2 Vakorinto 3 - Testamente Leyimpsha Xichangana

Malandza ya ntwananu lowumpsha

¹ Xana hotlhela hisungula kutitivisa ke? Xana hifanela kukuma mapapela lawa mahitivisaka ka n'wina, kumbe lawa mahumaka ka n'wina kufana ni lesvi van'wana vayendlisaka svona ke?

² Ihim! Hi n'wina minga papela ra hina, leritsaliweke timbilwini ta hina, leritiviwaka ni lerihlayiwaka hi vanhu hinkwavu.

³ Svavoneka lesvaku n'wina mipapela ra Kriste, lerihumesiweke hi hina, leritsaliweke kungali hi tinta kambe hi Moya wa Xikwembu lexihanyaka; aritsaliwanga sviphepherheleni sva maribze, kambe ritsaliwile timbilwini ta vanhu.

⁴ Hingavula svosvo hikuva hi ni kutshemba koloko mahlweni ka Xikwembu hikolaho ka Kriste.

⁵ Hina hi hexe ahi na matimba yotirha ntirho lowu; hingakala hingahlayi lesvaku hi ni lexi xihumaka ka hina, kambe matimba ya hina mahuma ka Xikwembu.

⁶ Hi xona lexi xihinyikeke hinkwasvu lesvi ahisvipfumala, loko xihiyendlile malandza ya ntwananu lowumpsha, lowunga wa Moya, wungali wa milawu ya kutsaliwa; hikuva milawu ya kutsaliwa yadlaya, kambe Moya wona wahanyisa.

⁷ Nawu lowu maletera ya wona makovotliweke ribzeni, wuvangile rifu; hambi svilitano wutile hi kuphatima lokukulu ngopfu, Vaisrayele vakondza vatsandzeka ni kulanguta mombo wa Moxe, hikolaho ka kuphatima ka wona, hambilesvi kuphatima kakona akuli loku kunyamalalaka.

⁸ Loko svilitano, kuvangama loku kutisiwaka hi Moya, xana akungavi lokukulu kutlulisa ke?

⁹ Hikuva loko Nawu lowuvangaka kuyavanyisiwa wutile hi kuphatima, xana Moya lowu wuhitiselaka kululama mahlweni ka Xikwembu, awungaphatimi kutlulisa ke?

¹⁰ Hakunene, lexitshamaka xita, na xili ni kuphatima, svosvi axahali nakona; ndhawu ya xona yitekiwile hi kuphatima lokukulu loku kutlulisaka.

¹¹ Hikuva lesvi xilo lexi xihundzaka xiteke na xili ni kuphatima, lexinga kona hilaha kungaheliki xitava ni kuphatima lokukulu kutlulisa.

¹² Hikolaho, lesvi hinga ni kulangutela lokotano, hivulavula na hitiyile nhlana svinene.

¹³ Ahifani na Moxe lweyi angatimbhonya mombo hi nguvu, lesvaku Vaisrayele vangavoni khwatsi kuphatima loku kuhundzaka kuhelela makumu.

¹⁴ Miyehleketo ya vona ayiyononon'hwisiwa; hikuva kutafika ni namuntlha loko kuhlayiwa matsalwa ya ntwananu wa khale, anguvu yoleyo yahali kona, ayisuki, hikuva yingasusiwa ntsena loko munhu ali ka Kriste.

¹⁵ Ina, kutafika ni namuntlha, nkama wihi ni wihi loko kuhlayiwa matsalwa ya Moxe, onge hi loko anguvu yoleyo yahafunengeta miyehleketo ya vona.

¹⁶ Kasi, “nkama wihi na wihi loko munhu ahundzukela ka Hosi, anguvu yasusiwa”, hilaha Matsalwa mahlayaka hakona.

¹⁷ Loko vaku “Hosi”, vahlaya Moya, kutani laha Moya wa Hosi wunga kona, kutshunxeka ku kona.

¹⁸ Hina hinkwerhu lava hinga ni tinghohe tofununguliwa, hikombaka kuphatima ka Hosi kufana ni xib'uku, hihundzukile lavafanaka na yena hi kuphatima loku kungangamukaka kuya mahlweni. Hosi yiyendlile svosvo, yona yinga Moya.