1 Vakorinto 13 - Testamente Leyimpsha Xichangana

¹ Hambi ningavulavula tindzimi ta vanhu ni ta tintsumi, kambe ningali na rirhandzu, nifana ni nsimbi leyipfumaka, kumbe sviphambati sva nsimbi loko svibananisiwa.

² Ni loko kumbe nili ni nyiko ya kuprofeta, nili ni kutwisisa svihundla hinkwasvu ni vutivi hinkwabzu, ni loko nili ni kupfumela hinkwaku, nikondza nikunula tintshava, kambe ningali na rirhandzu, ani nchumu.

³ Hambi ningateka rifuwo ra mina hinkwarhu ninyika vanhu, ni loko ninganyiketa miri wa mina lesvaku wuhisiwa, kambe ningali na rirhandzu, asvinipfuni nchumu.

⁴ Rirhandzu ratiyisela, nasvona ri ni timpsalu; rirhandzu ari na mavondzo, aritinyungubzisi, aritikulisi;

⁵ rirhandzu arihanyi hi ndlela yosoleka, aritilaveli lesvi svinga sva rona ntsena, ari na xitsukutswana; rirhandzu ari na xiveketela xa lesvobiha;

⁶ rirhandzu aritsakeli kuhomboloka, kambe ritsakisiwa hi ntiyiso.

⁷ Riyamukela hinkwasvu, ripfumela hinkwasvu, rilangutela hinkwasvu, ritiyisela ka hinkwasvu.

⁸ Rirhandzu ariheli ni siku ni rin'we. Loko bzili vuprofeta bzitahundza; na tona tindzimi titahela; hambi bzili bzona vutivi bzitahundza.

⁹ Hikuva vutivi bza hina abzihetisekanga, ni matimba ya hina ya kuprofeta amahetisekanga;

¹⁰ kambe loko kutafika lesvihetisekeke, lesvi svingahetisekangiki svitahundza.

¹¹ Loko nahali xihlangi, anivulavula kufana ni xihlangi, nititwa kufana ni xihlangi; kambe svosvi ningahundzuka wanuna, nitshikile sva vuhlangi.

¹² Svosvi hivona hi riphume tani hi le ka xivonivoni; kambe nkameni wolowo, hitalangutana hi mahlo; svosvi vutivi bza mina abzihetisekanga, kambe nkameni wolowo nitativa hi kuhetiseka, tani hi lesvi Xikwembu na xona xinitivaka hi kuhetiseka.

¹³ Svosvi-ke, kutiyile svilo svinharhu: Kupfumela, kulangutela ni rirhandzu; kambe lexikulu ngopfu ka svona i rirhandzu.