1 Vakorinto 6 - Testamente Leyimpsha Xichangana

Mingaphikizaneni mahlweni ka vamatiko!

¹ Loko mun'we wa n'wina ali ni mhaka ya kuphikizana ni mun'wana, hikolaho ka yini angachavi kuyisa mhaka ya yena ka vamatiko lesvaku vayitsema, matshan'wini ya kuyiyisa ka vakwetsimi va Xikwembu xana?

² Xana amisvitivi lesvaku vakwetsimi va Xikwembu vatayavanyisa misava ke? Kutani loko misava yiyavanyisiwa hi n'wina, xana asvimilulamelanga kuyavanyisa mintengonyana leyitsongo ke?

³ Xana amisvitivi lesvaku hitayavanyisa tintsumi ke? Svakuyavanyisa timhaka ta siku rin'wana ni rin'wana svona ahahahlayi.

⁴ Loko mili ni mintengo leyikongomaka ta vutomi bza siku rin'wana ni rin'wana, xana mitahlawula vayavanyisi lavangaliki nchumu kerekeni ke?

⁵ Nivulisa svosvo kumikhomisa tingana. Xana hakunene aku na mun'we wotlhariha xikarhi ka n'wina, lweyi akotaka kuyavanyisela munhu ni makwavu Hosini timhaka ta vona ke?

⁶ Xana hakunene munhu angayamangalela makwavu, nasvona sviyendliwa mahlweni ka lava vangaliki vapfumeli ke?

⁷ Mhaka yakona hi lesvaku kumangalelana ka n'wina kukomba kuhluleka ka n'wina ni svosvi. Matshan'wini ya svona, hikolaho ka yini mingapfumeli kuwonheliwa? Ha yini mingapfumeli kukanganyisiwa ke?

⁸ Kasi hi n'wina miwonhelaka van'wana, hi n'wina mikanganyisaka, kutani svosvo misviyendla ni le ka vamakwenu Hosini!

⁹ Xana amisvitivi lesvaku lavohomboloka vangakala vangaji ndzhaka ya Mfumu wa Xikwembu, ke? Mingatshukeni mitikanganyisa: Loko ali lavobiha, ni lavagandzelaka svikwembu svokala svingali svona, ni vunghwavana, ni vavanuna lavayendlaka sva tingana ni vavanunakulobze,

¹⁰ ni vayivi, ni vaphangi, ni svidakwa, ni va kurhuketela, ni vakanganyisi, vangakala vangaji ndzhaka ya Mfumu wa Xikwembu.

¹¹ Hi lesvi van'wana va n'wina amili svona; kambe svosvi mibasisiwile, nasvona miyendliwile lavahlawulekeke ni lavalulameke, hi vito ra Hosi Yesu Kriste ni Moya wa Xikwembu xa hina.

Dzunisani Xikwembu hi miri wa n'wina!

¹² q Munhu angaku: “Svilo hinkwasvu ka mina svapfumeleleka.” Ina, kambe ahi hinkwasvu lesvipfunaka. “Svilo hinkwasvu ka mina svapfumeleleka”, kambe ningakala ningafumiwi hi xin'we xa svona.

¹³ Mun'wana angaku: “Svakuja i sva khwiri, kutani khwiri i ra svakuja.” Ina, kambe Xikwembu xitasvihelisa hi vumbirhi bza svona. Miri awuvumbeliwanga vunghwavana, kambe wuvumbeliwe Hosi, ni Hosi i hosi ya miri.

¹⁴ Xikwembu xipfuxile Hosi kufeni, na hina xitahipfuxa hi matimba ya xona.

¹⁵ Xana amisvitivi lesvaku, miri wa n'wina, i svirho sva miri wa Kriste ke? Xana ningateka svirho sva miri wa Kriste, nisviyendla svirho sva nghwavana ke? Ihim, nikutsongo!

¹⁶ Xana amisvitivi lesvaku lweyi atihlanganisaka ni nghwavana atiyendla miri wun'we na yona ke? Hikuva tsalwa rite: “Lavambirhi vatava nyama yin'we ntsena.”

¹⁷ Kambe lweyi atihlanganisaka ni Hosi, ayendla moya wun'we na yona.

¹⁸ Chavani vunghwavana! Xijoho xin'wana ni xin'wana lexi munhu axiyendlaka xi le handle ka miri wa yena; kambe lweyi awosvaka ajohela miri wa yena.

¹⁹ Xana amisvitivi lesvaku miri wa n'wina i tempele ya Moya Lowokwetsima lowu minga na wona, lowu Xikwembu ximinyikeke wona, ni lesvaku amitifumi, ke?

²⁰ Mixaviwile hi nxavu lowukulu; hi kolaho, dzunisani Xikwembu hi miri wa n'wina.