2 Petro 1 - Testamente Leyimpsha Xichangana

Kuxeweta

¹ Mina Simoni Petrosi, nandza ni mupostola wa Yesu Kriste, nitsalela lavanyikiweke kupfumela loku hi risima leriringanaka ni kupfumela ka hina, hi kululama ka lweyi anga Xikwembu ni muponisi wa hina Yesu Kriste, nili:

² Timpsalu ni kurhula asvive na n'wina svimitalela, kutiveni ka Xikwembu ni ka Yesu Hosi ya hina.

Ta kuvitaniwa ni kuhlawuliwa hi Xikwembu

³ Hi matimba ya vukwembu bza yena, Kriste ahinyikile svilo hinkwasvu lesvi svihipfunaka kuhanya vutomi bza vukhongeli, hi mhaka ya kutiva lweyi ahivitaneleke kukwetsimeni ka yena ni le kudzunekeni ka ntiyiso.

⁴ Hi ndlela leyi hinyikiwile svitshembiso sva Hosi lesvikulu ngopfu, sva risima, lesvaku ha svona mitakota kupona kuwonhekeni lokunga kona misaveni hikolaho ka kunavela lokobiha, mihundzuka lavayaveliweke vutomi lebzi bzihumaka ka Xikwembu.

⁵ Hikolaho ka svona svosvo, yendlani hi matimba hinkwawu kuseketela kupfumela ka n'wina hi vunene, vunene bzona mibziseketela hi vutivi,

⁶ miseketela vutivi hi kutikhoma, ni kutikhoma hi kutiyisela, ni kutiyisela hi vukhongeli,

⁷ ni vukhongeli hi kutsakelana ka vuxaka, ni kutsakelana ka vuxaka hi rirhandzu.

⁸ Hikuva loko mili ni svilo lesvi, ni loko svimitalela svikula, svitayendla lesvaku mingalolohi kumbe kupfumala mihandzu, kutani svitamifikisa kutiveni loku kuhetisekeke ka Hosi ya hina Yesu Kriste.

⁹ Hikuva lweyi apfumalaka svilo lesvi, afile mahlo, angavoni kule, nasvona wakohlwa lesvaku asusiwile svijoho sva yena sva khale.

¹⁰ Hikolaho, vamakwerhu, hisekelani ngopfungopfu kutiyisa kuvitaniwa ni kuhlawuliwa ka n'wina, hikuva loko miyendla svosvo amingaphariyetiwi miwa ni siku ni rin'we.

¹¹ Hi ndlela yoleyo, mitanyikiwa mfanelo hinkwayu ya kunghena Mfun'wini lowungaheliki wa Hosi ni muponisi wa hina Yesu Kriste.

¹² Hikolaho, hi masiku hinkwawu, ninavela kutshama na nili karhi ni mitsundzuxa timhaka leti, hambilesvi mititivaka ni kutiyisela ntiyisweni lowu minga na wona.

¹³ Niyanakanya lesvaku svilulamile kumipfuxa hi kumitsundzuxa svilo lesvi, loko nahali mirini lowu.

¹⁴ Hikuva nasvitiva lesvaku kurhurha ka mina mirini lowu wa mina kule kusuhi, hilaha Hosi ya hina Yesu Kriste anikombeke hakona.

¹⁵ Kutani niringeta kuyendla lesvaku mitsundzuka timhaka leti minkama hinkwayu; mitatiyanakanya ni loko nitava nifambile.

Ta lavavoneke kukwetsima ka Yesu hi mahlo

¹⁶ Ahilandzanga svihitana svoyendliwa hi vutlhari, loko himitivisile ta kuhumelela ka Hosi ya hina Yesu Kriste hi matimba; hina hi timboni ta vukulukumba bza yena, lebzi hingabzivona hi mahlo.

¹⁷ Hikuva siku leri anganyikiwa kudzuneka ni kutwala hi Xikwembu Tatana, rito rifikile ka yena rita hi kukwetsima loku kuhlamalisaka, riku: “Lweyi i N'wananga, lweyi nimurhandzaka, lweyi ni mutsakelaka.”

¹⁸ Kutani hina hiritwile rito leri, loko rihuma tilweni, hikuva ahili na yena ntshaveni Leyokwetsima.

¹⁹ Hikolaho, rito ra vaprofeta, hina hirikuma ritiyile kutlula ni khale. Mitava miyendla svona loko mihlayisa svinene rito lero, kufana ni rivoni lerivoningaka lomu kunga ni munyama, kufikela loko vurhonga bzitsuvuka, ni loko nyeleti ya mixo yihumelela timbilwini ta n'wina.

²⁰ Henhla ka hinkwasvu, mifanela kutwisisa lesvaku kuhava marito ya vaprofeta Matsalweni lawa munhu angamahlamuselaka hi kutisungulela.

²¹ Hikuva kuhava rito ni rin'we ra vaprofeta leriteke hi kutitwa ka munhu, kambe vanhu lavahuhuteliweke hi Moya Lowokwetsima, vavulile lesvihumaka ka Xikwembu.