1 Vatesalonika 2 - Testamente Leyimpsha Xichangana

Ta ntirho wa Pawulo le Thesalonika

¹ Na n'wina vamakwerhu, masvitiva lesvaku kuyamukeliwa ka hina hi n'wina akuvanga ka mahala.

² Hambi loko hirhange hi xanisiwa ni kurhuketeliwa le Filipi, hilaha misvitivaka hakona, Xikwembu xa hina xihinyikile matimba ya kumitivisa Evhangeli leyihumaka ka xona, hambilesvi lavotala avali karhi valwa na yona.

³ Hikuva kukhutaza ka hina ahi loku kuhumaka kutikanganyiseni, kumbe ka miyanakanyu yobiha, nasvona ahitirhisi makungu yokanganyisa munhu;

⁴ kambe, tani hi lesvi Xikwembu xihivoneke na hili lavafanelaka kutamelisiwa ntirho wa Evhangeli, hayipaluxa, kungali kutsakisa vanhu, kambe kutsakisa Xikwembu lexikambelaka timbilu ta hina.

⁵ Masvitiva svinene lesvaku ahiringetanga, ni siku ni rin'we, kumitsakisa kumbe kumikanganyisa hi marito, hambi kuli kufihla kunavela kuphanga. Xikwembu i mboni ya hina!

⁶ Ahilavanga kudzunisiwa lokuhumaka ka vanhu, hambi kuli ka n'wina kumbe ka van'wana;

⁷ hambilesvi ahitava hisvikotile kumitikisela hi svikombelo sva hina, hi mhaka ya kuva vapostola va Kriste, hihanyisane na n'wina hi moya wa timpsalu, kukotisa mamana lweyi ahlayisaka svinene vana va yena.

⁸ Hikolaho, hi kunavela ngopfu kumikomba rirhandzu, hitilungiselile kuhlengela na n'wina kungali ntsena Evhangeli ya Xikwembu, kambe nabzona vutomi bza hina, hikuva mihundzukile varhandziwa va hina hi kutlulisa.

⁹ Vamakwerhu, matsundzuka kutikarhata ni kukarhateka ka hina ntirhweni lowu: Hitirhile vusiku ni nhlekanhi lesvaku hingatikiseli na mun'we wa n'wina, loko hili karhi himipaluxela Evhangeli ya Xikwembu.

¹⁰ Mi timboni ta hina, na xona Xikwembu i mboni: Mahanyela ya hina ka n'wina lavapfumeleke, amali lawa ya kubasa ni lawa ya kululama, mangali na xisandzu.

¹¹ Masvitiva lesvaku hihlayisile mun'wana ni mun'wana wa n'wina kufana ni loko tatana ahlayisa vana va yena;

¹² hi mikhutazile, hi mitiyisile ni kumisusumeta lesvaku mihanya hi ndlela leyitsakisaka Xikwembu lexi ximivitanelaka kuyaveliwa kufuma ka xona ni kutwala ka xona.

¹³ Kutani mhaka leyi yihisusumetaka kukhensa Xikwembu masiku hinkwawu, hi leyi: Loko himitisele rito ra Xikwembu, miriyingisile ni kuriyamukela, kungali kukota mahungu ya kuhuma ka vanhu, kambe tani hi mahungu ya kuhuma ka Xikwembu. Hakunene mahungu lawa mahuma ka xona, hikuva hi xona xitirhaka hi matimba xikarhi ka n'wina lavapfumeleke.

¹⁴ Loko mili n'wina vamakwerhu, mikumane ni miringo leyingatshama yihumelela xikarhi ka vanhu va ka Yesu Kriste tikerekeni ta Yudeya: Vayuda vavaxanise kufana ni lesvi vanhu va ka n'wina vangamiyendla svona.

¹⁵ Vayuda hi vona lavadlayeke Hosi Yesu ni vaprofeta, kutani na hina vahixanisile; avatsakisi Xikwembu, nasvona valwa ni vanhu hinkwavu.

¹⁶ Varingetile ni kuhisivela kuchumayela ka vamatiko mahungu lawa amatavaponisa, kutani hi mukhuva lowu vakulisile nandzu wa svijoho sva vona masiku hinkwawu; kambe svosvi, kuheteleleni, kukariha ka Xikwembu kuvawele henhla.

Ta Pawulo loko anavela kutlhelela Thesalonika

¹⁷ Loko hili hina vamakwerhu, hikalanile na n'wina nkamanyana hi lesvi ahingavonani hi mahlo, kambe hi timbilu ahili karhi hivonana, kutani hinavelile hi kunavela lokukulu kutlhela hivonana na n'wina.

¹⁸ Hikolaho hinavelile kutlhelela ka n'wina. Mina Pawulo niringetile makhambi mambirhi, kambe Sathana ahisivelile.

¹⁹ Xana hi kwihi kulangutela ka hina ni kutsaka ka hina, hi yihi hari ya kuhlula leyi hingatatidzunisa ha yona mahlweni ka Hosi ya hina Yesu, siku avuyaka ke? Xana ahi n'wina ke?

²⁰ Hakunene, hi n'wina minga kudzuneka, ni kutsaka ka hina.