1 Vakorinto 7 - Testamente Leyimpsha Xichangana

Tinhlamulu ka svivutiso mayelanu ni ta vukati

¹ Loko tili timhaka leti minganitsalela tona ningaku: Svilulamile loko wanuna angativani ni wansati.

² Kambe hikolaho ka kutala ka vuwosvi, wanuna mun'wana ni mun'wana aave ni nsati lweyi anga wa yena, ni wansati mun'wana ni mun'wana aave ni nuna lweyi anga wa yena.

³ Nuna aanyike nsati lesvi svinga mfanelo ya yena, na yena nsati asvive tano ka nuna wa yena.

⁴ Nsati anga na matimba ya kufuma miri wa yena, kambe matimba ma le ka nuna. Na yena wa nuna, anga na matimba ya kufuma miri wa yena, matimba ma le ka nsati.

⁵ Mingatshukeni miyalelana, kungava loko kuli hi kupfumelelana, kumbexana mingayalelana nkamanyana, kuli hi kutwanana, loko milava kutinyiketa kukhongeleni kutani ndzhaku mitlhela mivuyelelana. Sathana angatshuki amiringa hikolaho ka kutsandzeka ka n'wina kutikhoma.

⁶ Nihlaya lesvi hi kulava kumivevukisela, wungali nawu.

⁷ Anitanavela lesvaku hinkwavu vanhu vangafana na mina! Kambe mun'wana ni mun'wana a ni nyiko leyi yinga ya yena, leyihumaka ka Xikwembu, mun'wana hi ndlela leyi, mun'wana hi ndlela liya.

⁸ Nibzela lava vangasitekaka kumbe kutekiwa, ni vafelakazi, lesvaku svingava svisasekile ka vona loko vatitshamela ntsena kukotisa mina.

⁹ Kambe loko vatsandzeka kutikhoma, avateke kumbe kutekiwa, hikuva svayampsa kuteka kumbe kutekiwa, kutlula kuhanya hi kuhisiwa hi kunavela.

¹⁰ Kambe lavatekaneke, na valerisa, kungali mina, kambe yili Hosi, nili: Nsati angatshuki ahambana ni nuna.

¹¹ Hambi svilitano loko atshuka ahambana ni nuna, aatshamise svosvo angahatekiwi, kumbe aatlhele avuyelelana ni nuna wa yena; nuna na yena angatshuki atshika nsati.

¹² Loko vali lavan'wana, mina kungali Hosi nili: Loko mun'we ka vamakwerhu Hosini ali ni nsati lweyi angaliki mupfumeli, kutani loko nsati lweyi apfumela kuya mahlweni ahanya na yena, nuna wakona angamutshiki;

¹³ ni loko wansati ali ni nuna lweyi angaliki mupfumeli, kutani nuna lweyi apfumela kuya mahlweni ahanya na yena, nsati wakona angatshiki nuna.

¹⁴ Hikuva nuna lweyi angaliki mupfumeli ayendliwa mukwetsimi wa Xikwembu hikolaho ka nsati, ni nsati lweyi angaliki mupfumeli ayendliwa mukwetsimi wa Xikwembu hi lesvi nuna wa yena anga mukriste. Loko svingali tano, avana va n'wina avatava vanyamile, kasi svosvi vakwetsimile.

¹⁵ hambi svilitano, loko lweyi angaliki mupfumeli alava kuhambana ni lweyi anga mupfumeli, aahambane na yena: Mukriste waxinuna kumbe waxisati, angabohekanga loko timhaka tifamba hi ndlela leyo. Kambe loko mili n'wina, Xikwembu ximivitanile kuhanya hi kurhula.

¹⁶ Hikuva wena nsati, usvitivisa kuyini, kumbexana ungaponisisa nuna wa wena ke? Na wena wa nuna, usvitivisa kuyini, kumbexana ungaponisisa nsati wa wena ke?

Kuhanya loku hilerisiweke kona hi Hosi

¹⁷ Mun'wana ni mun'wana aahanye hilaha Hosi yimunyikeke hakona, ni le ka xiyimu lexi aali ka xona loko Xikwembu ximuvitana. Nilerisa tikereke hinkwatu.

¹⁸ Xana munhu avitaniwile na ayimbile ke? Aatshamisise xisvolesvo. Xana avitaniwile na angayimbanga? Angatshuki ayimba.

¹⁹ Kuyimba, ni kuva munhu angayimbanga, ahi nchumu, svafana; mhaka i kuhlayisa milawu ya Xikwembu.

²⁰ Mun'wana ni mun'wana aayime xiyin'weni lexi aali ka xona loko avitaniwa.

²¹ Xana awuli xikarawa loko uvitaniwa? Ungavileli hi svona; kambe loko utshuka ukuma nkateko wotlhantlhiwa, wutirhise.

²² Hikuva lweyi avitaniweke kuva wa Hosi na ali xikarawa, i mutlhantlhiwa wa Hosi; ni lweyi avitaniweke na ali mutlhantlhiwa i xikarawa xa Kriste.

²³ Mixaviwile hi nxavu lowukulu; mingaveni svikarawa sva vanhu.

²⁴ Vamakwerhu, munhu mun'wana ni mun'wana aayime na ali ni Xikwembu matshameleni lawa aali ka wona loko avitaniwa.

Ta lava vangasitekaka kumbe kutekiwa, ni ta vafelakazi

²⁵ Hi tlhelo ra lava vangasikiteka kumbe kutekiwa; a ni na Nawu wohuma ka Hosi, kambe nihlaya ntsena mavonela ya mina, hikuva nili munhu lweyi ayamukeleke timpsalu ta Hosi kuva lweyi wa kutshembeka.

²⁶ Kutani niyanakanya lesvaku, hikolaho ka maxangu ya minkama leyi, svingava svilulamile loko munhu atshama na ali svolesvi anga xisvona.

²⁷ Xana utekile nsati? Ungalavi kutintlhantlha ka yena. Xana awu na nsati? Ungalavi nsati.

²⁸ Hambi svilitano, loko uteka, awujohi; ni nhwanyana, loko atekiwa, angajohi; kambe volavo vataxaniseka misaveni, kutani mina nilava kumilamulela ka svosvo.

²⁹ Nimibzela mhaka leyi, vamakwerhu: Nkama lowusaleke wukomile. Kusukela svosvi, lava vanga ni vasati vafanele kuyendla ingi hi loko vangali na vona;

³⁰ lavarilaka vafanele kuyendla ingi hi loko vangarili; ni lavatsakeke, ingi hi loko vangatsakanga; ni lava vaxavaka, ingi hi loko vangali na nchumu;

³¹ ni lavatirhisanaka ni sva misava leyi avave kufana ni loko vangatirhisani na svona; hikuva misava leyi ni sva yona hinkwasvu svahundza.

³² Nilava lesvaku mingavi na svivilelo. Lweyi akalaka angatekanga atikarhatela sva Hosi, kuvona hilaha angatsakisaka Hosi hakona;

³³ kambe lweyi atekeke atikarhatela sva misava, kuvona hilaha angatsakisaka nsati wa yena hakona,

³⁴ kutani akokeliwa hala ni hala. Wansati lweyi akalaka angatekiwanga, kumbe nhwanyana, atikarhatela sva Hosi, lesvaku miri ni moya wa yena sviva lesvihlawulekeke; kambe wansati lweyi atekiweke atikarhatela sva misava leyi, kuvona hilaha angatsakisaka nuna wa yena hakona.

³⁵ Nivula lesvi kumipfuna, kungali kumisivelasivela, kambe kuyendlela lesvaku svilo hinkwasvu svifamba khwatsi, mitinyiketa kutirhela Hosi, mingayanakanyi svin'wana.

³⁶ Loko munhu ayanakanya lesvaku angahanyi hi ndlela yakona ni nhwanyana wa yena, ni loko kunavela ka yena kuli lokukulu, aayendle hilaha arhandzaka hakona loko svifanele kuva tano. Avatekani, aku kona kujoha ka svona.

³⁷ Kambe loko wanuna ayima atiyile mbilwini ya yena, angali na lexi ximusindzisaka kambe akota kutikhoma hi yexe, atava ayendla svona loko atiboha mbilwini ya yena kutshamisa xisvosvo angateki nhwanyana wa yena.

³⁸ Hikolaho, lweyi atekisaka n'wana wa yena wanhwanyana, ayendla svona; kambe lweyi angamutekisiki, ayendla svona lesvitlulisaka.

³⁹ Wansati abohiwile ka nuna wa yena loko nuna ahahanya; kambe loko nuna wa yena afa, atshunxekile, angahatekiwa hi lweyi alavaka kutekiwa hi yena, ntsena asvifambe hilaha Hosi yisvi rhandzaka hakona.

⁴⁰ Hambi svilitano, asvitayampsa ka yena loko atitshamela ntsena angatekiwi; svosvo i miyanakanyu ya mina, nasvona nakholwa lesvaku na mina ni ni Moya wa Xikwembu.