha ka hina, kambe vutomi bzatirha ka n'wina.

¹³ Lesvi hinga ni Moya wa kupfumela, lowufanaka ni wa lweyi angatsala aku: “Nipfumelile, hi kolaho nivulavulile”, na hina hapfumela, kutani hikolaho ka svona havulavula;

¹⁴ hikuva hasvitiva lesvaku Xikwembu lexi xipfuxeke Hosi Yesu kufeni, xitahipfuxa na hina svin'we na Yesu, kutani xitahihumelelisa svin'we mahlweni ka xona, hina na n'wina.

¹⁵ Hinkwasvu lesvi sviyendliwile hikolaho ka n'wina, lesvaku loko timpsalu ta Xikwembu tili karhi titala, titalisa ni ntsengo wa lava vangatakhensa vavuyelela, kudzuniseni ka Xikwembu.

Kuhanya hi kupfumela

¹⁶ Hikolaho ahiheli mbilu; hambilesvi hihlakalaka hi tlhelo ra munhu wa hina wa le handle, hi tlhelo ra munhu wa hina wa le ndzeni, hihundzuka lavampsha siku rin'wana ni rin'wana.

¹⁷ Hikuva maxangu lawa mangaliki na kutika ngopfu, lawa manga ya nkamanyana ntsena, mahitisela kukwetsima loku kunga ni ntikelo svinene, lokungaheliki, lokutlulaka ngopfu mpimo hinkwawu.

¹⁸ Kutani hikongomisa mahlo ya hina kungali ka lesvivoniwaka, kambe ka lesvingavoniwiki; hikuva lesvivoniwaka i sva nkamanyana ntsena, kasi lesvi svingavoniwiki i sva minkama hinkwayu.