2 Petro 3 - Testamente Leyimpsha Xichangana

Ta xitshembiso xa kuta ka Hosi

¹ Varhandziwa leri i papela ra vumbirhi leri nimitsalelaka rona svosvi, kutani ka wona lawa mambirhi nipfuxa miyanakanyu ya n'wina leyinga ni kutwisisa, hi kumitsundzuxa.

² Aniyendlela kumitsundzuxa marito lamangahlayiwa khale hi vaprofeta lavohlawuleka, ni milawu ya Hosi ni Muponisi, leyiteke hi milomo ya vapostola va n'wina.

³ Xosungula, mifanela kutwisisa lesvaku, masikwini yohetelela, kutahumelela vasandzi lavafambisiwaka hi kunavela ka vona lokobiha;

⁴ vaku: “Svihelele kwihi, sva lweyi kungatshembisiwa lesvaku atavuya, xana? Hi mpfhuka vatatana vangatiyetlelela, svilo hinkwasvu svahaya mahlweni hilaha asvifamba hakona, kusukela loko misava yitumbuluka.”

⁵ Vanhu lava vavula ha vomu, hi kurivala mhaka leyi: Hi lesvaku matilo amali kona khale ni khale, ni lesvaku misava yivumbiwile hi rito ra Xikwembu yihuma matini, na yili xikarhi ka mati.

⁶ Hi rito lero, misava leyi ayili kona nkameni wolowo, yijiwile hi mati ya ndhambhi, yifunengetiwa.

⁷ Kambe hi ro rito lero, matilo ni misava ya svosvi, svihlayiseliwe kupsha hi ndzilo, sviyimele siku ra kuyavanyisiwa ni ra kuhelisiwa ka vanhu lavangaliki na mhaka ni Xikwembu.

⁸ Kambe mingakhohlweni mhaka yin'we leyi, varhandziwa: Mahlweni ka Hosi, siku rin'we rikotisa malembe ya khulu (1 000) ni malembe ya khulu (1 000) ma kotisa siku rin'we.

⁹ Hosi ayihlweli kuyendla lesvi yingatshembisa svona, hilaha van'wana vatwisisaka “kuhlwela” hakona, kambe yilehisa mbilu hikolaho ka n'wina; ayilavi lesvaku ni mun'we wa n'wina alahleka, kambe yilava lesvaku hinkwavu vata kuhundzukeni.

¹⁰ Kambe siku ra Hosi ritata kufana ni muyivi, kutani matilo matahundza hi huwa leyikulu; hinkwasvu sva ntumbuluku svitapsha hi ndzilo svihela, kutani misava ni mintirho leyinga ka yona svitahisiwa.

¹¹ Lesvi kungatapsha svilo lesvi hinkwasvu svihela hi ndlela leyi, mifanele kuva ni vutomi lebzohlawuleka bza vukhongeli,

¹² na mili karhi milangutela siku ra Xikwembu, miyendla lesvaku rihantla rifika, ringa siku leri ha rona kungatapsha matilo mahela, ni hinkwasvu sva ntumbuluku svingatanyunguluka, hi ndzilo.

¹³ Kambe, hi kuya hi kutshembisa ka Hosi, hilangutele matilo lamampsha ni misava leyimpsha, laha kungatava ni kululama.

¹⁴ Hikolaho varhandziwa, lesvi milanguteleke svilo lesvi, tikarhateni lesvaku Xikwembu ximikuma na mingali na xivati ni xisandzu, kambe ximikuma na mili ni kurhula.

¹⁵ Kutani, twisisani lesvaku loko Hosi ya hina yilehisa mbilu, yiyendlela kuhiponisa. Makwerhu Pawulo murhandziwa wa hina, na yena amitsalele hi yona ndlela leyi, hi kulandza vutlhari lebzi anyikiweke bzona.

¹⁶ Hi svona lesvi atoloveleke kusvivula mapapeleni ya yena hinkwawu, loko akhumba timhaka leti. Mapapeleni yakona ku ni svilo svin'wana lesvi svikarhataka kusvitwisisa; lavapfumalaka vutivi ni lavangatiyangiki vasvihombolokisa, hilaha vayendlaka hakona ka matsalwa laman'wana, kutani svivalovisa.

¹⁷ Hikolaho n'wina varhandziwa, lesvi mitivaka mhaka leyi hi nkama, tivoneleni, hikuva mingatshuka mihumile ndleleni hi kuxengiwa hi lavohomboloka, kutani milahlekeliwa hi kutiya ka n'wina.

¹⁸ Kambe kulani, na mili timpsalwini ni le kutiveni ka Yesu Kriste, Hosi ya hina ni Muponisi wa hina. Ka yena akuve kutwala svosvi, ni kuyafika sikwini leringaheliki. Amen!