2 Timotiya 3 - Testamente Leyimpsha Xichangana

Ta masiku ya makumu

¹ Tiva lesvaku masikwini ya makumu, kutafika minkama ya kukarhata.

² Hikuva vanhu vatava lavatirhandzaka, lavarhandzaka ngopfu male, ni kutidzunisa, ni kutikukumuxa, ni kurhukana; vatava lavangayingisiki vapsele, lavangaliki na kukhensa, vokala xichavu;

³ vatava vanhu lavapfumalaka rirhandzu, lavangaliki ni kutsetselela, valumbeti, lavangatikotiki, lavokarhata, lavavengaka lesvolulama;

⁴ vatava vakanganyisi, vanhu vamagugu, lavabohiweke hi kutikulisa, lavarhandzaka kutiphina kutlula kurhandza Xikwembu.

⁵ Vatatiyendla ongi hi loko vali ni vukhongeli, kambe vatayala matimba ya bzona. Fambela kule ni vanhu lavotano

⁶ hikuva xikarhi ka vona, ku ni lavanghenaka minjangwini ya vanhu, vaphasa vavasati lavangatiyangiki, lavahluliwaka hi svijoho, lavayisiwaka hala ni hala hi kunavela kohambanahambana;

⁷ vayingisa mani na mani, kutani vangakala vangafiki ni siku ni rin'we kutiveni ka ntiyiso.

⁸ Vanhu lava vakaneta ntiyiso, kufana na Yani na Yambri, lavangakanetana na Moxe. I vanhu lavaboleke miyanakanyu, i vapfumeli va nomo ntsena.

⁹ Kambe avangayi kule, hikuva vuphukuphuku bza vona bzitahumela rivaleni mahlweni ka vanhu hinkwavu, tani hi lesvi svingayendlisa svona ka vavanuna lavaya vambirhi.

Ta svileriso svohetelela

¹⁰ Svosvi-ke, ulandzelelile kujondzisa ka mina ni mahanyela ya mina, makungu ya vutomi bza mina ni vupfumeli bza mina, kulehisa ka mina mbilu, ni rirhandzu ra mina ni kutiyisela ka mina.

¹¹ Uvonile kuxanisiwa ka mina ni mahlomulu ya mina; utiva hinkwasvu lesvi svinihumeleleke le Antiyoka ni le Ikoniya ni le Listra, ni kuxaniseka lokukulu loku nikuvoneke. Hambi svilitano, Hosi yinilamulelile kuxanisekeni loku hinkwaku.

¹² Hakunene, hinkwavu lavanavelaka kuhanya vutomi bza vukhongeli ka Kriste Yesu, vataxanisiwa;

¹³ nasvona vanhu lavobiha ni vakanganyisi vataya mahlweni vayengeteleka kubiha, na vali karhi vakanganyisa, na vona vakanganyisiwa.

¹⁴ Kambe loko ali wena, yana mahlweni ni lesvi usvijondzeke, svinga lesvi ungapfumela ni kutiya ka svona, hikuva utiva lweyi usvijondzeke ka yena;

¹⁵ nasvona utiva lesvaku kusukela vutsongwanini bza wena, utolovelile Matsalwa Layohlawuleka, lamakotaka kukunyendla ntivi, makuponisa hi kupfumela ka Kriste Yesu.

¹⁶ Matsalwa lawa hinkwawu mahuhuteliwile hi Xikwembu, mapfuna kujondzisa, ni kulaya, ni kululeka, ni kutolovetisa lesvolulama,

¹⁷ lesvaku mutirheli wa Xikwembu ava lweyi ahetisekeke, atilulamisela kuyendla ntirho wini na wini lowunene.