2 Vakorinto 2 - Testamente Leyimpsha Xichangana

¹ Hikolaho nitibohile lesvaku aningati ka n'wina nitisa timhaka leti timivavisaka timbilu,

² hikuva loko nimitlhava timbilu, i vamani lavangatanisusa gome loko vangali volavo nivatlhaveke timbilu xana?

³ Leyi hi yona mhaka leyiyendleke lesvaku nimitsalela: Hi lesvaku loko nitava nifikile, ningatlhaviwi mbilu hi vanhu lava avatafanela kunitsakisa; hikuva namitshemba hinkwenu; nitiva lesvaku loko nitsakile, na n'wina hinkwenu mitsakile.

⁴ Nimitsalelile, na nitwa kuvava ngopfu, nikuvaviseka svinene, ni hi kurila; akungali kumitlhava timbilu, kambe akuli kuyendlela lesvaku mitiva rirhandzu lerikulu ngopfu leri nimirhandzaka ha rona.

Ta kurivalela mujohi

⁵ Loko kuli ni lweyi avangeke lesvitlhavaka timbilu, angatlhavanga mina, kambe hi tlhelo rin'wana, ningaku (hambi loko ningalavi kusvikulisa ngopfu): atlhavile n'wina hinkwenu.

⁶ Lesvi munhu wotanu angalayiwa hi lavotala va n'wina hi ndlela leyi, sviringanile;

⁷ svosvi amitafanela kumurivalela, mimuchavelela, lesvaku angahluliwi hi gome kutlula mpimo.

⁸ Hikolaho, namikhongotela lesvaku mitlhela mimukomba rirhandzu.

⁹ Hikuva loko nimitsalelile papela, akuli kumiringa, ni kuvona hilaha miniyingisaka hakona ka svilo hinkwasvu.

¹⁰ Munhu mun'wana ni mun'wana lweyi mimurivalelaka, namurivalela na mina; hikuva lexi ningaxirivalela, loko hakunene nirivalele xijoho xin'we, hi kumirhandza, nisviyendlele n'wina, mahlweni ka Kriste,

¹¹ lesvaku Sathana angatshuki ahihlula hi maqhinga, hikuva hitiva makungu ya yena.

Kuvilela ni kurhulisiwa ka Pawulo

¹² Loko nifikile Trowasi kuchumayela kona Evhangeli ya Kriste, yena anipfulelile nyangwa wotirha ntirho wa yena.

¹³ Kambe aningatshunxekanga moyeni, hikuva Tito makwerhu animukumanga; hi kolaho, nivasalisile, kutani ni ya Makedoniya.

¹⁴ Kambe akukhensiwe Xikwembu lexi ka Kriste xihiyisaka kutsakeni, hi kutirhisa hina minkama hinkwayu; xihangalasa hinkwaku kunun'hwela loku kunandzihaka ka kutiva Kriste.

¹⁵ Hikuva hi hina hinga kunun'hwela loku kunandzihaka ka Kriste hi xiviri, loku kuhangalakaka hi vito ra Xikwembu xikarhi ka lavaponisiwaka ni ka lavalovaka;

¹⁶ ka lavalovaka i sema ra rifu; kambe ka lavaponisiwaka, i kunun'hwela ka vutomi. Xana i mani lweyi afaneliwaka hi ntirho hinkwawu lowu ke?

¹⁷ Hikuva ahifani ni lavotala, lavayendlaka bindzu leri ra kubiha hi Rito ra Xikwembu; kambe hivulavula kufana ni vanhu va timbilu ta kutenga, kufana ni lavarhumiweke hi Xikwembu; hivulavula mahlweni ka Xikwembu na hili va ka Kriste.