1 Vakorinto 4 - Testamente Leyimpsha Xichangana

Ntirho wa vapostola

¹ Loko svilitano, mifanele kuhivona tani malandza ya Kriste, ni vahendleleti va svihundla sva Xikwembu.

² Svosvi-ke, lesvilavekaka ka vahendleleti hi lesvaku munhu akumeka na ali lweyi atshembekeke.

³ Ka mina i mhaka leyitsongo ngopfu kuyavanyisiwa hi n'wina, kumbe hi huvu ya vanhu; nasvona hambi ali mina anitiyavanyisi hi noxe.

⁴ Anititwi na nili ni nandzu wa nchumu; kambe lesvi hi svona lesvi sviniyendlaka lweyi alulameke; lweyi aniyavanyisaka i Hosi.

⁵ Hikolaho mingayavanyiseleni nchumu makumu, na nkama wungasifika. Rindzelani Hosi yikondza yivuya; hi yona leyingatahumesela rivaleni svilo sva munyama lesvifihliweke, ni kupaluxa makungu ya timbilu ta vanhu; kutani hi kona mun'wana ni mun'wana angatakuma kudzunisiwa ka yena loku kuhumaka ka Xikwembu.

⁶ Hikolaho ka n'wina, vamakwerhu Hosini, lesvi hinkwasvu nisvitekile svili lesvikongomaka mina na Apolosi lesvaku hiva svikombiso, mitajondza lesvi marito lawa mahlayaka svona lawa mange: “Ungatluli lesvitsaliweke.” Nakona kungavi na mun'we wa n'wina lweyi atikulisaka hi kutsakela mun'we anyenya mun'wana.

⁷ Hikuva i mani lweyi akutlakuseke kutlula van'wana xana? Xana u na yini lexi unganyikiwangiki ke? Kutani loko unyikiwile, hikolaho ka yini utidzunisa, wonge hi loko ungasvikumanga hi kunyikiwa xana?

⁸ Anili, mili mi ni hinkwasvu lesvilavekaka! Anili, mili mihundzukile svipfundzi! Ingaku, mihundzukile tihosi hi n'wexe na mingali na hina! Mawaku loko onge mihundzukile tihosi hakunene, lesvaku na hina hitava tihosi svin'we na n'wina.

⁹ Mina nivona onge Xikwembu xivekile hina vapostola akuva hiyima hi le ndzhaku, hifana ni vanhu lava vatsemeliweke rifu, mahlweni ka tintsumi ni le ka vanhu.

¹⁰ Anili, mili hi svihunguki hina hikolaho ka Kriste, kambe n'wina mi vanhu va vutlhari ka Kriste! Anili, mili hina ahi na ntamu, n'wina mi na wona; anili, mili n'wina machaviseka ngopfu, hina hasoleka!

¹¹ Kufika svosvi hitwa ndlala ni torha, hisvelile, habukuteliwa, ahi na kaya;

¹² hitihlakata hi kutirha hi mavoko ya hina. Loko hirhukiwa, hakatekisa; loko hixanisiwa, hilehisa mbilu;

¹³ loko hilumbetiwa, hihlamula hi marito ya timpsalu. Hihundzukile chaka ra misava ni tala ra hinkwasvu lesvicukumetiwaka, kufika namuntlha.

¹⁴ Nitsala timhaka leti, kungali kumikhomisa tingana kambe kumitsundzuxa, tani vana va mina lavarhandzekaka.

¹⁵ Hikuva hambi mingava ni vajondzisi va madzanadzana ka Kriste, ami na vatatana lavanyingi; hikuva, ka Yesu Kriste, nihundzukile tatana wa n'wina hi kumitivisa Evhangeli.

¹⁶ Hikolaho, namikhongotela lesvaku mitekelela mina.

¹⁷ Hi svona lesviyendlaka lesvaku nimirhumela Timotewu, n'wana wa mina lweyi nimurhandzaka, lweyi atshembekeke Hosini; atamitsundzuxa mahanyela ya mina ka Yesu Kriste, hilaha nijondzisaka hakona ka kereke yin'wana ni yin'wana.

¹⁸ Van'wana va n'wina vatikulisa ongi hi loko nitokala ningahati seyo ka n'wina;

¹⁹ kasi nitata ka n'wina hi kuhantlisa, loko Hosi yisvirhandza; kutani hi kona ningatakuma lesvi vatikulisaka ha svona vanhu volavo kuvulavuleni ka vona, hambi ni ntamu lowu vanga na wona.

²⁰ Hikuva Mfumu wa Xikwembu ahi mhaka ya marito, i mhaka ya ntamu.

²¹ Xana milanga yini ke? Xana nifanele kuta ka n'wina ni rimpsika, kumbe hi rirhandzu ni moya wa musa ke?