1 Vakorinto 1 - Testamente Leyimpsha Xichangana

Kuxeweta

¹ Mina Pawulo lweyi avitaniweke hi kurhandza ka Xikwembu kuva mupostola wa Yesu Kriste, na Sostene makwerhu,

² ka kereke ya Xikwembu leyinga Korinto, vanga lavavitaniweke kuva vahlawuliwa va Xikwembu hi kubasisiwa ha Kriste Yesu; ka hinkwavu lavanga matikweni hinkwawu, lavakhongelaka vito ra Hosi ya hina Kriste Yesu, yinga Hosi ya vona ni ya hina, hili:

³ Timpsalu ni kurhula asvive na n'wina, svihuma ka Xikwembu Tatana wa hina, ni ka Hosi Kriste Yesu!

Kukhensa hikolaho ka tinyiko ta Moya

⁴ Masiku hinkwawu nikhensa Xikwembu xa mina hikolaho ka n'wina. Nixikhensa hikolaho ka timpsalu ta xona leti mitikumeke ha Yesu Kriste.

⁵ Ha yena miyendliwile lavafuweke hi matlhelo hinkwawu, kuvulavuleni hinkwaku, ni le kutiveni hinkwaku,

⁶ hikuva vumboni bza hina ha Kriste bzitiyisiwile mahlweni ka n'wina;

⁷ hi kolaho amipfumali nyiko ni yin'we ya Moya, loko mili karhi milangutela kuhlavuteliwa ka Hosi ya hina Yesu Kriste,

⁸ lweyi angatamitiyisa kuyisa kuheteleleni, miva lava vangasolekiki hi siku ra Hosi ya hina Yesu Kriste.

⁹ Xikwembu xatshembeka, xona lexi ximivitaneleke kuva miva ni kuhlangana ni N'wana wa xona Yesu Kriste, Hosi ya hina.

Kuyavana kerekeni

¹⁰ Namikhongotela vamakwerhu, hi vito ra Hosi ya hina Yesu Kriste, nili: Twananani hinkwenu kuvulavuleni. Kungatshuki kuva ni kuhambana xikarhi ka n'wina, kambe mihlangana miva van'we kupimiseni ni le makungwini ya n'wina;

¹¹ hikuva, vamakwerhu, nibzeliwile ta n'wina hi va ka Klowe, vaku kuphikizana ku kona xikarhi ka n'wina.

¹² Nivula lesvi hikuva mun'we wa n'wina ali: “Mina, ni wa ka Pawulo”, mun'wana aku: “Mina ni wa ka Apolosi”, mun'wana aku: “Mina ni wa ka Kefasi”, kasi mun'wana aku: “Mina ni wa ka Kriste.”

¹³ Xana Kriste ayavanile ke? Xana Pawulo atshama avambiwela n'wina ke? Kumbe xana mikhuvuliwile hi vito ra Pawulo ke?

¹⁴ Nakhensa, hikuva anikhuvulanga ni mun'we wa n'wina, loko angali Krispo na Gayo.

¹⁵ Hikolaho, aku na lweyi angavulaka lesvaku akhuvuliwile hi vito ra mina.

¹⁶ (Nikhuvulile ni njangu wa va ka Stefanasi. Handle ka svosvo anahatsundzuki kumbe ningava nikhuvulile mun'wana.)

¹⁷ Kriste anirhumile, kungali kutakhuvula, kambe kupaluxa Evhangeli; na svona, kungali hi vutlhari kuvulavuleni, lesvaku xihambanu xa Kriste xingatshuki xihundzuka sva hava.

Kriste i matimba ya Xikwembu ni vutlhari bza xona

¹⁸ Jondzo ya xihambanu i vuhunguki ka lavalovaka; kambe ka hina lavaponisiwaka i matimba ya Xikwembu.

¹⁹ Hikuva kutsaliwile lesvaku: “Nitawonha vutlhari bza tintlhari, nibakanya vutivi bza tintivi.”

²⁰ Yi kwihi ntlhari ke? A kwihi mutsali xana? Lweyi atsakelaka kuphikizana ni van'wana hi sva misava leyi, a kwihi ke? Xana Xikwembu axikombanga lesvaku vutlhari bza misava leyi i vuhunguki ke?

²¹ Hikuva, vutlharini bza xona, Xikwembu xiyendlile lesvaku vanhu va misava, hi vutlhari bza vona, vatsandzeka kuxitiva. Kutani svitsakisile Xikwembu kuponisa lavapfumelaka, hi kutirhisa lesvi vanhu vango i “vuhunguki”, loko hipaluxa Rito.

²² Vayuda vakombela mahlori, Vagirika vona valava vutlhari,

²³ kambe loko ali hina hitwalisa Kriste lweyi avambiweke, lweyi anga xikhunguvanyiso ka Vayuda ni vuhunguki ka vamatiko;

²⁴ kambe ka lavavitaniweke, hambi vali Vayuda, hambi vali Vagirika, Kriste i matimba ya Xikwembu ni vutlhari bza xona.

²⁵ Hikuva lesvi vanhu vango i “vuhunguki bza Xikwembu”, svi ni vutlhari kutlula vutlhari bza vanhu, ni lesvi vango i “kutsana ka Xikwembu”, svi ni matimba kutlula matimba ya vanhu.

²⁶ Hikolaho vamakwerhu, yanakanyani lesvi amili xisvona loko mivitaniwa. Hi kuvona ka vanhu, lavatlhariheke, ni lavatiyeke, ni lavachavisekaka, avangatalanga xikarhi ka n'wina;

²⁷ kambe Xikwembu xihlawulile lesvi misava yisvivonaka svili “sva vuhunguki”, kukhomisa tingana tintlhari. Xikwembu xihlawulile lesvi misava yisvivonaka svili ni gome, kukhomisa tingana lesvinga ni matimba.

²⁸ Xikwembu xihlawulile lesvi misava yisvilangutelaka hansi ni kusvisola, lesvi ni kuva kona svingaliki kona, kuhelisa lesvinga kona,

²⁹ lesvaku kungavi na munhu ni mun'we lweyi atidzunisaka mahlweni ka xona.

³⁰ Hi kuyendla ka xona, mi le ka Kriste Yesu, kutani hi xona Xikwembu lexingayendla lesvaku Kriste ava vutlhari ka hina; ha yena hiyendliwa lavalulameke, hihundzuka vakwetsimi va Xikwembu, hiva ni kukutsuliwa.

³¹ Hikolaho Matsalwa mahlayaka lesvaku: “Lweyi alavaka kutidzunisa, aatidzunisele Hosini.”