2 Petro 2 - Testamente Leyimpsha Xichangana

Vaprofeta ni vajondzisi va mavunhwa

¹ Khale, vaprofeta va mavunhwa na vona vavekona xikarhi ka vanhu, kufana ni lesvi kungatava ni vajondzisi va mavunhwa xikarhi ka n'wina, lavangatanghenisa hi le xihundleni tijondzo tohambuka letiwonhaka; vatalandzula hambi ali Hosi leyivakutsuleke, vativangela kulahleka lokungatahantla kuvawela.

² Vanhu lavotala vatalandza sva manyala lesvi vasviyendlaka, nasvona ndlela ya ntiyiso yitasandziwa hi mhaka ya vona.

³ Kutani, hikolaho ka makolo ya vona, vatamidelela hi marito ya vona ya vukanganyisi. Kusukela khale, kuyavanyisiwa ka vona akuyimanga, ni kulova ka vona akuyetlelanga.

⁴ Xikwembu axitsetselelanga tintsumi loko tijohile, kambe xiticukumetile Tiheleni, ni kutinghenisa na tibohiwile axivandleni xa vafi, laha tipfaleliweke kona kuyafika siku ra kuyavanyisa,

⁵ axitsetselelanga misava ya khale, kambe xihlayisile Nowa mujondzisi wa lesvovululama, svin'we ni vanhu van'wana va ntlhanu ni vambirhi, nkameni lowu xingavanga ndhambhi misaveni ka vanhu lava avangali na mhaka na xona;

⁶ xiyendlile lesvaku madoropa ya Sodoma na Gomora, mahundzuka nkuma mayavanyiseliwa kulova, ximayendla xitsundzuxu ka lava vangatakala vangali na mhaka na xona.

⁷ Nasvona xiponisile Loti munhu wolulama, loko yena atwile kuvava hi mhaka ya svilo sva tingana lesvi asviyendliwa hi vanhu lavobiha;

⁸ hikuva svilo lesvi munhu lweyi wolulama asvivoneke ni kusvitwa loko ali karhi ahanya xikarhi ka vona, svimukarhatile ngopfu moyeni wa yena masiku hinkwawu, akarhateka hi mhaka ya mahanyela ya vona layohomboloka.

⁹ Lesvi svihlaya lesvaku Hosi yasvitiva kuponisa vanhu va vukhongeli kukarhatekeni ka vona, ni kutshika vanhu lavohomboloka na vali kubiweni kufikela siku ra kuyavanyisa,

¹⁰ ngopfungopfu lavalandzaka sva nyama, vanavela kutitsakisa hi svilo sva chaka, vasandza ni vuhosi bza Xikwembu. Vanhu lava vatitshemba ngopfu, nasvona vatitiva; avachavi kusandza sva le henhla lesvikwetsimeke.

¹¹ Kasi tintsumi, hambilesvi tivatlulaka hi vukulu ni matimba, atihumesi marito ya kuvayavanyisa hi kuvasandza mahlweni ka Hosi.

¹² Kambe vanhu lava vafana ni sviharhi lesvipfumalaka kuyanakanya, sviharhi sva nhova svopsaleliwa kukhomiwa ni kudlayiwa ntsena; vasandza timhakeni leti vangativiki nchumu ka tona, kutani vatahelisiwa hi kuhelisiwa loku kufanaka ni ka sviharhi.

¹³ Vatayamukela hakelo yobiha, hilaha vangayendla svobiha hakona. Vakuma svivatsakisa vona kucina mintlangu, vanwa nhlekanhi hinkwawu. I svivati, ni svisandzu vanhwini. Ni loko vali na n'wina minkhubzini, vona vatsakela kucina ni kunwa ngopfu.

¹⁴ Va ni mahlo lawa mataleke hi vunghwavana, lawa manga ni torha ra svijoho. Varhiya mimoya leyingatiyangiki. Va ni timbilu leti toloveleke makolo. I vanhu lavarhukiweke hi Xikwembu.

¹⁵ Vatshikile ndlela leyinene, valandza ndlela ya Balamu n'wana Beyori, lweyi arhandzeke bindzu hi kuyendla lesvohomboloka.

¹⁶ Kambe aholoveliwile hikolaho ka xijoho xa yena n'winyi; mbongolo leyingakotiki kuvulavula yivulavulile hi rito rofana ni ra munhu, yisivela muprofeta kuhlanyeni ka yena.

¹⁷ Vanhu lava i svihlovo svopfumala mati; i hunguva leyifambisiwaka hi xidzedze; munyama lowukulu ngopfu wuvayimelile.

¹⁸ Vatlakusa rito ni kutidzunisa ngopfu hi svilo sva hava; hi kunavela lokobiha ka sva manyala sva laha misaveni, vaphasa vanhu lava vaha kuponaka mavokweni ya valahleki.

¹⁹ Vavatshembisa kutshunxeka, kambe vona hi voxe i svikarawa sva lesvibolaka; hikuva munhu i xikarawa xa xilo xihi ni xihi lexi ximuhlulaka.

²⁰ Hikuva, loko vanhu vapona chakeni ra misava hi kutiva Hosi ya hina ni Muponisi Yesu Kriste, kutani vatlhela vaphasiwa ni kuhluliwa hi svona, xiyimu xa vona xohetelela xibihile kutlula lexosungula.

²¹ Asvitava sviyampsile ka vona loko vangativanga ndlela ya kululama, handle ka loko vayitivile kutani vatlhelela ndzhaku vatshika Nawu lowohlawuleka lowu vanyikiweke wona.

²² Svivahumelele hilaha xihlayahlaya xa ntiyiso xihlayeke hakona, loko xiku: “Mbzana yivuyela mahlanteni ya yona.” Nasvona: “Khumba, loko rihlampsiwile, ritlhela ripuluvundza madakeni!”