2 Timotiya 4 - Testamente Leyimpsha Xichangana

¹ Mahlweni ka Xikwembu ni le ka Kriste Yesu lweyi angatayavanyisa lavahanyaka ni lavafeke, ni hikolaho ka kuhumelela ka Yesu ni Mfumu wa yena, na kukhongotela svinene nili:

² Chumayela Rito, uhiseka hi nkama wakona, hambi kuli handle ka nkama; kholwisa, ulaya ni kukhutaza; ungatsandzeki hi tlhelo ra kulehisa mbilu ni le kujondziseni.

³ Hikuva nkama wata, lowu vanhu vangatakala vangayamukeli jondzo leyinga yona ya ntiyiso; kambe lesvi tindleve ta vona tinwayisaka, vatatihlengeletela vajondzisi lavangatavajondzisa lesvi vasvitsakelaka.

⁴ Kutani vatafularhela ntiyiso, vangahawuyingisi, vapepetsekela ka minkaringana ya hava.

⁵ Kambe loko ali wena, tiya minkama hinkwayu, yamukela kuxaniseka, tirha ntirho wa kuhiteka wa kuvula evhangeli, hetisa timfanelo ta ntirho wa wena.

⁶ Loko ali mina, nikotisa mhamba leyihumesiwaka alitarini; kutani nkama wa mina wu le kusuhi.

⁷ Nilwile nyimpi leyinene, nihetile mpfhuka wa mina wa kutsutsuma, nihlayisile kupfumela.

⁸ Lesvisaleke hi lesvaku hari ya vahluli yinirindzelile, kunga kululama loku Hosi, muyavanyisi lweyi wolulama, yingataninyika hi siku lerikulu; kutani ayinganyiki mina ntsena, kambe yitanyika ni hinkwavu lavatsakeleke kuhumelela ka yona.

Ta svitsundzuxu ka Timotewu

⁹ Yendla hi matimba lesvaku uta halenu ka mina svosvisvosvi.

¹⁰ Hikuva Demasi, hi kurhandza ngopfu sva misava leyi, anibalekile aya Thesalonika. Kreskene ayile Galatiya, na Tito ayile Dalmasiya.

¹¹ I Luka ntsena lweyi asaleke na mina. Tana na Marka halenu, hikuva asvikota ngopfu kunitirhela.

¹² Tikiko nimurhumele le Efesa.

¹³ Loko uta, tana ni jansi leri ningarisiya na Karpo le Trowasi, ni tibuku, ngopfungopfu letosonga, ta svikhumba.

¹⁴ Alexandre mufuli wa sva koporo aniwonhelile ngopfu; Hosi yitamutlhelisela hi lesvi aniyendleke svona.

¹⁵ Na wena utivonela ka yena, hikuva alwile ngopfu ni jondzo ya hina.

¹⁶ Kusunguleni ka kutihlamulela ka mina hubzeni, kupfumalekile ni mun'we wa kuyima na mina; hinkwavu vanibalekile. Vangavekiwi nandzu ka svona.

¹⁷ Kambe Hosi yiyimile na mina yinitiyisa, lesvaku nikota kuchumayela Rito niheta, ni lesvaku vamatiko hinkwavu vatakota kuritwa. Nasvona niwutliwile non'weni wa nghonyama;

¹⁸ Hosi yitaniwutla ni le kubiheni hinkwaku, yiniponisa lesvaku nitakuma Mfumu wa yona wa le matilweni, ka yona akuve kudzuneka hilaha kungaheliki. Amen.

Marungula yohetelela

¹⁹ Rungula Priskila na Akila ni va njangu wa ka Oneziforo.

²⁰ Eraxto asele Korinto. Trofimo nimusiyile na avabza le Mileto.

²¹ Yendla hi matimba lesvaku uta halenu na vuxika bzingasifika. Yubulo wakurungula; svitano na Pude na Lino na Klawudiya, ni vamakwerhu hinkwavu.

²² Hosi ayive ni moya wa wena. Timpsalu ative na n'wina. Amen!