1 Vakorinto 10 - Testamente Leyimpsha Xichangana

Khombo ra kugandzela svifaniso sva svikwembu sva hava

¹ Vamakwerhu, nilava lesvaku mitwisisa lesvihumeleleke ka vatatana va hina: Hinkwavu avasirheleliwa hi refu, hinkwavu vapelile lwandle Leropshuka.

² Apapeni ni le lwandle vakhuvuliwile hinkwavu xinakulobzeni xa Moxe,

³ hinkwavu vajile svakuja sva moya sva kufana, lesvihumeke tilweni;

⁴ hinkwavu vanwile svakunwa svofana sva moya, hikuva avahamba vanwa ribzeni ra sva moya leri arivapangalata; ribze rakona aali Kriste.

⁵ Hambi svilitano, lavanyingi mahlweni ka vona avatsakisanga Xikwembu; hi kolaho vafile mananga.

⁶ Svilo lesvi svihundzukile xitsundzuxu ka hina, kuhichavisa lesvaku hinganaveli lesvobiha, kufana ni lesvi vona vangayendlisa svona.

⁷ Mingaveni vanhu lavagandzelaka svikwembu sva hava, kukotisa van'wana va vona. Hilaha Tsalwa rivulaka hakona riku: “Vanhu vatshamile hansi vaja ni kunwa, kutani vasungula kucina.”

⁸ Hingatshukeni hinghena vuwosvini, kufana ni lesvi van'wana va vona vayendliseke svona, kutani hi siku rin'we kulovile vanhu va makume mambirhi ya makhulu na manharhu (23 000).

⁹ Hingatshukeni hiringa Kriste, kufana ni lesvi van'wana va vona vayendliseke svona; kutani vahelisiwile hi tinyoka.

¹⁰ Mingangurangureni kufana ni lesvi van'wana va vona vayendliseke svona; kutani valovisiwile hi Ntsumi ya vuhelisi.

¹¹ Svilo lesvi svivahumelelile lesvaku sviva xitsundzuxu; nasvona svitsaliwile lesvaku na hina hitsundzuxiwa hi svona, hina lava hinga minkarhini ya makumu.

¹² Hikolaho, lweyi ayanakanyaka lesvaku wahayimile, aativonele lesvaku angawi.

¹³ Amisihumeleliwa hi ndzingo lowutlulaka matimba ya munhu. Xikwembu xatshembeka, xingakala xingapfumeli lesvaku mihlangana ni ndzingo lowu wumihlulaka; loko wutshuka wumitela, xona xitaminyika matimba ya kutiyisela, mikondza mihuma ka wona.

¹⁴ Hikolaho, vamakwerhu lavarhandzekaka, chavani kugandzela svikwembu sva hava.

¹⁵ Nivulavula na n'wina kufana ni loko mili vanhu lava vanga ni kutwisisa; ringanisani hi n'wexe lesvi nisvivulaka.

¹⁶ Ndzheko wa minkateko lowu hiwukhensaka, xana awuvuli lesvaku hi ni kuhlangana svin'we ni ngati ya Kriste ke? Ni xinkwa lexi hikhemelanaka, xana axihlayi lesvaku hi ni kuhlangana svin'we ni miri wa Kriste ke?

¹⁷ Lesvi xinkwa xinga xin'we, hina lava hinga lavanyingi, hi miri wun'we; hikuva hinkwerhu hiyaveliwa xinkwa xin'we.

¹⁸ Yanakanyani mayendlela ya Vaisrayele. Xana lavajaka timhamba letihumeseliweke Xikwembu, avahlanganisiwi ni Xikwembu alitarini rakona ke?

¹⁹ Xana hi marito lawa, nilava kuvula yini ke? Xana nili svakuja lesvihumeseliweke svikwembu sva hava svi ni nchumu wun'wana ka svona ke? Hambi svili svikwembu svakona, xana svi ni nchumu wun'wana ka svona ke?

²⁰ Ihim, anivuli svona! Kambe nili: Loko vamatiko vagandzela, vagandzela madimoni, avagandzeli Xikwembu. Kutani anilavi lesvaku miva ni vunakulobze ni madimoni.

²¹ Asviyendleki lesvaku minwela ndzhekweni wa Hosi ni le ndzhekweni wa madimoni. Asviyendleki lesvaku mija mezeni wa Hosi ni le mezeni wa madimoni.

²² Xana hilava kutshohokisa Hosi ke? Xana hayitlula hi matimba ke?

²³ Mili: “Hinkwasvu svapfumeleleka.” Svatwala, kambe ahi hinkwasvu lesvipfunaka. Mili: “Hinkwasvu svapfumeleleka.” Kambe ahi hinkwasvu lesviyakisaka.

²⁴ Munhu angatshuki atilavela lesvinga sva yena ntsena, kambe aayanakanyi ni sva van'wana.

²⁵ Nyama leyixaviweke lomu yixavisiwaka kona, janani yona hi ripfalu leritshunxekeke, mingavutisi lomu yihumaka kona,

²⁶ hikuva misava ni hinkwasvu lesvi svinga ka yona i sva Hosi.

²⁷ Loko mirhambiwa svakujeni hi munhu lweyi angaliki mupfumeli, kutani misvitsakela kuya kona, janani hinkwasvu lesvi vamiphamelaka svona, hi mbilu leyitshunxekeke, na mingavutisanga lomu svihumaka kona.

²⁸ Kambe loko mun'we amibzela lesvi: “Svakuja lesvi, svihumeseliwile svikwembu sva hava”, mingasvijeni, hikolaho ka lweyi amitsundzuxeke, na ali ni mbilu yokala yingatshunxekanga;

²⁹ loko niku “ripfalu”, anihlayi ra n'wina, kambe nihlaya ra lweyi akutsundzuxeke. Mitaku: “Hikolaho ka yini kutshunxeka ka mina kuyavanyisiwa hi ripfalu ra mun'wana xana?

³⁰ Loko nija svakuja na nili karhi nikhensa, hikolaho ka yini nisoliwa hi mhaka ya svakuja lesvi nisvikhenseke xana?”

³¹ Nhlamulu hi leyi: Hambi mija, hambi minwa, hambi miyendla yini na yini, yendlani hinkwasvu kudzunisa Xikwembu.

³² Mingakunguvayisi Vayuda, hambi Vagirika, hambi kereke ya Xikwembu.

³³ Tekelelani mina, hikuva nitsakisa vanhu hinkwavu hi tindlela hinkwatu, na ningatilaveli lesvipfunaka mina ntsena, kambe nilava lesvipfunaka lavanyingi, lesvaku vataponisiwa.