1 Vakorinto 16 - Testamente Leyimpsha Xichangana

Ta nhlengo wopfuna vahlawuliwa va le Yudeya

¹ Loko wuli nhlengo lowuhumeseliwaka vahlawuliwa va Xikwembu, na n'wina mitayendla hilaha ni leleteke tikereke ta Galatiya hakona.

² Hi siku rosungula ra vhiki, mun'wana ni mun'wana wa n'wina aaveke xanchumu hi tlhelo, ka lesvi asvibindzuliseke, lesvaku nhlengo wungahayendliwi siku leri nitaka.

³ Hlawulani van'we xikarhi ka n'wina, kutani loko nifika, nitavanyika mapapela, nivarhuma lesvaku vaheleketa nyiko ya n'wina Yerusalema.

⁴ Loko svifanela lesvaku na mina niya kona, nitafamba na vona.

Makungu ya riyendzo

⁵ Nitata le ka n'wina, kambe nitahundza hi le Makedoniya, hikuva ni ni makungu ya kuya kona.

⁶ Kumbexana nitatshama na n'wina, hambi kuli kuheta vuxika hinkwabzu na n'wina, akuva minipfuna kuhundzela kun'wana lomu ninganavelaka kuya kona.

⁷ Hikuva svosvi anilavi kumiyendzela na nili muhundzi wa ndlela ntsena; ni ni kutshemba ka lesvaku nitatshama nkama woleha ka n'wina, loko Hosi yisvirhandza.

⁸ Nahatatshama kola Efesa kufika nkama wa Pentekoxta.

⁹ Nipfuleliwe xipfalu xa ntirho lowu wosaseka, kambe lava vaniyalelaka vatele.

Xitsundzuxu ni marungula

¹⁰ Loko Timotewu ata, vonani lesvaku atitwa na atshunxekile loko ali ka n'wina; atirha ntirho wa Hosi kufana na mina.

¹¹ Loko svilitano, kungavi na munhu lweyi amusolaka; mupfuneni kuhundzela mahlweni hi kurhula, atavuya laha ka mina; mina ni vamakwerhu hi mulangutelile.

¹² Loko ali makwerhu Apolosi, nimukhongotele ngopfu lesvaku ata le ka n'wina ni vamakwerhu; aangasvilavi ngopfu kuta svosvi, kambe atata siku leri angatasvikota.

¹³ Hitekani, mitiya svinene kupfumeleni, miva vavanuna, mitinyika matimba.

¹⁴ Hinkwasvu lesvi misviyendlaka, asviyendliwe hi rirhandzu.

¹⁵ Nahali ni xitsundzuxu, vamakwerhu: Mavativa vanhu va ka Stefanasi, ni lesvaku hi vona vapfumeli lavorhanga lavahumeke tikweni ra Akaya, ni lesvaku vatinyiketile kutirhela vahlawuliwa va Xikwembu.

¹⁶ Namikhongotela svinene kutiveka hansi ka vanhu lava, ni ka mun'wana ni mun'wana lweyi atinyiketeke kutirha ntirho wolowo, atikarhatela wona.

¹⁷ Nitsakile ngopfu hi kuta ka Stefanasi, na Fortunato, na Akayiko, hikuva vanitiselile lesvi n'wina mitsandzekeke kusviyendla, hikuva mili kule.

¹⁸ Vanirhulise mbilu, na n'wina vamirhulise timbilu hi kuyendla svosvo. Vanhu lavotano, vafanela kukhensiwa!

¹⁹ Tikereke ta le Aziya tamirungula. Akila na Prisika, svin'we ni kereke leyihlengeletanaka muntini wa vona, vamirungula svinene Hosini.

²⁰ Vamakwerhu hinkwavu vamirungula. Xewetanani hi kun'quntana kokwetsima.

²¹ Hi xiyandla xa mina nitsala lesvi nili; “Namirungula. Hi mina Pawulo.”

²² Loko munhu angarhandzi Hosi, aave xirhukweni! “Maranatha! Tana, Hosi!”

²³ Timpsalu ta Hosi Yesu ative na n'wina!

²⁴ Rirhandzu ra mina arive na n'wina hinkwenu, ka Yesu Kriste.