2 Timotiya 2 - Testamente Leyimpsha Xichangana

Nhenha leyinene ya Kriste Yesu

¹ Hikolaho n'wananga, tiya timpsalwini letinga ka Kriste Yesu.

² Kutani lesvi usvitweke ka mina mahlweni ka timboni letotala, svihundzisele ka vanhu lavotshembeka, lava na vona vangatakota kujondzisa van'wana.

³ Na wena, yamukela kuxaniseka tani nhenha leyinene ya Kriste Yesu.

⁴ Loko nyimpi yahalwiwa, aku na nhenha leyi yiyaka yiyatirha sva le kaya, hikuva kunavela ka yona lokukulu i kutsakisa lweyi ayirhambeke kuyalwa nyimpi yakona.

⁵ Mutlangi wa mintlangu angatlhantekiwi hari, loko angalandzi milawu yakona.

⁶ Mutirhi lweyi atirheke hi matimba masin'wini, hi yena lweyi afanelaka kurhanga akuma mihandzu yakona.

⁷ Yanakanya lesvi nisvihlayaka, hikuva Hosi yitakunyika kutwisisa timhakeni hinkwatu.

⁸ Tsundzuka Kriste Yesu, wa rixaka ra Davhida, lweyi apfukeke kufeni, hilaha Evhangeli ya mina yihlayaka hakona.

⁹ Evhangeli yakona yinivangele kuxaniseka, nikondza nibohiwa hi machini kukota xigevenga, kambe Rito ra Xikwembu rona aribohiwanga,

¹⁰ kutani, timhakeni hinkwatu, nitiyisela hikolaho ka vahlawuliwa va Xikwembu, lesvaku na vona vatakuma kuponisiwa loku kuhumaka ka Kriste Yesu, vakuma ni kukwetsima lokungaheliki.

¹¹ Rito leri ritiyile, leringe: “Loko hifile na yena, nakona hitahanya na yena;

¹² loko hitiyisela, nakona hitafuma na yena; loko himulandzula, na yena atahilandzula;

¹³ loko hingatshembeki, Yena watshembeka masiku hinkwawu, hikuva angakala angatilandzuli.”

Ta mutirhi lweyi akhensekaka

¹⁴ Tsundzuxa vakriste timhaka leti, uvabzela svinene mahlweni ka Xikwembu lesvaku vangaphikizani hi marito, yinga mhaka leyingapfuniki nchumu, loko kungali ntsena kulovisa lavasviyingisaka.

¹⁵ Yendla hi matimba kuvoneka na uli lweyi akhensekaka mahlweni ka Xikwembu, na ungali na tingana hi ntirho wa wena, ujondzisa Rito ra ntiyiso hi ndlela leyinene.

¹⁶ Chava kuvulavula sva hava lesvingaliki na vukhongeli, hikuva lavayendlaka svosvo vatshamela kusandza Xikwembu,

¹⁷ kutani kuvulavula ka vona, kutafana ni xilondza xa muzoko lexibolisaka miri. Xikarhi ka vona ku na va Imenewu na Fileto,

¹⁸ lavatshikeke ntiyiso, hi kuvula lesvaku sva kupfuka kufeni svihundzeliwe hi nkama, kutani vahambukisa van'wana kupfumeleni.

¹⁹ Hambi svilitano, masungulu layotiya lamavekiweke hi Xikwembu amatsekatseki; matiyisiwa hi rito leringe: “Hosi yitiva lavanga va yona.” Nasvona: “Mani na mani lweyi avulaka vito ra Hosi, aahambane ni lesvohomboloka.”

²⁰ Ndlwini leyikulu, aku na svibza sva golidi ni sva silivhere ntsena, kambe ni svovatliwa hi svigodo ni sva vumba sviko na, kutani svin'we svi ni ntirho lowukulu wodzuneka, svin'wana lowutsongo wokala wungadzuneki.

²¹ Hikolaho, loko munhu atibasisa ka svilo lesvitsongo, atava xibza xotirha lesvikulu svodzuneka, lexihlawulekeke ni kupfuna n'winyi wa yindlo, xiyimela kutirha ntirho wihi ni wihi lowunene.

²² Chava kuhluliwa hi kunavela loku kutelaka lavampsha, ulandza kululama, ni kupfumela, ni rirhandzu, ni kurhula, svin'we ni lavakhongelaka Hosi hi timbilu letitengeke.

²³ Ungavi ni mhaka ni kukanetana ka vuphukuphuku lokungapfuniki nchumu; wasvitiva lesvaku svipsala timholova.

²⁴ Nandza wa Hosi angafaneli kuva munhu wa timholova, kambe aave ni timpsalu ka munhu mun'wana ni mun'wana, ativa kujondzisa, alehisa mbilu,

²⁵ alaya khwatsi vakaneti va yena; hikuva kumbexana Xikwembu xingayendla lesvaku vatisola vahundzuka, vafika laha vangativaka lesvinga ntiyiso.

²⁶ Kutani vangakota kupona ntlhan'wini wa Sathana, lweyi avakhomeke kuva vayendla kurhandza ka yena.