2 Vakorinto 1 - Testamente Leyimpsha Xichangana

Kuxeweta

¹ Mina Pawulo, mupostola wa Kriste Yesu hi kurhandza ka Xikwembu, na Timotewu makwerhu, ka kereke ya Xikwembu leyinga Korinto, ni vakwetsimi va Xikwembu hinkwavu lavanga tikweni hinkwaru ra Akaya, hili:

² Timpsalu ni kurhula asvive na n'wina, svihuma ka Xikwembu Tatana wa hina, ni le ka Hosi Yesu Kriste!

Pawulo akhensa Xikwembu

³ Akukhensiwe Xikwembu Tatana wa Hosi ya hina Yesu Kriste, Tatana wa timpsalu, Xikwembu lexi kuchavelela hinkwaku kuhumaka ka xona;

⁴ xahichavelela maxangwini hinkwawu ya hina; hi kolaho, na hina hikota kuchavelela lavanga maxangwini ya tinxakaxaka, hivachavelela hi kuchavelela loku na hina hinyikiweke kona hi Xikwembu.

⁵ Hikuva kukotisa lesvi mahlomulu ya Kriste mahitaleleke, nakona ha Kriste hikuma kuchaveleliwa hi ntalu.

⁶ Hikolaho, loko hixaniseka, sviyendlela lesvaku n'wina miva ni kuchaveleliwa ni kuponisiwa; loko hichaveleliwa, sviyendlela lesvaku na n'wina miva ni kuchaveleliwa, kutani minyikiwa matimba yotiyisela mahlomulweni lawa mafanaka ni mahlomulu lawa mahixanisaka.

⁷ Kutani kulangutela ka hina henhla ka n'wina kutiyile svinene, hikuva hitiva lesvaku, lesvi miyaveliwaka kuxaniseka kun'we na hina, mitayaveliwa nakona kuchaveleliwa loku hinga nakona.

⁸ Vamakwerhu, hilava lesvaku mitiva kuxaniseka loku kuhihumeleleke tikweni ra Aziya. Hitshikeleliwile ngopfu svinene, kutlula matimba ya hina, kukondza hihela mbilu, hingahatshembi lesvaku hitahanya.

⁹ Hakunene, ahititwa na hili lavayavanyiseliweke rifu; lesvi sviyendlile lesvaku hingahatitshembi, kambe hiveka kutshemba ka hina ka Xikwembu lexipfuxaka vafi.

¹⁰ Xihiponisile makhombzeni lawa yotanu lawa mavangaka rifu, kutani xitayengeta xihiponisa ka wona. Hivekile kutshemba ka hina ka xona, kutani xahatahiponisa,

¹¹ loko na n'wina mihipfuna hi kuhikhongelela, kutani kutava ni lavotala lavangatakhensa Xikwembu hikolaho ka hina, hi mhaka ya ntirho wa xona wa timpsalu lowu xihiyendleleke wona.

Kucinca ka makungu ya Pawulo

¹² Kutidzunisa ka hina hi loku: Ripfalu ra hina rihibzela lesvaku hihanyile xikarhi ka vanhu hi kululama ni kutenga loku kuhumaka ka Xikwembu, ngopfungopfu loko hitirhisana na n'wina. Hihanyile kungali hi vutlhari bza misava leyi, kambe hi timpsalu ta Xikwembu.

¹³ Hikuva ahimitsaleli svin'wana, loko svingali lesvi mikotaka kusvihlaya ni kusvitwisisa. Kutani natshemba lesvaku mitatwisisa svinene svilo lesvi,

¹⁴ hambi loko namuntlha mingasvitwisisi ngopfu; hi kolaho, mitatidzunisa hi hina sikwini ra Hosi Yesu, hilaha na hina hingatatidzunisa hakona hi n'wina.

¹⁵ Hi kutiva kutiya ka svona svosvo, aninavelile kurhanga ni ta ka n'wina, lesvaku mitakateka kambirhi;

¹⁶ aninavelile kumiyendzela loko ni ya Makedoniya, ni kutlhela nimiyendzela loko nivuya hi kona, lesvaku mitanipfuna riyendzweni ra mina roya Yudeya.

¹⁷ Xana anotlanga loko ninavelile kuyendla svosvo ke? Xana aniyendla makungu ya mina kufana ni vanhu van'wana, niku: “Ina, ina!” “Ihim, ihim!” hi nomo wun'we ke?

¹⁸ Kukotisa lesvi Xikwembu xitshembekaka, xitshembiso xa hina ka n'wina axivanga “ina na ihim!”

¹⁹ hikuva N'wana wa Xikwembu Yesu Kriste lweyi himupaluxeke xikarhi ka n'wina, mina na Silvhano na Timotewu, aangali “ina na ihim!” Kambe ka yena kuvuliwa “ina!” masiku hinkwawu.

²⁰ Hikuva, ka yena Xikwembu xitiyisa kutshembisa ka xona, xiku: “Ina!” Hikolaho hivulaka hiku: “Amen!” hi mhaka ya yena, kudzuniseni ka Xikwembu.

²¹ Kambe i Xikwembu lexinyikaka hina na n'wina kutshemba lokutiyeke ka Kriste; hi xona lexihirhwexeke ntirho lowu.

²² Xihifungile, xivekile Moya wa xona timbilwini ta hina, wuva xitiyiso xa lesvi svahataka.

²³ Nivitana Xikwembu kuva mboni ya mina hikuva xitiva mbilu ya mina: Akuli kumitsetselela, loko ningatlhelanga nita Korinto.

²⁴ Ahi lesvaku hina hifuma kupfumela ka n'wina, kambe hitirhisana na n'wina lesvaku mitakuma kutsaka, hikuva mitiyile kupfumeleni.