2 Vakorinto 13 - Testamente Leyimpsha Xichangana

Kukhongotela kohetelela ni kusalisa

¹ Leri i khambi ra vunharhu ka n'wina. Mhaka yin'wana ni yin'wana yitatiyisiwa hi milomo ya timboni timbirhi kumbe tinharhu.

² Loko ni miyendzelile ka vumbirhi, ni svosvi hambi loko nilikule na n'wina, ni tsundzuxile lavajoheke khale, ni lavan'wana hinkwavu, kutani nahavatsundzuxa: Loko nitlhela ni ta, aningavatsetseleli,

³ lesvi milavaka xikombiso xa lesvaku Kriste avulavula ha mina. Yena angatsananga loko atirha xikarhi ka n'wina, matimba ya yena matirha xikarhi ka n'wina.

⁴ Aatsanile loko avambiwa xihambanwini, kambe svosvi, hi matimba ya Xikwembu, wahanya. Na hina, hatsana svin'we na yena, kambe matimba ya Xikwembu matahinyika vutomi bza yena, lesvaku hikota kutirha xikarhi ka n'wina.

⁵ Yanani mahlweni mitikamba, kuvona loko mahali kupfumeleni. Tiyanakanyeni! Xana amisvivoni lesvaku Yesu Kriste a le ka n'wina ke? Nkama wun'wana, mingatsandzeka kutiyanakanya!

⁶ Loko hili hina, natshemba lesvaku mitasvivona: Ahitsandzekanga!

⁷ Hikhongela Xikwembu lesvaku mingayendli xobiha ni xin'we; nkongometo, ahikukomba lesvaku hina hasvikota svosvo, kambe i kukomba lesvaku n'wina masvikota, hambi loko hina hingavonaka na hili vatsandzeki.

⁸ Hakunene hingakala hingalwi ni ntiyiso, kambe hitayima ntiyisweni.

⁹ Hitsakile loko hitsanile, ni loko n'wina mitiyile; kutani lesvi hisvikombelaka, hi lesvaku n'wina miva lavahetisekeke.

¹⁰ Lesviyendlaka lesvaku nitsala timhaka leti na ningasita le ka n'wina, hi lesvaku siku leri nifikaka ningatshuki nitirha na n'wina hi kunonon'hwa, hi matimba lawa Hosi yininyikeke wona. Hosi yininyikile wona kuyakisa, kungali kuhahlula.

¹¹ Svosvi-ke, vamakwerhu, nili: Salani! Vanani lavahetisekeke; yamukelani kuchaveleliwa; miva ni kuyanakanya kun'we; mihanya hi kurhula; kutani Xikwembu xa rirhandzu ni xa kurhula xitava na n'wina.

¹² Xewetanani hi kun'quntana kohlawuleka. Vahlawuliwa va Xikwembu hinkwavu vamirungula.

¹³ Timpsalu ta Hosi Yesu Kriste, ni rirhandzu ra Xikwembu, ni kuhlangana kun'we ni Moya Lowokwetsima, asvive na n'wina hinkwenu!