1 Vakorinto 9 - Testamente Leyimpsha Xichangana

Vutshunxeki ni timfanelo ta mupostola

¹ Xana anitshunxekanga ke? Xana ani mupostola ke? Anivonanga Yesu Hosi ya hina xana? Xana ahi n'wina mihandzu ya ntirho wa mina Hosini ke?

² Hambi loko ka van'wana ningali mupostola, ka n'wina ni yena, hikuva mi xikombiso xa vupostola bza mina Hosini.

³ Kutihlamulela ka mina ka lava vanithethisaka hi loku:

⁴ Xana ahi na mfanelo ya kuja ni kunwa?

⁵ Xana ahi na mfanelo ya kufambafamba na hili ni nsati lweyi anga makwerhu Hosini, tani hi lesvi vapostola van'wana vayendlisaka svona, ni vamakwavu va Hosi, na Petrosi ke?

⁶ Xana hi hina ntsena, mina na Barnabasi, lava hikalaka mfanelo yotshika kutirha ke?

⁷ I mani lweyi atshamaka aya nyimpini hi kutihakelela hi yexe xana? I mani lweyi abzalaka mvhinya, kutani angaji mihandzu ya wona ke? I mani lweyi abzisaka ntlhambi, anganwi ntswamba wa wona xana?

⁸ Xana nihlaya lesvi hi mpfumelelo wa vanhu ke? Xana Nawu awuhlayi svosvo na wona ke?

⁹ Nawini wa Moxe kutsaliwile lesvi: “Ungatshuki usiva nomo wa homu loko yili karhi yihula”. Xana Xikwembu xikhatalela tihomu ke?

¹⁰ Xana axihlayi timhaka leti ngopfungopfu hikolaho ka hina ke? Ina, titsaliwile hikolaho ka hina, hikuva murimi afanele kurima na ali ni kulangutela, ni muhuli afanele kuhula na ali ni kulangutela lesvaku atayaveliwa sva yena.

¹¹ Xana loko himibzalela mbewu ya moya, xana i mhaka leyikulu loko hitshovela sva misava leyi ka n'wina ke?

¹² Loko vanhu van'wana vakuma timfanelo ka n'wina, xana hina ahi na kutikuma kutlula vona ke? Hambi svilitano, ahitirhisanga timfanelo leti. Hisviyamukelile hinkwasvu, lesvaku hingatshuka hihingakanya ndlela ya Evhangeli ya Kriste.

¹³ Xana amisvitivi lesvaku lavatirhaka sva mintirho ya Tempele vaja svakuja sva le Tempeleni, ni lesvaku lavatisaka timhamba alitarini vayaveliwa sva tona ke?

¹⁴ Hi ndlela leyo, Hosi yilerisile lavapaluxaka Evhangeli lesvaku vakuma svotihanyisa hi ntirho lowu wopaluxa Evhangeli.

¹⁵ Kambe mina anitirhisanga ni yin'we ya timfanelo leti. Nasvona anitsali lesvi kuyendlela lesvaku nititirhisa; hikuva ka mina svingayampsa kufa, kutlula kuyendlisa svona; mhakeni leyi, aku na munhu lweyi anganitekelaka kutidzunisa ka mina.

¹⁶ Loko nipaluxa Mahungu Lamanene, ahi lesvi ningatidzunisaka ha svona, hikuva svaniboha kumapaluxa; i khombo ka mina loko ningatwalisi Evhangeli!

¹⁷ Loko ingi nitirha ntirho lowu hi kutihlawulela, nikuma hakelo ka wona; kambe lesvi niwutirhaka na ningatihlawulelanga, svihlaya lesvaku niyorhwexiwa wona.

¹⁸ Kutani-ke, hakelo ya mina hi yihi ke? I kupaluxa Evhangeli ka vanhu, na ningalavi hakelo; i kutsika hi nexe mfanelo ya mina yohakeliwa ntirhweni lowu wopaluxa Evhangeli.

¹⁹ Hambi loko ningali xikarawa xa munhu ni mun'we, nitiyendlile xikarawa xa hinkwavu, lesvaku nitakota kukoka lavanyingi xikarhi ka vona.

²⁰ Ka Vayuda ni tiyendlile Muyuda, lesvaku nitakota kukoka Vayuda. Ka lava vanga hansi ka Nawu ni tiyendlile lweyi anga hansi ka wona, hambilesvi mina hi nexe ningaliki hansi ka Nawu, lesvaku nitakota kukoka lava vangahansi ka Nawu.

²¹ Ka lava vanga handle ka Nawu, nitiyendlile lweyi anga handle ka wona, lesvaku nitakota kukoka lava vanga handle ka Nawu (hambilesvi ningaliki handle ka Nawu wa Xikwembu, kambe ninga nawini wa Kriste).

²² Ka lavanga ni gome, nitiyendlile lweyi anga ni gome, lesvaku nitakota kukoka lava vanga ni gome. Kutani-ke, nitiyendlile hinkwasvu ka hinkwavu, lesvaku hi tindlela hinkwatu nitakota kuponisa van'wana.

²³ Niyendla hinkwasvu lesvi hikolaho ka Mahungu Lamanene, lesvaku nikota kuyaveliwa minkateko ya wona.

²⁴ Xana amisvitivi lesvaku, hambi loko lavaphikizanaka hi kutsutsuma rivaleni ra mintlangu vatsutsuma hinkwavu, kambe lweyi akumaka hakelo i mun'we ntsena ke? Tsutsumani hi ndlela leyi yingatamipfuna kukuma hakelo yakona.

²⁵ Hinkwavu lavaphikizanaka mintlangwini, vatikhoma hi matlhelo hinkwawu. Vayendla svosvo lesvaku vatakuma hari leyiwonhekaka; kambe hina hilava leyi yingawonhekiki.

²⁶ Hikolaho, mina anitsutsumi muhulahula; anibi xibakela tani hi munhu lweyi abaka moya ntsena;

²⁷ kambe nixanisa miri wa mina, niwuyendla xikarawa, lesvaku ningakumeki na nili lweyi atsandzekaka, ndzhaku ka loko mina nitava nijondzisile van'wana.