2 Vakorinto 12 - Testamente Leyimpsha Xichangana

Svivono ni tinhlavutelo

¹ Anifanele kutidzunisa. Hambilesvi sviganifaneliki, nitavulavula hi mhaka ya svivono ni tinhlavutelo tohuma ka Hosi.

² Nitiva munhu wa ka Kriste lweyi atlakuliweke ayisiwa tilweni ra vunharhu, kuhundze malembe ya khume na mune svosvi (kumbe aali mirini wa yena, kumbe aangali ka wona, anisvitivi, svotivawa hi Xikwembu).

³ Nitiva lesvaku munhu wakona (kumbe aali mirini wa yena, kumbe aangali ka wona, anisvitivi, svotivawa hi Xikwembu),

⁴ atlakuleliwile Paradiseni, atwa marito lamangahlayekiki, lawa munhu angapfumeleliwiki kumahlaya.

⁵ Nitatidzunisa hi munhu lweyi wotanu; kambe ningakala ningatidzunisi ha nexe, loko kungali ntsena hi takutsana ka mina.

⁶ Loko anilavile kutidzunisa, abzingatava vuphukuphuku, hikuva anitava nihlaya ntiyiso; kambe lesvi aningasviyendli, hikuva munhu mun'wana angatshuka ayanakanya lesvikulu ngopfu ha mina, kutlula lesvi asvivonaka, kumbe asvitwaka ka mina.

⁷ Kutani kuyendlela lesvaku ningatikulisi ngopfu hikolaho ka kusaseka lokukulu ka lesvi Xikwembu xingasvihlavutela ka mina, ninghenisiwile muntwa nyameni, yinga ntsumi ya Sathana, lesvaku yinihimetela.

⁸ Nikhongelile Hosi kanharhu hi mhaka ya xilo xoxo, lesvaku xisuka ka mina.

⁹ Kambe Hosi yite ka mina: “Timpsalu ta mina ka wena tiringene; hikuva matimba ya mina mahetiseka laha kunga ni kutsana kona.” Hikolaho nitatsaka ngopfu kutidzunisa hi ta kutsana ka mina, lesvaku matimba ya Kriste matayaka ka mina.

¹⁰ Hikolaho niyamukela hi kutsaka kutsana, ni maxangu, ni kukarhateka, ni kuxanisiwa, ni mahlomulu, hikolaho ka Kriste; hikuva loko nitsanile, hi kona ninga ni matimba.

Pawulo ahisekela Vakorinto

¹¹ Nitidzunisile, nive xiphukuphuku! Hi n'wina minisindziseke, kasi amitava mifanele kunidzunisa, hikuva hambi loko ningali nchumu, avanitlulanga ha nchumu, volavo vange i “vapostola lavakulu”.

¹² Niminyikile vumboni bza lesvaku ni mupostola wa xiviri, hi kumilehisela mbilu svinene, ni kuyendla mahlori, ni svihlamaliso, ni mintirho ya matimba mahlweni ka n'wina.

¹³ Xana mitshama mitluliwa hi tikereke tin'wana? Hi yini ke, loko kungali ntsena hi lesvi ningamurhwexangiki ndzhwalu wonihlayisa? Nikhomeleni ka xihoxo xoxo!

¹⁴ Nitilungisele kuta ka vunharhu le ka n'wina; aningamitikiseli, hikuva anilavi svilo sva n'wina, kambe nilava n'wina vinyi; hikuva vana ahi vona lavafanelaka kuhlayisela vapsali axuma, kambe i vapsali lavafanelaka kuhlayisela vana.

¹⁵ Loko nilimina, nitanyiketa sva mina hi kutsaka, nasvona nitatinyiketa hi xiviri xa mina kumipfuna; lesvi nimirhandzaka kutlula mpimo, xana mina nifanele kurhandziwanyana ntsena ke?

¹⁶ Svatwala, animitikiselanga; kambe, hi kuvula ka n'wina, mili ni munhu wa maqhinga, kutani nimikanganyisile!

¹⁷ Xana nimijelelile hi mun'we wa lava nivarhumeke ka n'wina ke?

¹⁸ Nikhongotelile Tito kuta le ka n'wina; kutani nirhumile makwerhu mun'wana lesvaku amuheleketa. Xana Tito amijelelile ke? Xana yena na mina ahifambanga hi moya wun'we, ni le mintileni yin'we ke?

¹⁹ Nkarhi hinkwawu lowu, mipimisa lesvaku hi ringeta kutisasekisa mahlweni ka n'wina. Ahi svona! Hivulavula mahlweni ka Xikwembu, na hili va ka Kriste. Hinkwasvu lesvi, varhandziwa, i sva kumiyaka.

²⁰ Nichava lesvaku, loko ni ta, nitamikuma na mingahafani ni lesvi nisvilavisaka xisvona, ni lesvaku na mina, mitanikuma na ningahafani ni lesvi misvilavisaka svona. Nichava lesvaku loko ni ta, nitakuma timholova, ni mavondzo, ni vumpsaka, ni kutirhandza, ni kurhuketelana, ni mahlevo, ni kutikukumuxa, ni madzolonga

²¹ Nichava lesvaku loko ni ta le ka n'wina, Xikwembu xa mina xingatlhela xinitsongahata mahlweni ka n'wina, kutani narila hikolaho ka lavotala lavajoheke khale, lavangahundzukangiki timhakeni ta vona letokala tingabasanga, ni ta vuwosvi, ni ta manyala, leti vangatiyendla.