1 Vakorinto 12 - Testamente Leyimpsha Xichangana

Tinyiko ta Moya

¹ Amhakeni ya tinyiko ta Moya, vamakwerhu, nilava lesvaku mitiva lesvinga svona.

² Masvitiva lesvaku, loko mahali vamatiko, amiyisiwa hala ni hala, mikokeliwa ka svikwembu sva hava lesvingavulavuliki.

³ Hikolaho, namitsundzuxa nili, munhu lweyi afambisiwaka hi Moya wa Xikwembu, angakala angavuli aku: “Yesu aarhukiwe!” Nasvona aku na munhu lweyi angavulaka aku: “Yesu i Hosi!” Loko angali lweyi afambisiwaka hi Moya Lowokwetsima.

⁴ Ku ni tinyiko ta tinxakaxaka ta moya, kambe Moya wakona i wun'we;

⁵ ku ni tindlela ta tinxakaxaka totirhela vanhu, kambe Hosi yakona i yin'we;

⁶ matimba ya Xikwembu matirha hi tindlela ta tinxakaxaka, kambe i Xikwembu xin'we lexitirhaka hinkwasvu ka vanhu hinkwavu.

⁷ Munhu mun'wana ni mun'wana apfuleteliwa svin'wana hi Moya, lesvaku svitapfuna hinkwavu.

⁸ Mun'we anyikiwa hi Moya kuvulavula sva vutlhari, mun'wana anyikiwa kuvulavula sva vutivi, hi kuya hi Moya wolowo;

⁹ mun'wana anyikiwa kupfumela hi Moya lowu, mun'wana kambe akuma nyiko ya kuhanyisa vanhu hi Moya wo wa wun'we;

¹⁰ mun'wana anyikiwa matimba ya kuyendla mahlori, mun'wana matimba ya kuprofeta; mun'wana akota kuvona kuhambana mahlweni ka mimoya; mun'wana anyikiwa kuvulavula hi tindzimi letingativiwiki ta tinxakaxaka, mun'wana matimba ya kuhlamusela tindzimi leti.

¹¹ Kambe hinkwasvu lesvi i ntirho wa Moya wowawun'we, lowuyavelaka tinyiko tohambana ka munhu mun'wana ni mun'wana hilaha wurhandzaka hakona.

Hinkwerhu hi svirho sva miri wun'we

¹² Kutani-ke, miri i wun'we, hambilesvi wunga ni svirho lesvinyingi; na svona svirho, akutaleni ka svona, sviyendla miri wun'we ntsena. Kutani na wona miri wa Kriste, wutano.

¹³ Hinkwerhu, hambi hili Vayuda kumbe Vagirika, svikarawa kumbe lavatifumaka, hihundzukile miri wun'we, hi kutsakamisiwa ka hina Moyeni wun'we; hinkwerhu hinyikiwile kunwa Moya wun'we ntsena.

¹⁴ Miri awu na xirho xin'we ntsena, kambe wu ni svirho lesvinyingi.

¹⁵ Loko nenge wungaku: “Lesvi ningaliki voko, ani wa miri”, xana hakunene awungavi wa miri, hambi loko wuvulavulisa lesvi ke? Ihim!

¹⁶ Ni loko ndleve yingaku: “Lesvi ningaliki tihlo, ani wa miri”, xana hakunene ayingavi ya miri, hambi loko yivulavulisa lesvi ke? Ihim!

¹⁷ Loko miri hinkwawu awuli tihlo, kutwa ka tindleve akutava kwihi ke? Loko miri hinkwawu awuli ndleve, kunun'huta ka tinhompfu akutava kwihi ke?

¹⁸ Kambe hilaha svinga hakona, Xikwembu xivekile svirho mirini, xin'wana ni xin'wana hilaha xirhandzeke hakona.

¹⁹ Loko svirho hinkwasvu asviyendla xirho xin'we, miri awutava kwihi ke?

²⁰ Hilaha svinga hakona, svirho i svinyingi, kambe miri i wun'we.

²¹ Tihlo ringakala ringabzeli voko riku: “Ani na mhaka na wena.” Kumbe nhloko yingakala yingabzeli milenge, yiku: “Ani na mhaka na n'wina.”

²² Ihim! Kambe svirho sva miri lesvivonekaka na svitsanile kutlula svin'wana, hi svona lesvi svilavekaka.

²³ Svirho sva miri lesvi hipimisaka lesvaku asvi na risima rikulu, hi svona lesvi hisvinyikaka risima lerikulu; lesvi sva tingana, hi svona lesvi hisvifunengetaka hi risima ngopfu.

²⁴ Kasi svirho sva hina lesvidzunekaka, svona asvilavi hinkwasvu lesvi. Kambe Xikwembu xivumbile miri, na xili karhi xinyika kudzuneka lokukulu ka svirho lesvi asvipfumala kudzuneka.

²⁵ Xiyendle lesvaku kungavi na kuyavana mirini, kambe svirho hinkwasvu svitirhelana.

²⁶ Loko xirho xin'we xitwa kuvava, svirho hinkwasvu svitwa kuvava svin'we na xona; ni loko xirho xin'wana xidzunisiwa, svirho hinkwasvu svitsaka na xona.

²⁷ Xilesvo-ke, n'wina mi miri wa Kriste; kutani mun'wana ni mun'wana wa n'wina i xirho xa wona.

²⁸ Kutani kusunguleni Xikwembu xivekile vapostola kerekeni, ndzhaku kuta vaprofeta, kutlhantama vajondzisi; kutani kuta lavayendlaka mahlori, ni lava vanga ni nyiko ya kuhanyisa vanhu, ni lavatirhaka svopfuna van'wana, ni lavanyikiweke kufambisa mintirho, ni kuvulavula hi tindzimi letingativiwiki ta tinxakaxaka.

²⁹ Xana hinkwavu i vapostola ke? Xana hinkwavu i vaprofeta ke? Xana hinkwavu i vajondzisi ke? Xana hinkwavu hi lavayendlaka mahlori ke,

³⁰ kumbe lava vanga ni nyiko yohanyisa, kumbe lavavulavulaka hi tindzimi letingativiwiki ke? Xana hinkwavu hi lavahlamuselaka tindzimi leti ke?

³¹ Chivirikelani tinyiko ta Moya letitlulaka tin'wana hi kusaseka. Kutani svosvi nitamikomba ndlela leyi yisasekeke kutlulisa hinkwatu.