1 Vakorinto 14 - Testamente Leyimpsha Xichangana

Nyiko ya kuprofeta i yikulu kutlula ya tindzimi

¹ Tikarhateleni kuva ni rirhandzu, kambe nasvona michivirikela tinyiko ta Moya, ngopfungopfu nyiko ya kuprofeta.

² Lweyi avulavulaka hi ririmi leringativiwiki, angavulavuli ni vanhu, kambe avulavula ni Xikwembu, hikuva aku na munhu lweyi amutwisisaka; avulavula svihundla hi kupfuleteliwa.

³ Kasi lweyi aprofetaka, abzela vanhu marito lawa mayakisaka, ni lawa matiyisaka, ni lawa machavelelaka.

⁴ Lweyi avulavulaka hi ririmi leringatwisisiwiki watiyaka yena n'winyi; kasi lweyi aprofetaka ayakisa nhlengeletanu.

⁵ Nasvilava lesvaku hinkwenu mivulavula hi tindzimi letingatwisisiwiki, kambe ngopfungopfu nilava lesvaku miprofeta. Lweyi aprofetaka, atlula lweyi avulavulaka hi tindzimi (handle ka loko kuli ni kuhlamusela, lesvaku nhlengeletanu yitakuma lesvi sviyiyakisaka).

⁶ Hikolaho-ke, vamakwerhu, loko nita ka n'wina, nifika nivulavula hi tindzimi letingatwisisiwiki, nitamipfunisa kuyini xana? Aningamipfuni, handle ka loko ningatirhisa mavulavulela lawa mahlavutelaka svin'wana, kumbe ya vutivi, kumbe ya kuprofeta, kumbe ya kujondzisa.

⁷ Svifana ni ka svilo lesvingahefemuliki, kufana ni nanga kumbe haripa: Loko svichayiwa kutani svingahumesi mimpfumawulu ya kuhambanahambana, xana risimu ra svona ringativiwa hi ndlela yihi, lesvaku hi leroyini ke?

⁸ Ni loko mhalamhala yingapfumi svinene, i mani lweyi angatahloma matlhari ya nyimpi ke?

⁹ Svitano na n'wina, loko mivulavula hi ririmi leringativiwiki. Handle ka loko mihumesa rito leritwalaka, xana vanhu vatativisa kuyini lesvi misvivulaka ke? Mitava mivulavula lesvihahaka ni moya.

¹⁰ Natshemba lesvaku ku ni tinxakaxaka ta mimpfumawulu leyotala ngopfu laha misaveni; kambe aku na ni wun'we wa yona lowu wungahava lexi wuhlayaka xona.

¹¹ Kutani loko ningativi lesvaku mpfumawulu wakona wuhlaya yini, nitava munhu wa le handle ka lweyi avulavulaka; na yena munhu muvulavuli atava munhu wa le handle ka mina.

¹² Svitano na n'wina: Lesvi minavelaka kuchivirikela tinyiko ta Moya, yendlani hi matimba kutirhisa letipfunaka kuyaka svirho sva nhlengeletanu.

¹³ Hikolaho, lweyi avulavulaka hi ririmi leringativiwiki, aakhongele lesvaku akota kurihlamusela.

¹⁴ Hikuva loko nikhongela hi ririmi lero, i moya wa mina lowukhongelaka, kambe miyanakanyu ya mina ayitirhi nchumu.

¹⁵ Loko svili lesvo, kungayendliwa yini xana? Nifanele kukhongela hi moya wa mina, kambe nakona nifanele kukhongela hi miyanakanyu ya mina. Nifanele kuyimbelela hi moya wa mina, kambe nakona nifanele kuyimbelela hi miyanakanyu ya mina.

¹⁶ Hikuva loko ukhensa hi moya wa wena na uli wexe, xana munhu lweyi anga nhlengeletanweni atavulisa kuyini “Amen!” Kuhlamula xikhongelo xa wena xa kukhensa, lesvi angativiki lexi uxihlayaka ke?

¹⁷ Xikhongelo xa wena xokhensa xingava lexinene ngopfu, kambe ka munhu lweyi mun'wana, aximuyakanga.

¹⁸ Nikhensa Xikwembu, hikuva nivulavula hi tindzimi letingativiwiki kutlula n'wina hinkwenu;

¹⁹ kambe, nhlengeletanweni, nitsakela kuvula marito ya ntlhanu hi kutirhisa miyanakanyu ya mina, lesvaku nitajondzisa ni lava van'wana, kutlula kuvulavula marito ya madzanadzana hi ririmi leringativiwiki.

²⁰ Vamakwerhu, mingafaneni ni vatsongwana kuyanakanyeni ka n'wina. Loko kuli ka lesvobiha mifanele kufana ni svihlangi kambe miva lavakuleke kuyanakanyeni.

²¹ Kutsaliwile Nawini, vaku: “Nitavulavula ni vanhu lava hi milomo ya vanhu va tindzimi tin'wana ni vamatiko man'wana; kambe hambi svilitano, avanganiyingisi, kuvula Hosi.”

²² Hikolaho, kuvulavula hi tindzimi letingativiwiki i xikombiso kungali ka vapfumeli, kambe ka lava vangaliki vapfumeli; kasi kuprofeta i xikombiso, kungali ka lava vangaliki vapfumeli, kambe ka vapfumeli.

²³ Loko nhlengeletanu hinkwayu yita ndhawini yin'we, ni loko hinkwavu vavulavula hi tindzimi letingativiwiki, kutani kutshuka kunghena vanhu lava vangaliki vapfumeli, xana avangavuli vaku: “Mi ni rihuhe, ke?”

²⁴ Kambe loko mun'wana ni mun'wana aprofeta, kutani kutanghena munhu lweyi angaliki mupfumeli, marito ya hinkwavu matamukholwisa lesvaku i mujohi, kutani hinkwavu vamuyavanyisa;

²⁵ svihundla sva mbilu ya yena svitahumelela rivaleni, kutani atawa hi mombo, agandzela Xikwembu, kutani atavula aku: “Hakunene Xikwembu xi kona la xikarhi ka n'wina.”

Kutirhisana hi nawu nhlengeletanwini

²⁶ Vamakwerhu, loko svili lesvo kungayendliwa yini? Loko mihlengeletana, mun'we angava ni Tipisalma, mun'wana angava ni jondzo, kumbe mhaka leyi akombisiweke yona hi Xikwembu, kumbe nyiko yovulavula hi ririmi leringativiwiki, kumbe nyiko yohlamusela lesvivulavuliweke; kambe hinkwasvu asvive lesviyakisaka nhlengeletanu.

²⁷ Loko kuvulavuliwa hi ririmi leringativiwiki, akuvulavule vambirhi kumbe vanharhu ntsena, sviyima kolaho; avanyikane nkama, kuli ni lweyi ahlamuselaka.

²⁸ Loko kungali na muhlamuseli, lweyi alavaka kuvulavula hi tindzimi letingativiwiki aamiyele angavulavuli nhlengeletanweni; aavulavulele mbilwini ya yena, ni kuvulavula ni Xikwembu.

²⁹ Loko vali vaprofeta akuvulavule vambirhi kumbe vanharhu, kutani van'wana avakambisise marito ya vaprofeta lava.

³⁰ Loko mun'we ali kuvulavuleni, kutani mun'wanyana wa lava vanga kona akombisiwa mhaka hi Xikwembu, lweyi avulavulaka aamiyele.

³¹ Hinkwenu mitawukuma nkama wa kuprofeta, mun'wana ni mun'wana wa n'wina, lesvaku hinkwavu vatajondza, ni lesvaku hinkwavu vatatiyisiwa.

³² Amimoya ya vaprofeta yifumiwa hi vaprofeta.

³³ Hikuva Xikwembu ahi Xikwembu xa mpfilumpfilu, kambe i xa kurhula. Lesvi svinga ntolovelo tikerekeni hinkwatu ta vahlawuliwa va Xikwembu,

³⁴ hi lesvaku vavasati vafanele kumiyela tinhlengeletanwini, hikuva avapfumeleliwi kuvulavula; vavasati vafanele kutitsongahata, hilaha Nawu na wona wuvulaka hakona.

³⁵ Loko valava kutiva svin'wana, avavutise vanuna va vona kaya, hikuva svikhomisa tingana loko wansati avulavula nhlengeletanweni.

³⁶ Mili yini? Xana Rito ra Xikwembu ritile hi le ka n'wina, kumbe riyotela n'wina ntsena ke?

³⁷ Loko mun'we ativona na ali muprofeta, kumbe ali lweyi anga ni tinyiko ta Moya, aative lesvaku timhaka leti nimitsalelaka tona, i milawu ya Hosi.

³⁸ Loko mun'we angali na mhaka na svona, na n'wina mingavi na mhaka na yena.

³⁹ Hikolaho vamakwerhu, chivirikelani kuva ni nyiko ya kuprofeta, nasvona mingasiveleni lavavulavulaka hi tindzimi letingatwisisiwiki.

⁴⁰ Ntsena, hinkwasvu asviyendliwe khwatsi ni hi nawu wakona.