1 Vatesalonika 1 - Testamente Leyimpsha Xichangana

Kuxeweta

¹ Mina Pawulo na Silvhano na Timotewu ka va kereke ya le Thesalonika, lavanga vanhu va Xikwembu Tatana, ni va Hosi Yesu Kriste, hili: Timpsalu ni kurhula asvive na n'wina!

Ta vutomi ni kupfumela ka va le Thesalonika

² Hikhensa Xikwembu masiku hinkwawu hikolaho ka n'wina hinkwenu, na hili karhi hi mitsundzuka ka mikhongelo ya hina.

³ Mahlweni ka Xikwembu Tatana wa hina, hitsundzuka hilaha kupfumela ka n'wina kutikombeke hakona hi sviyendlo, ni lesvaku michivirika kulanguteleni ka Hosi ya hina Yesu Kriste, hi rirhandzu ni kutikarhata.

⁴ Hasvitiva, vamakwerhu, lesvaku Xikwembu xa mirhandza, ni lesvaku ximihlawulile.

⁵ Hikuva Evhangeli ya hina, ayifikanga ka n'wina hi marito ntsena, kambe hi matimba, ni Moya Lowokwetsima, ni kukholwisa ka yona loku kuhetisekeke, tani hilaha mitivaka hakona lesvi hihanyisaniseke xisvona na n'wina.

⁶ Kutani na n'wina milandzile tindlela ta hina ni ta Hosi, hikuva, hambilesvi mingaxaniseka ngopfu, miyamukelile Rito ra Xikwembu hi kutsaka loku kunyikiwaka hi Moya Lowokwetsima.

⁷ Hi mukhuva wolowo, mihundzukile xikombiso ka hinkwavu lavapfumeleke le Makedoniya ni le Akaya.

⁸ Hikusa Rito ra Hosi lerihumeke ka n'wina aritwalanga ntsena Makedoniya ni le Akaya, kambe nakona kupfumela ka n'wina ka Xikwembu kutwalile hinkwaku; hi kolaho asvifaneli lesvaku hingahahlaya xanchumu.

⁹ Vanhu lava hinkwavu varungula hilaha mihiyamukeleke hakona xikarhi ka n'wina, ni hilaha mingahundzuka hakona ka Xikwembu, mifularhela svikwembu sva hava, lesvaku mitirhela Xikwembu lexihanyaka, xa ntiyiso.

¹⁰ Nasvona milangutela kuta ka N'wana wa xona Yesu hi le matilweni, lweyi ximupfuxeke xikarhi ka vafi, lweyi ahiponisaka kuyavanyiseni ka xona loku kutaka.