1 Vakorinto 3 - Testamente Leyimpsha Xichangana

Malandza ya Xikwembu

¹ Hikolaho vamakwerhu, mina nihlulekile kuvulavula na n'wina kufana ni loko nivulavula ni lavanga va Moya; kambe ni vulavulile na n'wina kufana ni loko mili vanhu va misava ntsena, lavafanaka ni vatsongwana ka Kriste.

² Nimiwundlile hi ntswamba, kungali hi svakuja lesvitiyeke, hikuva amingasisvikota kusviminta; ni svosvi amisisvikota,

³ hikuva mahali va nyama ntsena. Hikuva, loko mavondzo ni kuholova svili kona xikarhi ka n'wina, xana amifani ni vanhu ntsena ke? Xana amihanyi kufana na vona ke?

⁴ Loko mun'we aku: “Mina, ni wa ka Pawulo” ni loko mun'wana aku: “Mina, ni wa ka Apolosi”, xana ami va nyama ke?

⁵ Apolosi i mani? Na Pawulo i mani? I malandza ntsena lawa mipfumeleke hi mhaka ya wona; mun'wana ni mun'wana wa hina aatirha lesvi Hosi yimunyikeke kusvitirha.

⁶ Mina nibzalile, Apolosi acheletelile; kambe Xikwembu hi xona ximiliseke.

⁷ Hikolaho, lweyi abzalaka ahi nchumu, hambi lweyi acheletelaka, kambe i Xikwembu, hikuva hi xona xikulisaka.

⁸ Lweyi abzalaka ni lweyi acheletelaka varingana, hambilesvi mun'wana ni mun'wana angatayamukela hakelo ya yena hi mpimo wa ntirho wa yena.

⁹ Hikuva hina hi vatirhikulobze ni Xikwembu, n'wina mi nsimu ya Xikwembu, mi yindlo ya Xikwembu.

¹⁰ Hi timpsalu leti Xikwembu xiniyaveleke tona, mina nivekile masungulu kukota muyaki lowotlhariha; svosvo mun'wana ayaka henhla ka wona. Mun'wana ni mun'wana aayake henhla ka wona hi kuxiyaxiya.

¹¹ Aku na munhu lweyi angavekaka masungulu man'wana handle ka lawa mangavekiwa, anga yena Yesu Kriste.

¹² Kambe loko munhu ayaka henhla ka masungulu wolawo hi golidi, kumbe hi silivhere, hambi kuli hi maribze ya nxavu wa risima, kumbe timhandze, kumbe bzanyi, kumbe tinhlanga,

¹³ ntirho wa munhu lweyi wutavoneka; hikuva siku ra Hosi ritafika na rili ni ndzilo, ritakomba lesvi ntirho wa mun'wana ni mun'wana wunga svona, kutani ndzilo wutaringeta kutiya ka ntirho wakona.

¹⁴ Loko lesviyakiweke hi munhu lweyi svitiyile, atakuma hakelo.

¹⁵ Kambe loko ntirho wakona wupsha, atapfumala hakelo; loko ali yena, ataponisiwa, kambe svitayendla ingi na yena ahundzile hi le ndzilweni.

¹⁶ Xana amisvitivi lesvaku mi tempele ya Xikwembu, ni lesvaku Moya wa Xikwembu wuyakile ka n'wina ke?

¹⁷ Loko munhu awonha tempele ya Xikwembu, Xikwembu xitamuwonha na yena; hikuva tempele ya Xikwembu yihlawulekile, kutani n'wina mi tempele yoleyo.

¹⁸ Munhu angatshuki atixisa. Loko mun'we xikarhi ka n'wina ativona na ali lweyi atlhariheke hi kuya hi sva minkama leyi, aahundzuke xihunguki, lesvaku atava lweyi wotlhariha.

¹⁹ Hikuva vutlhari bza misava leyi i vuhunguki mahlweni ka Xikwembu. Kutsaliwile lesvi: “Xikwembu xiphasa tintlhari ka maqhinga ya tona.”

²⁰ Vayengeta vaku: “Hosi yitiva miyanakanyu ya lavotlhariha, yitiva lesvaku ahi ya nchumu.”

²¹ Loko svilitano, kungavi ni lweyi atidzunisaka hi vanhu, hikuva hinkwasvu i sva n'wina;

²² hambi ali Pawulo, hambi ali Apolosi, hambi ali Kefasi, hambi yili misava, hambi bzili vutomi, hambi rili rifu, hambi svili sva svosvi, hambi svili lesvingatata: Hinkwasvu i sva n'wina,

²³ na n'wina miva Kriste, na Kriste i wa Xikwembu.