1 Vakorinto 15 - Testamente Leyimpsha Xichangana

Ta kupfuxiwa ka Kriste kufeni

¹ Svosvi vamakwerhu, nilava kumitsundzuxa hi ta Evhangeli leyi ni yipaluxeke ka n'wina, miyiyamukela miva mitiyisela; nasvona matiyisela ka yona;

² mikarhi miponisiwa hi yona, loko kunene mihlayisa vumboni bza mina ka yona, ni loko kupfumela ka n'wina, ka yona kungavanga ka hava.

³ Nimihundzisele lesvi na mina nisviyamukeleke, svinga lesvikulu ka hinkwasvu: Hi lesvaku Yesu afele svijoho sva hina, hilaha Matsalwa mavulaka hakona;

⁴ ni lesvaku alahliwile sirheni ava apfuxiwa kufeni hi siku ra vunharhu, hilaha Matsalwa mavulaka hakona;

⁵ ni lesvaku ahumelele ka Kefasi, ndzhaku ahumelela ka lava vakhume na vambirhi.

⁶ Atlhele ahumelela hi nkama wun'we ka vamakwavu lavatlulaka ntlhanu wa madzana (500); lavanyingi va vona vahali kona ni svosvi, kambe van'wana se vayetlele.

⁷ Ndzhaku ka svosvo, ahumelele ka Yakobe, atlhela ahumelela ka vapostola hinkwavu.

⁸ Kuheteleleni ka lesvi hinkwasvu, ahumelelile ni ka mina, mina nifanaka ni n'wana wovelekiwa nkama wungasifika.

⁹ Ni lwentsongo ka vapostola, asvinifanelanga kuhlayiwa mupostola, hikuva nixanisile kereke ya Xikwembu.

¹⁰ Kambe ni lesvi ningaxisvona hi timpsalu ta Xikwembu, kutani timpsalu takona, leti Xikwembu xinikombeke tona, atiwelanga hansi. Ntiyiso wakona hi lesvaku nitirhile ngopfu kuvatlula hinkwavu; hambi svilitano, akutirhanga mina, kambe kutirhile timpsalu ta Xikwembu leti tinga ka mina.

¹¹ Hikolaho, hambi ali mina, hambi ali vona, mahungu ya hina hi wolawo, kutani hi wona lawa mimapfumeleke.

Ta kupfuka ka vafi

¹² Loko kujondzisiwa lesvaku Kriste apfuxiwile kufeni, xana sviyendlisa kuyini lesvaku van'wana xikarhi ka n'wina vaku vafi avapfuki?

¹³ Loko vafi vangapfuki, Kriste hi xiviri na yena angapfuxiwanga.

¹⁴ Kutani loko Kriste angapfuxiwanga kufeni, kujondzisa ka hina akuhlayi nchumu ni kupfumela ka n'wina i ka hava.

¹⁵ Kuhundzisa lesvo: Hingakumiwa na hili lavanyikeke vumboni bza mavunhwa hi ta Xikwembu, hikuva hivulile nahitiyisa lesvaku i Xikwembu lexipfuxeke Kriste kufeni, kasi aximupfuxanga, loko hakunene vafi vangapfuxiwi kufeni.

¹⁶ Hikuva loko vafi vangapfuxiwi, Kriste na yena angapfuxiwanga.

¹⁷ Kutani loko Kriste angapfuxiwanga, kupfumela ka n'wina i ka hava, kutani mahali svijohweni sva n'wina.

¹⁸ Kutani-ke, na vona lavafeleke ka Kriste valovele makumu.

¹⁹ Loko ka Kriste hingalanguteli svin'wana, kambe holangutela sva vutomi lebzi ntsena, hi vanhu lavanga ni khombo leritlulaka ra vanhu hinkwavu.

²⁰ Kambe lexitiyeke hi lesvaku Kriste apfuxiwile xikarhi ka vafi. Hi svona lesvitshembisaka lesvaku lava vafeke na vona vatapfuxiwa.

²¹ Hikuva lesvi rifu ringavangiwa hi munhu mun'we, kupfuka ka vafi nakona kutisiwile hi munhu mun'we.

²² Kukotisa lesvi hinkwavu vafaka hikolaho ka Adamu, hi ndlela yoleyo, hinkwavu vatatlhela vapfuxiwa hikolaho ka Kriste.

²³ Kambe mun'wana ni mun'wana atapfuxiwa hi nkama wa yena: Worhanga i Kriste xinga xo xitshembiso; kutani loko Kriste ata, lava vangava va yena vatalandza.

²⁴ Ndzhaku, kutafika makumu, siku leri anyiketaka Mfumu ka Xikwembu Tatana, loko atava ahelisile vuhosi hinkwabzu, ni kufuma hinkwaku, ni matimba hinkwawu.

²⁵ Hikuva Kriste afanele kufuma, kukondza Xikwembu xiveka valala hinkwavu hansi ka minkondzo ya yena.

²⁶ Kutani nala lweyi wohetelela lweyi angatahelisiwa i rifu;

²⁷ tani hi kuvula ka Matsalwa: “Xikwembu xivekile hinkwasvu hansi ka minkondzo ya yena.” Kutani loko Matsalwa mahlaya lesvaku: “Hinkwasvu svivekiwile hansi ka yena”, svatwala lesvaku akukatsiwi Xikwembu, hikuva hi xona xivekeke svilo hinkwasvu hansi ka Kriste.

²⁸ Loko hinkwasvu svivekiwile hansi ka yena N'wana, na yena hi xiviri atavekiwa hansi ka Xikwembu lexi xivekeke hinkwasvu hansi ka yena, lesvaku Xikwembu xiva lexifumaka henhla ka hinkwasvunkwasvu.

²⁹ Xana vanhu valava yini, loko vatsakamisiwa hikolaho ka lavafeke ke? Loko vafi vangapfuki nikutsongo, svipfuna yini kutsakamisiwa hikolawo ka vona ke?

³⁰ Na hina, xana svihipfuna yini kutiyisela makhombzeni minkama hinkwayu ke?

³¹ Hakunene, masiku hinkwawu nilangutane ni rifu! Nivula na nitiyisile vamakwerhu, hikuva nitidzunisa hi n'wina hikolaho ka Yesu Kriste Hosi ya hina.

³² Loko ongi nilwile ni svivandzana le Efesa na nili munhu ntsena lweyi afaka, asvitava svinipfunile yini ke? Loko vafi vangapfuxiwi, “ahijeni hinwa, hikuva mundzuku hitafa!”, hi kuvula ka Matsalwa.

³³ Mingapfumeleni kuxengiwa: “Vanghanu lava vobiha vawonha mikhuva leyinene.”

³⁴ Xalamukani, mitshika kujoha. Van'wana va n'wina avativi Xikwembu; nivula lesvi kumikhomisa tingana.

Ta miri wa lava vapfukeke kufeni

³⁵ Kumbe mun'wana ataku: “Vafi vapfuxiwa hi mukhuva wihi ke? Vatava ni miri wa lixaka muni ke?”

³⁶ I kuvutisa ka xihunguki koloko! Lexi wena uxibzalaka, xifanele kurhanga xifa, loko xilava kutlhela xihanya.

³⁷ Lexi uxibzalaka, axisiva miri wa lexi xingatahuma, kambe i ndzhoho ntsena leyikhumuzeliweke; kumbe i ya mavele, kumbe i ya timbewu tin'wana.

³⁸ Xikwembu xinyika ndzhoho leyi amiri hilaha xirhandzaka hakona; xinyika mbewu yin'wana ni yin'wana miri lowu wunga wa yona.

³⁹ Nyama hinkwayu ayifanani; nyama ya vanhu i ya rixaka rin'wana; ya sviharhi i yin'wana, ni ya tinyanyana i yin'wana, ni ya tihlampfi i yin'wana.

⁴⁰ Ku ni miri wa le tilweni, ku ni miri wa laha misaveni; kambe miri wa le tilweni wu ni kusaseka kun'wana, wa laha misaveni wu ni kun'wana.

⁴¹ Jambu ri ni kusaseka kun'wana, ni n'weti yi ni kun'wana, ni tinyeleti ti ni kun'wana; nyeleti yin'we yitlula yin'wanyana hi kuphatima.

⁴² Kupfuka ka vafi ku tano nakona: Kufana ni mbewu, miri wulahliwa na wuli lowuhantlaka kuwonheka, wupfuxiwa na wuli lowu wungahawonhekiki;

⁴³ wulahliwa na wuli wosoleka, wupfuxiwa na wuli ni matimba; wulahliwa na wuhelile matimba, wupfuxiwa na wutele matimba;

⁴⁴ wulahliwa na wuli miri wa nyama, wupfuxiwa na wuli miri wa moya. Ku ni miri wa nyama, kambe wa moya na wona wu kona.

⁴⁵ Hikolaho kutsaliwile, vaku: “Munhu wa kusungula Adamu, ayendliwile xivumbiwa lexihanyaka.” Kambe Adamu lweyi wohetelela ayendliwile moya lowuhanyisaka.

⁴⁶ Hambi svilitano, lesvirhangaka ahi svona sva moya, i sva ntumbuluku, kutani ndzhaku kuta sva moya.

⁴⁷ Munhu wa kusungula ahumile misaveni, na ali lweyi ayendliweke hi ntshuri wa misava; munhu lweyi wa vumbirhi ahuma tilweni.

⁴⁸ Vanhu lavavumbiweke hi ntshuri vafana ni munhu lweyi wa ntshuri; ni vanhu va le tilweni vafana ni munhu lweyi wa le tilweni.

⁴⁹ Kukotisa lesvi hingayambala xivumbeko xa munhu wa ntshuri, hi ndlela yoleyo hitayambala xivumbeko xa munhu wa le tilweni.

⁵⁰ Lesvi nihlayaka svona, vamakwerhu, hi lesvi: Nyama ni ngati svingakala svingaji ndzhaka ya Mfumu wa Xikwembu, nasvona lesvihantlaka kuwonheka svingakala svingaji ndzhaka ya lesvi svingawonhekiki.

⁵¹ Yingisani, nimibzela xihundla: Ahingafi hinkwerhu, kambe hinkwerhu hitahundzuliwa,

⁵² hi nkamanyana, hi kutsopeta ka tihlo, kuyibeni ka mhalamhala ya makumu; mhalamhala yitatwala, kutani vafi vatapfuxiwa vahambaniseliwa makumu ni kuwonheka, kutani hina hitahundzuliwa.

⁵³ Hikuva lexibolaka xifanele kufunengela lexingaboliki, ni lexi xifaka xifanele kufunengela lexingafiki.

⁵⁴ Kutani loko lexibolaka xitava xifunengele lexingaboliki, ni loko lexifaka xitava xifunengele lexingafiki, hi kona rito leritsaliweke ringatahetiseka, leringe: “Rifu rimitiwile, rihluliwele makumu.”

⁵⁵ “Wena rifu, kuhlula ka wena ku kwihi ke? Wena rifu, ndzhombo wa wena wu kwihi ke?”

⁵⁶ Ndzhombo wa rifu i xijoho, kutani matimba ya xijoho i Nawu.

⁵⁷ Kambe akukhensiwe Xikwembu lexi xihinyikaka kuhlula hi Hosi ya hina Yesu Kriste.

⁵⁸ Hikolaho, vamakwerhu lavarhandzekaka, tiyani svinene mingatsekatsekeni; tiyiselani svinene, mitirhela Hosi masiku hinkwawu, na mili karhi misvitiva lesvaku mintirho ya n'wina Hosini ayingaweli hansi.