1 Vakorinto 8 - Testamente Leyimpsha Xichangana

Ta svakuja lesvihumeseliwaka svikwembu sva hava

¹ Hi mhaka ya svakuja lesvihumeseliwaka svikwembu sva hava, hitala kuvula lesvaku hi ni vutivi hinkwerhu. Kambe vutivi bzotano bzinyika munhu kutikulisa, kasi rirhandzu rayaka.

² Loko munhu ayanakanya lesvaku ativa xanchumu, angasitiva nchumu hilaha afanelaka kutiva hakona.

³ Kambe loko munhu arhandza Xikwembu, ativiwa hi xona.

⁴ Loko kuli kuja lesvihumeseliweke svikwembu sva hava, hitiva lesvaku “xikwembu xa hava ahi xilo xanchumu misaveni” ni lesvaku “ku ni Xikwembu xili xin'we ntsena, axi kona xin'wana.”

⁵ Hambi loko svilo svohlayiwa “svikwembu”, svili kona tilweni kumbe misaveni kufana ni lesvi kunene svikwembu svingatala ni tihosi tingatala

⁶ kambe ka hina ku ni Xikwembu xin'we ntsena, Tatana lweyi svilo hinkwasvu svihumaka ka yena, na hina hihanyelaka yena; nasvona ku ni Hosi yin'we ntsena, Yesu Kriste lweyi hinkwasvu svitumbulukaka hi le ka yena, na hina hihanyaka hikolaho ka yena.

⁷ Ahi hinkwavu lava vanga ni vutivi lebzi; lesvi vanhu van'wana vahatoloveleke svikwembu sva hava, vaja svakuja sva vona kufana ni loko svili lesvihumeseliweke svikwembu lesvi, kutani ripfalu ra vona richakile hikolaho ka gome ra vona.

⁸ Svakuja asvingahitshineti kusuhi ni Xikwembu; hambi loko hingaji, ahilahlekeliwi hi nchumu, hambi loko hija, ahibindzuli nchumu.

⁹ Kambe tivoneleni lesvaku vutshunxeki bza n'wina lebzi, bzingahundzuki xikhunguvanyiso ka lava vanga ni gome.

¹⁰ Hikuva loko munhu lweyi anga ni gome akuvona wena lweyi unga ni vutivi, na uli karhi uja sva svikwembu sva hava atempeleni ya svona, xana munhu lweyi angakala angatiyisiwi ripfalwini ra yena, kuja lesvihumeseliweke svikwembu svosvo ke?

¹¹ Kutani makwenu lweyi anga ni gome, lweyi Kriste amufeleke, wawonhaka hi mhaka ya vutivi bza wena.

¹² Loko mijohela vamakwenu hi ndlela leyi, ni kuwonha mapfalu ya vona lawa manga ni gome, mijohela Kriste.

¹³ Hikolaho, loko svakuja svikhunguvanyisa makwerhu, ningakala ningahaji nyama ni siku ni rin'we, lesvaku ningatshuki nivangela makwerhu kukhunguvanyeka.