1 Vakorinto 2 - Testamente Leyimpsha Xichangana

Kutwalisa Kriste lweyi avambiweke

¹ Hikolaho vamakwerhu, mina loko nitile ka n'wina, anitanga hi kutiyendla lweyi ahlamalisaka hi kuvulavula kumbe hi vutlhari, nkarhi lowu nimitiviseke xihundla xa makungu ya Xikwembu;

² kambe nitilulamisile lesvaku, loko nili xikarhi ka n'wina, ningalavi kutiva svin'wana loko angali Yesu Kriste, yena Kriste lweyi avambiweke.

³ Loko nitile ka n'wina, anili lweyi anga ni gome, ni kuchava, ni kurhurhumela ngopfu.

⁴ Anitirhisanga marito lawa makholwisaka ya vutlhari bza vanhu, kuvulavuleni ka mina ni loko nichumayela Rito. Kambe nivekile xikombiso xa Moya ni xa matimba ya Xikwembu,

⁵ lesvaku kupfumela ka n'wina kungayakiwi henhla ka vutlhari bza vanhu, kambe kuyakiwa henhla ka matimba ya Xikwembu.

Vutlhari bza Xikwembu

⁶ Hambi svilitano, hivulavula hi sva vutlhari xikarhi ka lavakuleke moyeni, bzingali vutlhari bza minkama leyi, kumbe bza tihosi ta minkama leyi, hikuva va le kuhelisiweni;

⁷ kambe hivulavula hi sva vutlhari bza Xikwembu, bzinga bza xihundla, vutlhari lebzi bzifihliweke, lebzi Xikwembu xibzilungiseke kahali kusunguleni, bzintahinyika kudzuneka.

⁸ Aku na ni mun'we wa tihosi ta minkama leyi, lweyi abzitwisiseke; loko avabzitwisisile, ingi vangavambanga Hosi ya kudzuneka.

⁹ Kambe hilaha kutsaliweke hakona vaku: “Lesvi ni tihlo ni rin'we rikalaka ringasvivonanga, lesvi ni ndleve ni yin'we yikalaka yingasvitwanga, lesvingasikitshama svinghena ka miyanakanyu ya munhu, hi svona lesvi Xikwembu xisvilungiseleke lava vaxirhandzaka.”

¹⁰ Kambe Xikwembu xihipfuletele svilo lesvi hi Moya; hikuva Moya wulavisisa hinkwasvu, hambi svili svihundla lesviyenteke sva Xikwembu.

¹¹ I mani lweyi angativaka miyanakanyu ya munhu, loko wungali moya wa munhu yelweyo, lowunga ndzeni ka yena xana? Hi ndlela yoleyo, aku na munhu lweyi angativaka miyanakanyu ya Xikwembu, loko wungali Moya wa Xikwembu.

¹² Hina ahiyamukelanga moya wa misava leyi, kambe hiyamukelile Moya lowuhumaka ka Xikwembu, lesvaku hitativa hinkwasvu lesvi hinyikiweke svona hi Xikwembu.

¹³ Lesvi, hi svona lesvi hivulavulaka hi svona, kungali hi marito lawa majondzisiweke hi vutlhari bza vanhu, kambe hi marito lawa majondzisiweke hi Moya, na hili karhi hihlamusela sva Moya ka lava vanga ni Moya.

¹⁴ Munhu lweyi angaliki na Moya wa Xikwembu, angayamukeli sva Moya Lowokwetsima, hikuva ka yena i vuhunguki; kutani wahluleka kusvitwisisa, hikuva svifanele kuyanakanyiwa hi Moya.

¹⁵ Kambe lweyi anga ni Moya, aayavanyise hinkwasvu, kambe yena angayavanyisiwi hi munhu.

¹⁶ Hikuva i mani lweyi ativaka miyanakanyu ya Hosi, lesvaku atayijondzisa ke? Loko ali hina hi ni miyanakanyu ya Kriste.