1 Vakorinto 11 - Testamente Leyimpsha Xichangana

¹ Tekelani mina, kukotisa lesvi na mina nitekeleke Kriste.

Ta kufunengeta nhloko kugandzeleni

² Namikhensa, hikuva manitsundzuka minkama hinkwayu, nasvona mihlayisa milawu hilaha ningamijondzisa yona hakona.

³ Kambe nilava lesvaku mitiva lesvi: Kriste i nhloko ya wanuna mun'wana ni mun'wana, xilesvo wanuna i nhloko ya wansati, Xikwembu i nhloko ya Kriste.

⁴ Wanuna mun'wana ni mun'wana lweyi akhongelaka, kumbe lweyi aprofetaka na atifunengetile nhloko, asolisa Kriste lweyi anga nhloko ya yena.

⁵ Kambe wansati mun'wana ni mun'wana lweyi akhongelaka, kumbe lweyi aprofetaka na angafunengelanga nchumu nhlokweni, asolisa nuna wa yena, lweyi anga nhloko ya yena; svifana ni loko onge atsemetiwile misisi.

⁶ Loko wansati angafunengeli nchumu nhlokweni, aatsemete ni misisi ya yena. Kambe loko svikhomisa tingana ka wansati kubzevula misisi, aafunengele xanchumu nhlokweni!

⁷ Wanuna angafanelanga kutifunengeta nhloko, hikuva yena i xifaniso xa Xikwembu ni kudzuneka ka xona, kasi wansati i kudzuneka ka wanuna.

⁸ Wanuna angahumesiwanga ka wansati, kambe i wansati lweyi ahumesiweke ka wanuna;

⁹ nasvona wanuna angavumbeliwanga wansati, kambe i wansati lweyi avumbeliweke wanuna.

¹⁰ Loko svilitano, hikolaho ka tintsumi, wansati afanele kuva ni xikombiso nhlokweni, xa ntikelo wa yena.

¹¹ Kambe hi tlhelo rin'wana, mahlweni ka Hosi wansati angatshunxekanga handle ka wanuna, na yena wanuna angatshunxekanga handle ka wansati.

¹² Hikuva kukota lesvi wansati ahumesiweke ka wanuna, hi ndlela yoleyo na yena wanuna avelekiwa hi wansati, kambe hinkwasvu svihuma ka Xikwembu.

¹³ Tsemani hi n'wexe: Xana svafanela lesvaku wansati akhongela Xikwembu na angafunengelanga nchumu nhlokweni ke?

¹⁴ Xana na wona ntumbuluku awumijondzisi lesvaku loko wanuna ali ni misisi yoleha, svimunyika xisolo ke?

¹⁵ Kasi wansati loko ali ni misisi yoleha, xana asvimunyiki ndzhuti ke? Hikuva anyikiwile misisi yoleha kuva xifunengelo xa yena.

¹⁶ Hambi loko munhu alava kuphika hi svona, hina ahitolovelanga lesvo, na tona tikereke ta Xikwembu atisvitolovelanga.

Svihoxo kujeni ka Xilalelo xa Hosi

¹⁷ Loko nili karhi niminyika svileriso lesvi, ku ni lesvi svinivilelisaka: Hi lesvaku tinhlengeletanu ta n'wina tawonha kutlula kululamisa.

¹⁸ Xorhanga: Nitwa lesvaku ku ni kuhambana xikarhi ka n'wina loko minghena tinhlengeletanu ta n'wina; mhaka leyi, hi tlhelo rin'wana nikholwa lesvaku yingava yona.

¹⁹ (Svatwala, mintlawa yifanele kuva kona xikarhi ka n'wina, lesvaku lava vanga va ntiyiso xikarhi ka n'wina na vona vavonaka.)

²⁰ Kutani-ke, loko minghena tinhlengeletanu ta n'wina, lexi mixijaka axahali Xilalelo xa Hosi;

²¹ hikuva loko mita kujeni, mun'wana ni mun'wana atsutsumela kuja svakuja sva yena, kutani van'wana vakiyela, kasi van'wana vanwa vakondza vadakwa.

²² Xana ami na makaya yojela ni kunwela ka wona ke? Xana mitasandza kereke ya Xikwembu, mikhomisa svisiwana tingana ke? Nitakuyini ka n'wina? Xana ningamikhensa ke? Ihim, mhakeni leyi animikhensi.

Ta Xilalelo xa Hosi

²³ Timhaka leti nitihundziseleke ka n'wina hi leti tihumeke ka Hosi hi xiviri xa yona: Hi lesvaku, hi vusiku lebzi anyiketiweke ha bzona, Hosi Yesu atekile xinkwa,

²⁴ akhensa, axikhema, aku: “Lesvi i miri wa mina, lowunyiketiwaka hikolaho ka n'wina; yendlani svosvo hi kuniyanakanya.”

²⁵ Hi ndlela yoleyo, ndzhaku ka loko valalelile, ateka ni ndzheko, aku: “Ndzheko lowu i ntwananu lowumpsha lowuyendliwaka hi ngati ya mina. Minkama hinkwayu loko minwela ka wona, sviyendleni hi kuniyanakanya.”

²⁶ Hikuva minkama hinkwayu loko mija xinkwa lexi, ni loko minwela ndzhekweni lowu, mitwalisa rifu ra Hosi, yikondza yivuya.

Kuja Xilalelo xa Hosi hi mukhuva lowu wungalulamangiki

²⁷ Hikolaho, mun'wana ni mun'wana lweyi ajaka xinkwa lexi, kumbe lweyi anwelaka ndzhekweni wa Hosi hi ndlela leyingalulamangiki, atava ni nandzu wojohela miri ni ngati ya Hosi.

²⁸ Munhu afanele kurhanga hi kutikamba, kuva kona angataja xinkwa lexi ni kunwela ndzhekweni lowu;

²⁹ hikuva loko munhu aja ni kunwa na ali karhi angativisisanga svinene ta miri wa Hosi, aja ni kunwa kuyavanyisiwa ka yena.

³⁰ Hikolaho, ku ni lavanyingi xikarhi ka n'wina lavanga ni gome ni lava vavabzaka, na svona, van'wana vafile.

³¹ Loko onge hatikambisisa, ahingatayavanyisiwa;

³² kambe lesvi hiyavanyisiwaka hi Hosi, holayiwa lesvaku hitakala hingayavanyiseliwi makumu svin'we ni vanhu va misava.

³³ Hikolaho, vamakwerhu, loko mihlengeletana akuva mija Xilalelo, yimelanani;

³⁴ loko mun'wana ali ni ndlala, aaje kaya, lesvaku kuhlengeletana ka n'wina kungamuyisi kuyavanyisiweni. Loko tili timhaka tin'wana, nitatamilerisa tona loko nitata.