1 Vakorinto 5 - Testamente Leyimpsha Xichangana

Vunghwavana abzipfumeleliwi

¹ Mhaka leyi hiyitwaka, hi lesvaku ku ni vunghwavana xikarhi ka n'wina, lebzi hambi xikarhi ka vamatiko bzingaliki kona, lebzi bzifikaka laha munhu ahanyaka ni nsati wa tatana wa yena.

² Kutani mahali ni kutikulisa! Matshan'wini ya svona, hikolaho ka yini mingakarhatekanga, lesvaku lweyi ayendleke svilo lesvi asusiwa xikarhi ka n'wina, xana?

³ Loko ali mina, hambilesvi hi xiviri ninga kule na n'wina, hi moya nikona; kutani nive ni kuyavanyisa munhu lweyi ayendleke mhaka leyochavisa leyi, kufana ni loko nili kona koseyo.

⁴ Ahihlanganeni hi vito ra Hosi ya hina Yesu, mina na n'wina, mina niva kona hi moya; kutani, hi matimba ya Hosi ya hina Yesu, nili:

⁵ Munhu wotanu aanyiketiwe ka Sathana, lesvaku miri wa yena wuhelisiwa, ni lesvaku moya wa yena wuponisiwa hi siku ra Hosi.

⁶ Kutidzunisa ka n'wina akululamanga! Xana amisvitivi lesvaku comelanyana leritsongo rikukumukisa mbila hinkwayu ke?

⁷ Cukumetani comela ra khale, lesvaku mitava mbila leyimpsha. Mhaka yakona hi lesvaku amahali na comela, hikuva Kriste, lweyi anga Xinyempfana xa hina xa Paska, atlhaviwile.

⁸ Hikolaho, ahiyendleni nkhuvu kungali hi comela ra khale, kungali hi comela ra vujoho ni kuhomboloka, kambe kuli hi xinkwa xokala comela, xotenga ni xa ntiyiso.

⁹ Nimitsalelile papeleni lesvaku mingatolovelani ni vawosvi;

¹⁰ aningavuli nikutsongo kuhambana ni vanhu va misava leyi lavanga vawosvi, kumbe lavanga ni makwanga, kumbe vayivi, kumbe lavagandzelaka svikwembu sva hava; ihim, hikuva loko miyendla svosvo, asvitahlaya lesvaku mirhurha misaveni leyi.

¹¹ Lesvi animitsalela svona hi lesvaku mingatolovelani ni lweyi avuliwaka “makwerhu” kasi i muwosvi, kumbe i munhu wophanga ni makolo, kumbe i mugandzeli wa svikwembu sva hava, kumbe i murhuketeli, kumbe i xidakwa, kumbe i muyivi; munhu wofana ni lweyo, hambi kuli kuja, mingajeneni na yena.

¹² Hikuva xana i ntirho wa mina kuthethisa va le handle ke? Vatathethisiwa hi Xikwembu.

¹³ N'wina hi n'wexe mithethisa lavanga ndzeni ka kereke; amiyendlisi svosvo xana? Hlongolani lweyi wa kubiha mahlweni ka n'wina.