2 Vakorinto 10 - Testamente Leyimpsha Xichangana

Pawulo alwela ntirho wa yena

¹ Mina Pawulo hanoxe, na mikhongotela hi musa ni vunene bza Kriste, mina Pawulo lweyi minge ni ntsongo loko nili xikarhi ka n'wina, kasi loko nili kule na n'wina mili ni nhenha!

² Namikombela, minganisindziseni kumikomba vunhenha lebzi, loko ni ta, hi kutitshemba loku niyanakanyaka lesvaku ningava nakona, ka lava vayanakanyaka lesvaku hihanya hi kulandza sva misava leyi.

³ Hakunene hihanya kola misaveni, kambe nyimpi leyi hiyilwaka ahiyakulwela sva misava.

⁴ Hikuva matlhari lawa hilwaka ha wona, ahilawa matirhisiwaka hi vanhu va misava, kambe mani matimba ya Xikwembu ya kuhirimuxa makhokholo;

⁵ hihelisa ni svihingakanyo hinkwasvu lesvi svitlakukeke, lesvi svisivelaka vanhu kutiva Xikwembu. Hikoka miyanakanyu hinkwayu kuyingiseni ka Kriste.

⁶ Kutani loko mitava mitinyiketile ka yena mimuyingisa, hina hitiyimisele kulwa ni hinkwavu lavatiyalisaka.

⁷ Langutani lesvinga rivaleni, mahlweni ka n'wina. Xana ku ni mun'wana ka n'wina lweyi akholwaka lesvaku yena i wa ka Kriste ke? Svilulamile! Kambe munhu lweyi aatiyanakanye lesvaku na hina, kufana na yena, hi va ka Kriste.

⁸ Kumbexana nitlula mpimo loko nitidzunisa hi matimba lawa ninga na wona, lawa Hosi yininyikeke wona (manga matimba yomiwundla, mangali yomihahlula), kambe ningakala ningakhomiwi hi tingana!

⁹ Anilavi kuvonaka wonge niringeta kumichavisa ntsena, hi mapapela ya mina.

¹⁰ Mun'wana angavula aku: “Mapapela ya Pawulo matika, matlhava, kambe loko alixikarhi ka hina himuvona asolekile, nasvona asvitikombi lesvaku angava muvulavuli.”

¹¹ Lweyi anga ni miyehleketo yotanu, aative lesvi, aku na kuhambana xikarhi ka lesvi hisvitsalaka mapapeleni ya hina, loko hili kule na n'wina, ni lesvi hingatasviyendla loko hitata koseyo ka n'wina.

¹² Svile rivaleni: Ahilavi kutiringanisa kumbe kutifananisa ni van'wana lavativonaka na vali lavakulu. Vanhu lava vatipima hi mpimo wa lesvi vangaxisvona, ni kutiringanisa hi xiyimu xa vona vinyi; i vanhu lavangaliki na kutwisisa!

¹³ Loko ali hina, ahingatidzunisi hi mintirho leyitirhiweke handle ka laha hingakombiwa kona, kambe hitatidzunisa hi lesvi hingasvitirha lomu Xikwembu xingahikomba kona, kukatsa ni laha ka n'wina.

¹⁴ Hi hina vosungula kuta ka n'wina na hili ni Evhangeli ya Kriste; hi kolaho ahitlulanga laha hingakombiwa kona, onge hi loko ndhawu yakona yingamikatsi.

¹⁵ Ahitidzunisi hi mintirho leyitirhiwaka hi van'wana, handle ka laha hingakombiwa kona; hinikulangutela lesvaku, loko kupfumela ka n'wina kuyakukula, kukhensiwa ka hina xikarhi ka n'wina kutayandzisiwa svinene, ndzeni ka tindhawu leti Xikwembu xingahikomba tona kutirha ka tona.

¹⁶ Kutani hitakota kutwalisa Evhangeli matikweni man'wana kuhundza ni le ka n'wina; hi ndlela yoleyo, akungavi na mhaka ya lesvaku hitidzunisa hi lesvitirhiweke hi van'wana, laha vona vangakombiwa kona.

¹⁷ Lweyi atidzunisaka, aatidzunisele Hosini.

¹⁸ Hikuva lweyi adzunisiwaka, ahi yena lweyi ativonaka ali lwenkulu, kambe hi yena lweyi Hosi yimuvonaka ali lwenkulu.